Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

سکرتێری سه‌رۆکوه‌زیری سوید ده‌ستی له‌ کار کێشایه‌وه‌

بڵاو کرایه‌وه‌ torsdag 1 november 2007 kl 14.38
شێنستروێم و ڕاینفێڵد

ئولریکا شێنستروێم سکرتێری سه‌رۆکوه‌زیری سوید ده‌ستی له‌ کار کێشایه‌وه‌ و له‌ ڕاگه‌یه‌نراوێکی چاپه‌مه‌نیدا که‌ سه‌عات یه‌کی نیوه‌شه‌و بڵاوی کرده‌وه‌ ڕایگه‌یاند که‌ ده‌ست له‌ کاری سکرتێرێتیی سه‌رۆکوه‌زیر فرێدریک ڕه‌ینفێڵد ده‌کێشێته‌وه‌. ڕۆژی ڕابردوو ڕاگه‌یه‌نرا که‌ شێنستروێم بۆ ماوه‌یه‌ک کار ناکا و پشوو وه‌رده‌گرێ (تایم ئاوت) که‌چی ئێستا به‌ یه‌کجاری ئه‌م پۆسته‌ی به‌جێهێشتووه‌.

ئولریکا شێنستروێم (Ulrica Schenström) له‌ ڕاگه‌یه‌نراوه‌ چاپه‌مه‌نییه‌که‌یدا ده‌نووسێ: ”ئه‌مه‌ی که‌‌ ئه‌و وێنانه‌ بڵاو بوونه‌ته‌وه‌ و ئه‌و ڕاستییه‌‌ که من له‌گه‌ڵ ڕۆژنامه‌وانێک قسه‌م کردووه‌ و له‌ کاتی ئه‌و په‌یوه‌ندییه‌دا‌ شه‌رابم خواردۆ‌ته‌وه‌‌ زۆر جێگه‌ی لێبوردنه‌. دیاره‌ من به‌ شێوه‌یه‌کی ناله‌بار جووڵاومه‌ته‌وه‌ و ئه‌مه‌ وام لێده‌کا که‌ پێم وابێ نه‌توانم له‌ کار و ئه‌رکی خۆمدا به‌ ته‌واوی جێی بڕوا بم.”

ئێکۆ، به‌شی ناوه‌ندیی ده‌نگوباسی سوید، شه‌وی ڕابردوو کاتێ هه‌واڵی پشوووه‌رگرتنی شێنستروێم بڵاوبۆوه‌ بۆچوونی سکرتێری چاپه‌مه‌نیی سه‌رۆکوه‌زیر ئۆسکار هۆلێن (Oscar Hållén) ی له‌ سه‌ر هۆی ئه‌م بڕیاره‌ پرسیبوو. سکرتێری چاپه‌مه‌نیی سه‌رۆکوه‌زیر ئۆسکار هۆلێن له‌ وه‌ڵامدا گوتی ئه‌و بۆ ماوه‌یه‌کی درێژ، یه‌کجار زۆر کاری کردووه‌ و ئه‌م ڕووداوه‌ی دواییش گه‌لێ به‌ سه‌ختی کاری تێکردوه‌.

هه‌فته‌ی ڕابردوو بوو که‌ چه‌ند وێنه‌یه‌کی خانمی ئولریکا شێنستروێم له‌گه‌ڵ کوڕه‌ ڕۆژنامه‌وانێکی که‌ناڵی چواری تله‌فزیۆنی سوید به‌ ناوی ئاندێرش پیلبلاد (Anders Pihlblad) له‌ مه‌یخانه‌یه‌کی شاری ستۆکهۆڵم له‌ ئێواره‌ڕۆژنامه‌‌ی ئافتۆن‌بلادێت دا بڵاو بۆوه‌.

به‌ شوێن ئه‌وه‌دا موناقه‌شه‌ بۆ نموونه‌ له‌ سه‌ر ئه‌وه‌ هاته‌ گۆڕێ که‌ ئایا ئولریکا شێنستروێم سه‌رخۆش ببوو یان نا، له‌ حاڵێكدا که‌ ئه‌و ڕێک له‌و شه‌وه‌دا به‌رپرسی ئێشکی حوکوومه‌ت بوو بۆ ئاماده‌یی سوید له‌ کاتی ڕوودانی کاره‌ساتی چاوه‌ڕواننه‌کراودا.

