Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

!Glad påsk

بڵاو کرایه‌وه‌ torsdag 9 april 2009 kl 16.38

پۆسک یه‌کێکه‌ له‌ بۆنه‌ گه‌وره‌کان له‌ ئایینی مه‌سیحیدا، جگه‌ له‌ بۆنه‌یه‌کی ئاینی پۆسک بۆته‌ ده‌رفه‌تێک بۆ کۆبونه‌وه‌ی خێزان و سه‌فه‌ر بۆ بینینی که‌سو کار، یان بۆ به‌سه‌ربردنی پشووی پۆسک له‌ کوێستانه‌کانی سه‌ره‌وه‌ی سوید که‌ به‌فر تێیاندا هێشتا باوه‌شی شاخه‌کانی جێنه‌هێشتووه‌. ئه‌مڕۆش له‌ سوید پێنجشه‌ممه‌ی پێش هه‌ینییه‌ درێژه‌یه‌.

زۆربه‌ی خوێندنگاکان له‌ سوید ئه‌م هه‌فته‌یه‌ پشووی پۆسکیان هه‌یه‌، وه‌ک باو له‌م پشووه‌دا ژماره‌ی گه‌شتیاره‌کان ،توریست، بۆ ناوچه‌ کوێستانه‌کانی باشووری سوید زیاد ده‌که‌ن، زۆرینه‌ی ئه‌و گه‌شتیارانه‌ش له‌ ناوچه‌ جیاوازه‌کانی سویده‌وه‌ به‌تایبه‌ت شاره‌ گه‌وره‌کانه‌وه‌ دێن. یه‌کێک له‌و ناوچه‌ کوێستانیانه‌ ڤێمداله‌نه‌ و لۆتتا که‌ هاوڵاتیه‌کی ئه‌و ناوچه‌یه‌یه‌ ده‌ڵێت به‌فرێکی زۆر لای ئێمه‌ باریوه‌و خه‌ڵکێکی بێئه‌ندازه‌ بۆ پۆسکی ئه‌مساڵ و یارییه‌ زستانه‌کان وه‌ک خلیسکێنه‌ لێره‌ن.

له‌ ئاینی مه‌سیحیدا و به‌ زمانی سویدی ئه‌مڕۆ شارتوشداگه (Skärtorsdag)‌، شاره‌ (Skära) له‌ زمانی کۆنی سویدا مانای پاکژییه‌، گوایه‌ له‌ پێنجشه‌مه‌ی پێش پۆسکدا عیسا قاچی په‌یامبه‌ره‌کانی خۆی که‌ دوانزه‌ که‌س بوون پێش خواردنی ئه‌و ژه‌مه‌ی به‌ دواژه‌م ناوده‌برێت، به‌ ئاو پاک کردۆته‌وه‌.

به‌ڵام له‌ چیرۆکه‌ میللییه‌کانی ناو خه‌ڵکیدا و دوور له‌ ئایین گوایا له‌م پێنجشه‌ممه‌یه‌دا پیرێژنه‌ سیحربازه‌کان به‌ لوته‌ درێژو قژه‌بژه‌کانیانه‌وه‌ به‌سه‌ر گسکێکی ده‌سک درێژه‌وه‌ فڕیونه‌ته‌ شوێنێک به‌ناوی بلۆکیولا (Blåkulla) له‌وێ به‌ئاگر خۆیان له‌ چڵک و پیسی پاککردۆته‌وه‌. به‌ڵام ئه‌مه‌ ته‌نها چیرۆکی شارتوشداگ و سیحربازه‌کان نییه‌.

به‌هه‌رحاڵ له‌سه‌ره‌تای سه‌ده‌ی ڕابوردوه‌وه‌ به‌تایبه‌ت له‌ ستۆکهۆلم بووه‌ باو که‌ منداڵان وه‌ک ئه‌و پیرێژنه‌ سیحربازانه‌ی ناو چیرۆکه‌کان خۆیان ده‌گۆڕن و له‌چک ده‌که‌ن و بۆ کۆکردنه‌وه‌ی شیرینی و گودیس به‌ سویدی له‌ ده‌رگای ماڵان ئه‌ده‌ن. له‌گه‌ڵ به‌ره‌و پێش چوونی زه‌مه‌ندا ئه‌م ترادیشونه‌ هه‌ندێک ڕتوشی ناسک و جوانی وه‌رگرتووه‌، وه‌ک ئه‌وه‌ی منداڵان ده‌موچاویان بۆیه‌ ده‌که‌ن و له‌بری ئه‌و نوقوڵه‌ی له‌ تۆی وه‌رده‌گرن وێنه‌ی کێشراوی ده‌ستی خۆیان یان شتی تر له‌گه‌ڵ‌ ده‌ربڕینی گلاد پۆسک (Glad Påsk) واتا پۆسکێکی خۆش یان پۆسکت پیرۆز، ده‌ده‌نه‌ ئه‌و که‌سه‌ی ده‌رگایان لێئه‌کاته‌وه.

