Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

سوید و گرووپه‌ تاوانکاره‌کانی بیانیی بازرگانیکه‌ر به‌ منداڵان

بڵاو کرایه‌وه‌ lördag 22 september 2007 kl 12.21

ساڵی ڕابردوو چه‌ندین گرووپی بیانی که‌ گومانی ئه‌وه‌یان لێده‌کرا منداڵی که‌مته‌مه‌نیان بۆ کاری دزی به‌کار هێنابێ له‌لایه‌ن پۆلیسی سویده‌وه‌ له‌قاودران. هه‌ر ئێستاش ئاماده‌کاریی لێکۆڵینه‌وه‌یه‌ک له‌سه‌ر ئه‌و گرووپه‌ بیانییانه‌ی‌ منداڵی بنه‌ماڵه‌ هه‌ژاره‌کانی ئه‌ورووپای ڕۆژهه‌ڵاتیان له‌ دایکوباوکیان ده‌کڕن و دواتر بۆ کاری دزی له‌ وڵاتانی جۆراوجۆر بۆ وێنه‌ سوید به‌کاریان دێنن به‌ڕێوه‌ده‌چێ.

پێشتر ئه‌و تاوانه‌ی که‌ گه‌وره‌ساڵێک، منداڵێکی بۆ کاری دزی به‌کار دێنا وه‌ک ڕووداوێکی تاک و ته‌را ده‌ژمێردرا به‌ڵام به‌ گوێره‌ی لێکۆڵینه‌وه‌یه‌ک که‌ نزیکه‌ی ساڵێکه‌ پۆلیسی سوید کردوویه‌تی، ئه‌م کاره‌ زۆر جار تاوانێکی ڕێک‌خراو و ته‌واو به‌رنامه‌ بۆداڕێژراوه‌. له‌و ماوه‌یه‌دا پۆلیسی سوید خه‌ریکی ناسین و پژاندنی ئه‌و گرووپه‌ گومانلێکراوانه‌ بووه‌ که‌ منداڵانی که‌مته‌مه‌نی خه‌ڵکی ڕۆمانی و بولگارستانیان بۆ دزیی به‌کار هێناوه‌. هه‌رچه‌ند که‌س له‌م په‌یوه‌ندییه‌دا تا ئێستا موحا‌که‌مه‌ نه‌کراوه‌ به‌ڵام لانی که‌م دوو پێشلێکۆڵینه‌وه‌ له‌ سه‌ر گومانی کڕین و فرۆشتنی مرۆڤ کراون و هه‌ر ئێستاش به‌رده‌وامن.

کایسا ڤالبه‌ری که‌ له‌ گرووپی بازرگانیی به‌ مرۆڤ له‌ ئیداره‌‌ی پۆلیسی جینایی سه‌رانسه‌ریدا کار ده‌کا ده‌گێڕێته‌وه‌ که‌ ئه‌و بازرگانانه‌ی‌ مرۆڤ، ده‌چنه سۆراغی بنه‌ماڵه‌ هه‌ژاره‌کانی وڵاتانی ئه‌ورووپای ڕۆژهه‌ڵات و پاره‌یان ده‌ده‌نێ بۆ ئه‌وه‌ی بتوانن منداله‌کانیان بۆ گه‌ڕی دزیی خۆیان به‌کار بێنن.‌

دایکوباوکه‌کان به‌ڵگه‌نامه‌یه‌ک مۆر ده‌که‌ن که‌ ئیزن داده‌ته‌ منداڵه‌کانیان تا له‌گه‌ڵ گه‌وره‌ساڵیک که‌ ناوی له‌ به‌ڵگه‌نامه‌که‌دا نووسراوه‌ بچنه‌ گه‌ڕی ئه‌ورووپا، ئه‌ویش بۆ ماوه‌یه‌کی سنووردارنه‌کراو. ئا ئه‌و به‌ڵگه‌نامانه‌ی ده‌درێته‌ گومانلێکراوان، کاری سه‌لماندنی کڕین و فرۆشی مرۆڤ دژوار ده‌کات به‌تایبه‌ت که‌ خۆشیان زۆرجار چه‌ندین هه‌ویه‌ی جۆراوجۆریان پێیه‌.‌

کایسا ڤالبه‌ری پێی وایه‌ که‌ زێده‌بوونی ڕێژه‌ی ئه‌م جۆره‌ تاوانه‌ له‌ لایه‌که‌وه‌ په‌یوه‌ندیی به‌وه‌ هه‌یه‌ که‌ پۆلیس خستوویه‌ته‌ به‌ر سه‌رنجی خۆیه‌وه‌ و له‌لایه‌کی‌تریشه‌وه‌ په‌یوه‌ندی به‌وه‌ هه‌یه‌ که‌ سنووره‌کانی ئه‌ورووپا‌ کراوه‌ن. ئه‌و ده‌ڵێ بۆ ڕاگرتنی بازرگانی به‌ مرۆڤ پێویستی به‌ سه‌رمایه‌گوزاریی به‌ربڵاو‌ هه‌یه‌. 

فرێدریک لارشۆن له‌ چالاکانی ڕێکخستنی نێونه‌ته‌وه‌یی کۆچ (the International Organisation for Migration) ده‌ڵێ پیویسته‌ سیاسه‌توانانی سوید گرنگییه‌کی تایبه‌ت بده‌نه‌ كێشه‌ی بازرگانی به‌ مرۆڤ.

ئه‌و ده‌ڵێ بێتوو سه‌یرێکی ئه‌و گفتوگۆیانه‌ی له‌ سوید ده‌رباره‌ی کێشه‌ی بازرگانی به‌ مرۆڤ ده‌کرێن بکه‌یت بۆت ده‌رده‌که‌وێ که‌ زۆربه‌یان له‌ سه‌ر له‌شفرۆشیین. ڕه‌نگه‌ ئێستا کاتی ئه‌وه‌ هاتبێ که‌ ناوه‌ڕۆکی بابه‌ته‌کان بێنه‌ سه‌ر چه‌وساندنه‌وه‌ و خراپ به‌کارهێنانی منداڵ به‌ مه‌به‌ستی تاوانکاری و ته‌نانه‌ت تاوانی بچووک که‌ ئه‌و منداڵانه‌ ده‌یکه‌ن.

کارین نورلین سه‌رۆکی کێشکی گه‌نجان له‌ سه‌نته‌ری (Maria Ungdom) که‌ هاوڕێی کارمه‌ندانی ئه‌م ڕێکخستنه‌‌ گه‌لێ جاران چاوی به‌م منداڵانه‌ که‌وتووه‌. ئه‌و ده‌ڵێ ئه‌و منداڵانه‌ خۆیان تاوانکارن به‌ڵام له‌ پله‌ی یه‌که‌مدا قوربانین.

ئه‌وه‌ی ئێمه‌ ده‌یکه‌ین ئه‌مه‌یه‌ که‌ قوربانیبوونی ئه‌و منداڵانه‌ به‌رجه‌سته‌ بکه‌ینه‌وه‌ و بیخه‌ینه‌ به‌رچاوان به‌ڵکوو ئه‌و شانسه‌یان به‌ نسیب بێ تا له‌پاشان پشتگیری و یارمه‌تیی بدرێن. هه‌ڵبه‌ت کارمه‌ندانی ئیداره‌ی سوسیالیش ده‌بێ ئه‌گه‌ر تاوانێک ڕووی دابێ ئه‌وا پۆلیسی لێ به‌ ئاگا که‌نه‌وه‌.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min lista".