Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

ئاخۆ سه‌رده‌می پاشایه‌تی له‌ سوید، به‌ سه‌ر چووه‌؟

بڵاو کرایه‌وه‌ onsdag 25 februari 2009 kl 14.26
بنه‌ماڵه‌ی پاشای سوید، گه‌وره‌ بۆوه‌

سویدییه‌ خۆشه‌ویسته‌کانی‌ ناوخۆ و ده‌ره‌وه‌ی وڵات! به‌مجۆره‌ به‌ ئاگاداریی هه‌موو لایه‌کتان ده‌گه‌یێنم که‌ شازاده‌ ڤیکتووریای کچم و به‌ڕێز دانیه‌ل ڤێستلینگ، لێک ماره‌ ده‌کرێن!

کارل گوستاڤی شانزده‌هه‌م پاشای سوید وه‌ک دابی هه‌میشه‌یی ئاخافتنه‌ فه‌رمییه‌ گرنگه‌کانی، ڕووی له‌ سویدییه‌ خۆشه‌ویسته‌کانی ناوخۆ و ده‌ره‌وه‌ی وڵاتی کرد و په‌یامی خۆی ڕاگه‌یاند. پاشای سوید ده‌سبه‌جێ خۆشحاڵیی خۆی و بنه‌ماڵه‌که‌ی له‌م ماره‌کرانه‌ ده‌ربڕی و به‌ ڕووداوێکی مێژوویی ناودێر کرد و ئاواتی خواست که‌ ببێته‌ سه‌ره‌تای پێکه‌وه‌ ژینێکی فره‌ دور و درێژ.

به‌مجۆره‌ هه‌واڵی له‌مێژچاوه‌ڕوانکراوی مێردکردنی کچشازاده‌ی سوید ڤیکتوریا به‌ دانیه‌لی دۆسته‌ کوڕ‌ی که‌ حه‌وت ساڵ بوو پێکه‌وه‌ بوون، به‌ شێوه‌یه‌کی ڕه‌سمی و له‌ لایه‌ن شای سویده‌وه‌ ڕاگه‌یه‌نرا. ڕاسته‌ که‌ زه‌ماوه‌نده‌که‌ بڕیاره‌ سه‌ره‌تای هاوینی ساڵی داهاتوو بکرێ، به‌ڵام ڕۆژنامه و رادیۆ تله‌فزیۆنه‌‌کانی سوید هه‌ر له‌ دوێنێوه‌ ده‌ستیان کرد به‌ لێکدانه‌وه‌ی ڕه‌هه‌نده‌ جۆربه‌جۆره‌کانی ئه‌م زه‌ماوه‌نده‌ و ئاکامه‌ سیاسی، کۆمه‌ڵایه‌تی و ئابوورییه‌کانی ئه‌و پرسه‌. ته‌نانه‌ت کاردانه‌وه‌ی ئه‌م زه‌ماوه‌نده‌ له‌ سه‌ر داهاتووی خودی سیسته‌مه‌که‌ش.

ره‌نگه‌ بۆ گوێگرانی زایه‌ڵه‌ سه‌رنجڕاکێش بێ که‌ بزانن، به‌ پێی یاسای بنچینه‌یی سوید، ده‌بێ حوکوومه‌تیش روانگه‌ی خۆی له‌ سه‌ر ئه‌و که‌سه‌ی ده‌چێته‌ ناو بنه‌ماڵه‌ی پاشایه‌تیی وڵاته‌وه‌، بێژێ و په‌سندی ئه‌و که‌سه‌ بکات. بۆیه‌ش فرێدریک ڕاینفێڵد سه‌رۆکوه‌زیری سوید له‌ حیزبی موحافه‌زه‌کاری مۆدێرات، له‌ کۆبوونه‌وه‌یه‌کی پێشتر له‌ لایه‌ن شای سوید، کارل گوستاڤی شانزده‌هه‌مه‌وه‌، له‌م هه‌واڵه‌ ئاگادار کرابۆوه‌.

