Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

بۆ به‌ فریای براکه‌م نه‌گه‌یشتن؟

بڵاو کرایه‌وه‌ torsdag 10 april 2008 kl 16.46

هیچ که‌سێکی به‌رپرسی ڕێکخراوی زیندانه‌کان، باسی ئه‌و نۆ ده‌قیقه‌یه‌ی کۆتایی ژیانی ئه‌م کوڕه‌ زیندانییه‌ی بۆ بنه‌ماڵه‌که‌ی نه‌کردووه‌‌. دیاره‌ ئه‌مه‌ بنه‌ماڵه‌ و به‌جێماوانی، یه‌کجار داخدار کردووه‌.  

کوڕه‌ گه‌نجێکی ٢۳ ساڵه‌ی زیندانی له‌ به‌ندیخانه‌ی مارییه‌ستاد، پاش هه‌وڵێکی خۆکوژی له‌ حاڵێکدا که‌ خۆی له‌ توالێت به‌ کابڵی هه‌ڵاوه‌سیبوو له‌ لایه‌ن به‌رپرسانی زیندانه‌وه‌ دۆزرایه‌وه‌ به‌ڵام ده‌رگایان له‌ سه‌ر داخست  وپاش نۆ ده‌قیقه‌ ئامبولانسی فریاکه‌وتن گه‌یشتێ و ئه‌و کات له‌ ته‌ناف دایانبه‌زاند. ئێستا بنه‌ماڵه‌ی ئه‌و زیندانییه‌ پێیان وایه‌ ئه‌و نۆ ده‌قیقه‌یه‌ ده‌یتوانی گیانی کوڕه‌که‌یان‌ له‌ مردن ڕزگار بکات. به‌ پێی ڕاپۆرتێک که‌ به‌رنامه‌ی کالیبر له‌ که‌ناڵی یه‌کی رادیۆی سوید له‌ قاوی داوه‌، هه‌رچه‌ند ئه‌و ڕووداوه‌ دوو مانگ له‌وه‌ پێش ڕوویداوه‌ به‌ڵام تا ئه‌م دواییانه‌ به‌رپرسانی ڕێکخراوی زیندانه‌کان (Kriminalvården) ته‌نانه‌ت به‌ بنه‌ماله‌که‌شیان ڕانه‌گه‌یاندبوو که‌ چ قه‌ومابوو‌؟

ـ ئه‌وه‌ وێنه‌ی ئه‌و و براده‌ره‌ کچه‌که‌یه‌تی که‌ به هاوینێ چووبوونه‌ سه‌فه‌ری تورکیه‌.

یه‌کێ له‌ دووو برای کوڕه‌ ٢۳ ساڵه‌که‌ له‌ حاڵێكدا له‌ یۆتێبۆری له‌ ماڵه‌وه‌ دانیشتوون و سه‌یری ئه‌لبوومی وێنه‌ی براکه‌یان ده‌که‌ن وا ده‌ڵێ.

ـ ئه‌وانه‌ ده‌یانه‌وێ ڕاستییه‌کان بشارنه‌وه‌ و کارمه‌ندانی خۆیان ده‌رباز که‌ن، خۆیان ده‌رباز که‌ن.

تا کو ئێستا هیچ که‌س له‌ بنه‌ماڵه‌ی ئه‌و کوڕه‌ ٢۳ ساڵه‌یه‌ هیچ زانیارییه‌کیان له‌ لایه‌ن به‌رپرسانی ڕێکخراوی زیندانه‌کانه‌وه‌ پێنه‌گه‌یشتووه‌ که‌ هه‌ڵه‌یه‌کی وایان کرد که‌ بووه‌‌ هۆی مردنی کوڕه‌. هه‌ڵه‌که‌ش ئه‌وه‌ بوو که‌ نۆ ده‌قیقه‌ ڕاوه‌ستان، کوڕه‌یان له‌ ته‌نافه‌وه‌ نه‌هێنا خوارێ و هه‌ر له‌و سه‌ره‌ هێشتیانه‌وه‌، ده‌رگایان له‌ سه‌ر پێوه‌ دا، ته‌نانه‌ت قفڵیشیان کرد و ته‌له‌فۆنیان له‌ ژماره‌ی ئورژانس کرد واتا یه‌ک، دوو، سێ. ئه‌وان کاتێ به‌مه‌یان زانی که‌ به‌رنامه‌ی کالیبر، په‌یوه‌ندی پێوه‌ گرتن و پێکه‌وه‌ داوای په‌روه‌نده‌ واتا ژورناڵی کوڕه‌ کوژراوه‌که‌یان کرد.‌ ئه‌و کات ئه‌و شته‌ ڕوون بۆوه‌.

کاتێ بنه‌ماڵه‌ی کوڕه‌ سه‌ری به‌رپرسانی زیندانیان دا، پێیان گوترا که‌ ئه‌وان زۆر به‌ خێرایی یارمه‌تیی کوڕه‌یان کردووه‌ و هیچ هه‌ڵه‌یه‌ک له‌م ناوه‌دا ڕووی نه‌داوه‌. ئه‌مه‌شیان وه‌ڵامێکه‌ که‌ کالیبر وه‌ریگرته‌وه‌ کاتێ ته‌له‌فۆنی داگ برێنفێلد (Dag Bränfeldt) توێژه‌ری ناوخۆیی زیندانیان کرد.

ـ ناتوانم ڕاسته‌خۆ ئه‌وه‌ بڵێم که‌ هه‌ڵه‌یه‌ک له‌مناوه‌دا کراوه‌. ئه‌و کوڕه‌ بڕیاری خۆی بۆ خۆکوشتن دابوو و ئێمه‌ نه‌ده‌کرا پێشی پێبگرین.

