Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

زیادکردنی پاره‌ی CSN پێشنیازکرا

بڵاو کرایه‌وه‌ tisdag 31 mars 2009 kl 15.49

کۆمیته‌ی کاروباری خوێندن له‌ په‌رله‌مانی سویدا هه‌ندێک  گۆڕانکاری له‌ ڕێساکانی تایبه‌ت به‌ قه‌رزی خوێندن پێشنیازکردوه‌، له‌وانه‌ زیادکردنی ڕیژه‌ی ئه‌و بڕه‌ پاره‌یه‌ی‌ که‌ خوێندکار له‌ نوێنه‌رایه‌تی سه‌ره‌کی پشتگیریی بۆ خوێندن csn بۆ خوێندنی زانکۆ مافی وه‌رگرتنی هه‌یه‌.

- پێشنیازی زیادکردنی ڕێژه‌ی قه‌رزه‌که‌ باشه‌ به‌ڵام که‌مکردنه‌وه‌ی مافی وه‌رگرتنی قه‌رزه‌که‌ بۆ ته‌نها ماوه‌ی چوارساڵ نیگه‌رانکه‌ره‌.

- ئاخر من ئێستا چوارساڵم خوێندوه‌و ساڵێکم خوێندن ماوه‌، گه‌ر به‌وپێشنیازه‌ نوێیه ‌بێ ئیتر مافی قه‌رزوه‌رگرتنم نامێنێت و ده‌بێت پاره‌ له‌ دایک وباوکم وه‌ربگرم بۆ ئه‌و ساڵه‌ خوێندنه‌ی که‌ ماومه‌.

ده‌نگی ناڕه‌زایی یه‌کێک له خوێندکارانی زانکۆیه‌ به‌رامبه‌ر به‌ لێکۆڵینه‌وه‌یه‌ک که‌‌ کۆمیته‌ی کاروباری خوێندن له‌ په‌رله‌مانی سویدا بۆ گۆڕانکاری له‌ قه‌رزی تایبه‌ت به‌ خوێندنی زانکۆ پێشنیازی کردووه‌. هه‌ر ئه‌و خوێندکاره‌ لایه‌نێکی باشی ئه‌م پێشنیازه‌ تێکه‌ڵ به‌ ناڕه‌زاییه‌کی تر ده‌رده‌خات.

- لایه‌نێکی باشی ئه‌م پیشنیازه‌ ئه‌وه‌یه‌ که‌ خوێنکار ناچارده‌بێت ڕێچکه‌یه‌کی  خوێندنی ڕوونتر هه‌ڵده‌بژرێت له‌کاتێکدا ده‌زانێت مافی قه‌رزی خوێندنه‌که‌ی ته‌نها چوارساڵه‌، به‌ڵام خۆ ئه‌م کاره‌ دیسان ڕێگه‌ له‌ خوێندکار ده‌به‌ستێته‌وه‌ خۆی له‌ بواره‌ جیاوازه‌کاندا تاقی بکاته‌وه‌، ئه‌و خوێندکاره‌ ده‌ڵێت ئاخر ئاسان نییه‌ هه‌ر له‌سه‌ره‌تای خوێندنی زانکۆوه‌ بزانیت کامه‌ بابه‌تی خوێندن بواری حه‌زو تواناکانته‌.

جێی باسه‌ ئه‌م ده‌نگانه‌ له‌کاتێکدا به‌رزده‌بنه‌وه‌ که‌ کۆمیته‌ی کاروباری خوێندن له‌ په‌رله‌مانی سویدا هه‌ندێک  گۆڕانکاری له‌ ڕێساکانی تایبه‌ت به‌ قه‌رزی خوێندن پێشنیازکردوه‌ ، له‌وانه‌ زیادکردنی ڕیژه‌ی ئه‌و بڕه‌ پاره‌یه‌یه‌ که‌ خوێنکار له‌ نوێنه‌رایه‌تی سه‌ره‌کی پشتگیریی بۆ خوێندن csn بۆ خوێندنی زانکۆ مافی وه‌رگرتنی هه‌یه‌. به‌پێی پێشنیازه‌که‌ بڕی 400 کرۆن مانگانه‌ زیادبکرێت، به‌مه‌رجێک مانگانه‌ له‌ 9086 کرۆن تێپه‌ڕنه‌کات.

جگه‌ له‌م زیاده‌یه‌ پێشنیازکراوه‌ که‌ له‌مه‌ودوا خوێندکار مافی کارکردنی له‌پاڵ خوێندنه‌که‌یدا هه‌بێت به‌بێ ئه‌وه‌ی ئه‌و بڕه‌پاره‌یه‌ی له‌کار ده‌ستی ده‌که‌وێت کار له‌ ڕێژه‌ی قه‌رزه‌که‌بکات.  