فرێدریک ڕاینفێڵد سه‌رۆکوه‌زیری سوید ڕۆژی دووشه‌ممه‌ی ڕابردوو ئه‌م بۆچوونه‌ی له‌ سه‌ر ڕووداوه‌‌که‌ هه‌بوو. ڕایفێڵد گوتی: بۆچی پێتان وایه‌ که‌ ئه‌و نه‌یده‌توانی ئێشکه‌که‌ی بپارێزێ. کێ گوتوویه‌تی که‌ ئه‌و سه‌رخۆش بووه‌؟ ئایا به‌ڵگه‌یه‌کتان له‌ سه‌ر ئه‌وه‌ هه‌یه‌؟ ئێوه‌ ده‌بێ بڕێکتان بێته‌وه‌ بیر که‌ جاری وایه‌ چیرۆکی وا دروست ده‌که‌ن که‌ هه‌ر بوونیشی نییه‌. ئه‌وه‌ی ئێستاش هه‌ر وایه‌ و شتی وا هه‌ر نییه‌.

ڕۆژی سێشه‌ممه‌ کوڕه‌ ڕۆژنامه‌وانه‌که‌ی تله‌فزیۆنی چوار واتا ئاندێرش پیلبلاد له‌ میدیادا ده‌رکه‌وت و گێڕایه‌وه‌ که‌ ئولریکا شێنستروێم ئه‌و شه‌وه‌ سه‌رخۆش بوو. دوێنێش چوارشه‌ممه‌ ئه‌و هه‌واڵه‌ له‌ لایه‌ن که‌ناڵی چواری تله‌فزیۆنه‌وه‌ بڵاوبۆوه‌ که‌ ئه‌مشه‌وه‌ پیلبلاد و شێنستروێم سه‌رجه‌م بایی ٩٤٥ کرۆن، شه‌راب و بیره‌یان خواردۆته‌وه‌.

ئولوف رووین (Olof Ruin) پرۆفیسۆری زانستی سیاسی له‌ چاوپێکه‌وتنێکدا سه‌رسوڕمانی خۆی له‌ شێوه‌ی قسه‌کردنی سه‌رۆکوه‌زیری سوید له‌ میدیاکاندا ده‌ربڕی. ئه‌و گوتی ئه‌مه‌ بڕێک جێی سه‌رسوڕمانه‌ که‌ سه‌ره‌کوه‌زیر نه‌هات ده‌سبه‌جێ بڵێ: ”من ده‌بێ خۆم له‌و شته‌ بکۆڵمه‌وه‌. بێتوو ئه‌وه‌ی ئێوه‌ ده‌یڵێن ڕاست بێ ئه‌وا شتێکی جیدییه‌.” من پێم وایه‌ سه‌رۆکوه‌زیر شته‌که‌ی زۆر به‌ هندک گرت و مرۆڤ نابێ قه‌ت کاری وا بکات. ئولوف رووین (Olof Ruin) ده‌ڵێ ئه‌و داواکارییه‌ی شێنستروێم له‌ سه‌ر ده‌ست له‌ کار کێشانه‌وه‌ی بۆ سه‌رۆکوه‌زیر ڕاینفێڵد، شتێکی زۆر جییدییه‌.

رووین گوتی ئه‌مه‌ بۆ جاری چواره‌مه‌ که‌ که‌سێک له‌ پێگه‌ی به‌رز و ناوه‌ندیی ناو حوکوومه‌ته‌وه‌، ده‌ست له‌ کار ده‌کێشێته‌وه‌. ئه‌مه‌ ده‌توانێ بۆ سه‌رۆکی حوکوومه‌ت به‌دشانسییه‌ک بێت به‌ڵام ده‌توانێ نیشانه‌ی که‌مبوونی هێزی تێگه‌یشتن و لێکدانه‌وه‌ی که‌سه‌کانیش بێت. دیاره‌ ئه‌مه‌ش باش نییه‌.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min lista".