هه‌واڵنێر لێی ده‌پرسێ: به‌ڵام ئایا ئه‌و کارمه‌ندانه‌ی له‌وێ بوون، ئایا ده‌سبه‌جێ له‌ ته‌نافه‌که‌ دایانگرت؟

وه‌ڵام: به‌ڵێ به‌ڵێ!

ئایا ئه‌و کاته‌ی له‌ توالێته‌که‌ چاویان پێیکه‌وت دایده‌به‌زێنن؟

وه‌ڵام: به‌ڵێ، من ناتوانم ورده‌کاریی وه‌ها پێبده‌م که‌ کێ، چۆن و له‌ کوێ، چی کرد یا نه‌کرد.

ئه‌م ته‌له‌فۆنه‌ به‌ بێ ئاگاداریی توێژه‌ری ناوخۆیی زیندان، تۆمار کراوه‌. دواتر که‌ پێی گوترا و داوای ڕوونکردنه‌وه‌یان لێکرد، تاکوو ئێستا خۆی له‌ وه‌ڵامدانه‌وه‌ بواردوه‌. نه‌ک ته‌نیا ئه‌و، به‌ڵکوو هه‌موو سه‌رۆکانی زیندانی ماریه‌ستاد خۆ له‌ وڵامدانه‌وه‌ به‌و پرسیاره‌ که‌ چ قه‌وماوه‌ ده‌بوێرن.

هه‌واڵنێره‌که‌ به‌ لێننارت پالمگرێن (Lennart Palmgren) له‌ به‌رپرسانی ڕێکخراوی زیندانه‌کان له‌ یۆتێبۆری ده‌ڵێ: من ئێستا وام پی باشه‌ که‌ ته‌له‌فۆن له‌ کارمه‌ندانی زیندان نه‌که‌م، به‌ڵکوو له‌ گه‌ڵ تۆ بدوێم. به‌رپرسی زیندان وه‌ڵام ده‌داته‌وه‌ و ده‌ڵێ خانمه‌ چکۆله‌که‌! ئه‌وه‌ کێشه‌یه‌ فڕی به‌ سه‌ر تۆوه‌ نییه‌. بێتوو ئێمه‌ بمانه‌وێ ته‌علیقێک له‌ سه‌ر ئه‌وه‌ نه‌ده‌ین، ئه‌وا نایده‌ین و ئا.

لارش هۆکان نیلسۆن (Lars Håkan Nilsson) به‌رپرسی ده‌رمانیی ڕێکخراوی زیندانه‌کان (Kriminalvården) ده‌ڵێ من هیوادارم که‌ بتوانین له‌گه‌ڵ خزم و که‌سانی ئه‌و کوڕه‌ به‌ پێی مه‌نتیق و ئاوه‌ز گفتوگۆ بکه‌ین و زیندانیش ئه‌م په‌یوه‌ندییه‌ ساز بکات.

هه‌واڵنێر لێی ده‌پرسێ: چ ته‌علیقێکت له‌ سه‌ر ئه‌وه‌ هه‌یه‌ که‌ ئه‌م پیاوه‌ گه‌نجه‌، نۆ ده‌قیقه به‌ هه‌ڵاوه‌سراوی له‌ سه‌ر ته‌ناف مایه‌وه‌؟‌

وه‌ڵام: ئێمه‌ش ئه‌وه‌مان له‌ خۆمان پرسی که‌ بۆ ده‌بێ شتێکی وه‌ها هاتبێته‌ پێش. ئه‌مه‌ بێگومان کاردانه‌وه‌یه‌کی هه‌ڵه‌ بوو که‌ کرا.

بۆ چی بنه‌ماڵه‌ی کوڕه‌ ئاگادار نه‌کرانه‌وه‌ له‌وه‌ که‌ یارمه‌تیی سه‌ره‌تایی نه‌درایه‌ ئه‌و کوڕه‌؟

لارش هۆکان نیلسۆن به‌رپرسی ده‌رمانیی ڕێکخراوی زیندانه‌کان وه‌ڵام ده‌داته‌وه‌: نازانم، ئه‌مه‌ بێگومان هه‌ڵه‌یه‌ که‌ باسی ئه‌وه‌ نه‌که‌ن که‌ چ قه‌وماوه‌.

لارش نیلێن (Lars Nylén)، به‌ڕیوه‌به‌ری گشتیی ڕێکخراوی زیندانه‌کان (Kriminalvården) به‌ به‌شی ناوه‌ندیی ده‌نگوباسی ڕادیۆ سوید، ئێکۆت، وه‌ به‌رنامه‌ی کالیبر ده‌ڵێ که‌ ئه‌و نایه‌وێ ته‌علیقێک له‌ سه‌ر خودی ڕووداوه‌که‌ بدات به‌ڵکوو ڕاده‌وه‌ستێ تا توێژینه‌وه‌که‌ بگاته‌ ئه‌نجام. ئه‌و هاوکات باس له‌وه‌ ده‌کات که کارمه‌ندانی زیندان له‌ وه‌ها کاتێکدا ده‌بێ ده‌سبه‌جێ یارمه‌تیی ئه‌و که‌سه‌ بده‌ن که‌ لێی قه‌وماوه‌.

سه‌رباقی هه‌موو ئه‌و شتانه‌، هێشتا هیچ که‌سێکی به‌رپرسی ڕێکخراوی زیندانه‌کان، باسی ئه‌و نۆ ده‌قیقه‌یه‌ی کۆتایی ژیانی ئه‌م کوڕه‌ زیندانییه‌ی بۆ بنه‌ماڵه‌که‌ی نه‌کردووه‌‌. دیاره‌ ئه‌مه‌ بنه‌ماڵه‌ و به‌جێماوانی، یه‌کجار داخدار کردووه‌.  

nasser.sina@sr.se

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min Lista".