پاشا به‌ نووسراوه‌ داوای بۆچوونی حوکوومه‌تی کرد. ئێمه‌ش پاش کۆبوونه‌وه‌ و لێکدانه‌وه‌، په‌سندمان کرد وئه‌وا ئه‌مڕۆ ٢۴ فێبرواریی ساڵی ٢٠٠٩ وه‌ڵامی ئای خۆمان، به‌ پێی په‌ره‌گرافی پێنجی یاسای تایبه‌ت به‌ جێگره‌وه‌ی شا، دایه‌وه‌. به‌م پێیه‌ و سه‌ره‌نجام کچشازاده ڤیکتووریا، ‌مێردی خۆی له‌ نێو خه‌ڵکی به‌ناو ڕه‌شایی هه‌ڵبژارد.

ڕایفێڵد ده‌ڵێ من پێم وایه‌ به‌م زه‌ماوه‌نده‌، ئه‌ڤین سه‌رکه‌وتووه‌ و خۆشحاڵم که‌ پاشا به‌مه‌ ڕازی بووه‌ و شازاده‌ ویکتوریا و دانیه‌لیش پێکگه‌یشتن.

نیشانه‌کرانه‌که‌ و زه‌ماوه‌ندی ساڵی داهاتووی کچشازاده‌ی سوید، له‌ گوێن بۆچوونی گه‌لێ که‌سان، زریقه‌ و بریقه‌ی تایبه‌ت ده‌داته‌ سوید ئه‌ویش ڕێک له‌ جه‌رگه‌ی ئه‌و خه‌مۆکییه‌ جیهانییه‌ی له‌ قه‌یرانه‌ داراییه‌یه‌که‌ که‌وتۆته‌وه‌. پێشبینی ده‌کرێ زه‌ماوه‌نده‌که‌ به‌رته‌قای دوو نیو میلیارد کرۆن، گوڕ بخاته گه‌ڕی ئابووریی سویده‌وه‌. ڕێکخراوی بازرگانیی سوید، سڤێنسک هاندل، دوێنێ ڕایگه‌یاند که‌ گه‌شتیارانێکی زۆر به‌ تایبه‌ت له‌ وڵاتانی تره‌وه‌ بۆ زه‌ماوه‌نده‌که‌ دێنه‌ سوید و به‌ هۆی داشکانی بایی کرۆنیش، ئه‌وا حه‌ز به‌ سویدگه‌ردی زێده‌تر په‌ره‌ ده‌ستێنێ.

ئاکامی ئامارگرتنی دامه‌زراوه‌ی ڕاژمێریی نووڤووس ئۆپئینیوون، ئه‌مه‌ ده‌رده‌خا که‌ ٨۳ له‌ سه‌دی خه‌ڵکی سوید، زه‌وجینی شازاده‌ ڤیکتوریا له‌ گه‌ڵ کوڕێکی ناو ڕه‌شایییان پێ کارێکی باشه‌. ته‌نیا شه‌ش له‌ سه‌دیان نه‌بێ که‌ ئه‌م هه‌ڵبژاردنه‌یان به‌ دڵ نییه‌.

ڕۆژێک پاش ڕاگه‌یه‌نرانی ئه‌وه‌ی که‌ شازاده‌ ڤیکتوریا و دانیه‌ل ڤێستلینگ، لێک نیشانه‌ کراون، میدیاکان پڕ بووون له‌ کۆمێنتار. مێژووناس هه‌رمان لیندکڤیست پێی وایه‌ زه‌وجینی شازاده‌ ڤیکتوریا و دانیه‌ل ڤێستلینگ، هه‌ڵوێستی ده‌ربار تا چه‌ندین ساڵ به‌هێزتر ده‌کات.

کۆمه‌ڵه‌ی کۆماریخوازان که‌ بۆ هه‌ڵوه‌شاندنه‌وه‌ی سیسته‌می پاشایه‌تی له‌ سوید خه‌بات ده‌کات، ڕایگه‌یاند که‌ ڕێک له‌ ڕۆژی نیشانه‌کرانی شازاده‌دا، شه‌ست ئه‌ندامی نوێیان په‌یوه‌ست بوو. روسسانا دینامارجا، ئه‌ندامی په‌رله‌مان له‌ حیزبی چه‌پیش پێی وایه‌ که‌ سه‌رده‌می پاشایه‌تی به‌ سه‌ر چووه‌ و نیشانه‌کرانی ڕۆژی ڕادبردوو، خێرێکی پێوه‌ بوو. ئه‌ویش گه‌رمبوونی گفتوگۆ له‌ سه‌ر هه‌ڵوه‌شانه‌وه‌ی سیسته‌می پاشایه‌تی.


nasser.sina@sr.se

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min Lista".