ده‌نگی خوێندکارێکی تری زانکۆیه‌ باس له‌ بێحاڵی خۆی ده‌کات که‌ ئه‌و بڕه‌ پاره‌ی خوێندنه‌ی که‌ وه‌ری ده‌گرێت به‌شی ناکات، به‌تایبه‌ت له‌کاتێکدا ئه‌و خوێندکاره‌ له‌پاڵ خوێندنه‌که‌یدا کار ناکات.

شایه‌نی باسه‌ له‌حاڵی حازردا خوێندکاری زانکۆ بۆیان هه‌یه‌ ته‌نها 100هه‌زار کرۆن له‌پاڵ قه‌رزی خوێندنه‌که‌یاندا له‌ماوه‌ی ساڵێکدا کاربکه‌ن. گه‌ر بێت و خوێندکار له‌و ئاسته‌ زیاتر پاره‌ی ده‌ستبکه‌وێت زیاده‌که‌یان له‌لایه‌ن نوێنه‌رایه‌تی سه‌ره‌کی پشتگیریی بۆ خوێندن csn لێی ده‌سه‌ندرێته‌وه‌. به‌پێی پێشنیازه‌‌ نوێکه‌ی په‌رله‌مان ئاستی ئه‌و بڕه‌ پاره‌یه‌ به‌رزده‌کرێته‌وه‌ بۆ 136هه‌زار کرۆن له‌ماوه‌ی ساڵێکدا.

سه‌باره‌ت به‌و گۆڕانکاریانه‌ی کۆمیته‌ی کاروباری خوێندن له‌ په‌رله‌مان پێشنیازی کردوون، وه‌زیری کاروباری خوێندنی باڵا لارش له‌یۆنبۆری له‌گه‌ڵ هه‌موو خاڵه‌کانی ئه‌و پێشنیازه‌دا نییه‌.

- من بۆ خۆم له‌گه‌ڵ هه‌موو ئه‌و خاڵانه‌دا نیم که‌ پێشنیازکراون. وه‌زیری خوێندنی باڵا لارش له‌یۆنبۆری ده‌ڵێت به‌ڵام هه‌ڵبه‌ت ده‌بێت ئه‌و پێشنیازانه‌ گفتوگۆیان له‌سه‌ربکرێت و له‌لایه‌ن حکوومه‌ته‌وه‌ بدرێنه‌ به‌ر سه‌رنج.

جێی باسه‌ که‌ ئه‌و‌ پێشنیازه‌ی کۆمیته‌ی کاروباری خوێندن بۆ گۆڕانکاری له‌ ڕێساکانی قه‌رزی خوێندن csn ئاشکرای کردوون، چه‌ند خاڵیکی تر له‌خۆی ده‌گرێت له‌وانه‌، کۆمیته‌که‌ داواده‌کات که‌ خزمه‌تگوزاریه‌کانی تایبه‌ت‌ به‌ خوێندکارانی فێرگه‌ی گه‌وره‌ساڵان کۆمڤوکس، هه‌روه‌ها قه‌رزی تایبه‌ت به‌ خوێندن له‌ده‌ره‌وه‌ی ووڵات گرنگییه‌کی تایبه‌تیان پێبدرێت، ئه‌وه‌ش به‌ ئامانجی به‌رگرتن له‌ ڕوودانی هه‌ڵه‌ی نه‌خوازراو، له‌وانه‌ خۆدزینه‌وه‌ له‌ دانه‌وه‌ی قه‌رزه‌که‌ له‌لایه‌ن خوێندکارانه‌وه‌.

به‌رامبه‌ر به‌ و خاڵه‌ی پێشنیازه‌که‌ که‌ داوای کوورتکردنه‌وه‌ی مافی وه‌رگرتنی قه‌رزی خوێندی باڵا له‌ شه‌ش ساڵه‌وه‌ بۆ چوار ساڵ ده‌کات، داواکراوه‌ که‌ ئه‌و خوێندکارانه‌ی 180 خاڵیان خوێندوه‌و بڕوانامه‌یان به‌ده‌ستهێناوه‌ دووساڵ زیاتر مافی قه‌رزوه‌رگرتنیان هه‌بێت، هه‌روه‌ها خوێندکارانی ڕشته‌ی پزیشکی و ئه‌و که‌سانه‌ی بۆ بڕوانامه‌ی ماجستێر ده‌خوێنن 7 ساڵ مافی وه‌رگرتنی قه‌رزیان ده‌بێت.

جگه‌ له‌مانه‌ ئه‌و خوێنکارانه‌ی که‌ که‌ 41 هه‌زار کرۆن زیاتر له‌پاڵ خوێندنه‌که‌یاندا کارده‌که‌ن به‌پێی پێشنیازه‌که‌ ئیتر مافی وه‌رگرتنی یارمه‌تی خانوبه‌ره‌یان نه‌بێت. 

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min lista".