سبه‌ینێ هه‌ینییه‌ درێژه‌یه‌ لۆنگفرێداگ  (Långfredag) ئه‌و ڕۆژه‌ی عیساو هاوه‌ڵه‌کانی له‌ خاچ دران هه‌ینییه‌کی دوروودرێژی پڕ له‌ ئازار بوو بۆ عیسا و هاودینه‌کانی. تا ئه‌و یه‌کشه‌ممه‌یه‌ی که‌ به‌ ڕۆژی پۆسک ناوده‌برێت پۆسکداگه‌ن (Påskdagen) ئه‌و ڕۆژه‌ی عیسا هه‌ڵسایه‌وه‌. له‌ کۆندا له‌م ڕۆژانه‌ی نزیک پۆسک و ڕۆژی پۆسکدا خه‌ڵکی به‌ ماته‌مینییه‌ک بۆ رێزلێنانی عیسا ئه‌و ڕۆژانه‌یان به‌سه‌رده‌برد، خه‌ڵکێکی زۆر ڕوویان له‌ کڵێساکان ده‌کرد، به‌ڵام له‌گه‌ڵ کاڵبوونه‌وه‌ی ئاین له‌ ژیانی ڕۆژانه‌ی خه‌ڵکیدا شێوازی پیشوازی و یادکردنه‌وه‌ی ئه‌م بۆنه‌یه‌ش گۆراوه‌. خه‌ڵکێکی که‌متر ده‌چنه‌ کڵێساکان و بۆته‌ بۆنه‌ی کڕین و گۆڕینه‌وه‌ی دیاری به‌تایبه‌ت بۆ منداڵان. جێێ باسه‌ جگه‌ له‌ ڕه‌نگی زه‌رد هێلکه‌و مریشک و په‌ڕی باڵنده‌ بوونه‌ته‌ سیمبۆل له‌م بۆنه‌یه‌دا و په‌نجه‌ره‌ی ماڵ و شوێنه‌ گشتییه‌کانی پێ ده‌ڕازێنرێته‌وه‌.

به‌ڵام دیسان زه‌مه‌ن کاری خۆی کردوه‌و ڕووداو باسه‌کانی مێدیا  بۆنموونه‌ ئه‌مساڵ به‌رزکردنه‌وه‌ی پرسه‌ ڕه‌وشتیه‌کان وه‌ک ڕووداوی به‌ زیندووی په‌ڕکردنی قاز و مراوی خه‌ڵکی له‌ کڕینی په‌ڕ بۆ ڕازاندنه‌وه‌ی ئه‌م بۆنه‌یه‌ کشانده‌وه‌.  ئه‌مه‌ جگه‌ له‌وه‌ی که‌ دۆزینه‌وه‌ی پارچه‌ شووشه‌ له‌ مریشکی بازاڕه‌کاندا بۆشایی له‌ سفره‌ی ئه‌م جاره‌ی پۆسکی خه‌ڵکیدا جێهێشتووه‌، به‌ڵام ڕه‌نگه‌ فه‌لافل و خواردنه‌ ڕۆژهه‌ڵاتییه‌کان ئه‌و بۆشاییه‌ پڕبکه‌نه‌وه‌.

خاوه‌نی یه‌کێک له‌ بازاڕه‌کانی خواردن له‌ ستۆکهۆلم ده‌ڵێت به‌ڵێ ڕه‌نگه‌ فه‌لافل و خواردنه‌ سه‌وزه‌ییه‌کان شان به‌شانی ماسی ناسراو به‌ سیل که‌ یه‌کێکه‌ له‌ خواردنه‌ سویدیه‌کان و به‌ بۆنه‌ سه‌یره‌که‌ی ناسراوه‌ له‌گه‌ڵ  په‌تاته‌ بچنه‌ سفره‌و خوانی  پۆسکه‌وه.

هه‌رچۆنێک بێت مریشک و په‌ڕیش نه‌بێت پۆسک هه‌ر ده‌گوزه‌رێت و به‌ پێێ زانیاری که‌شناسان بێت سبه‌ینێ هه‌تاوێکی پانزه‌ پله‌ چاوه‌ڕێمانه‌.

پۆسک له‌ ئێوه‌ش پیرۆز!

Glad påsk!

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min lista".