Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

من: مه‌رزه‌ جه‌وانمه‌رد

بڵاو کرایه‌وه‌ fredag 10 juli 2009 kl 13.38

وه‌ك تاقه‌ گوڵدانه‌ سپیێ چكۆڵه‌كه‌ی

به‌رپه‌نجه‌ره‌ گه‌وره‌كه‌ی

به‌رامبه‌ر به‌ جه‌نگه‌ڵه‌ سه‌وزه‌كه‌ی

ماڵه‌ تۆم

هه‌رچه‌ند تێر ئاوتر بم

دڕوو باریكه‌ تیژه‌كانم زووتر ده‌بن

به‌ گووڵه‌ سووره‌ ورده‌كان

که‌ پێت جوانه‌

من ناوم مه‌رزه‌ جه‌وانمه‌رد له‌ 23 ئوکتوبری 1957 له‌ شاری مهاباد له‌ گه‌ره‌ک ئه‌رمه‌نیان له‌ دایک بووم. بابم شێخ ئاخاییه‌ و دایکم کاکاخایه‌، باپیرم له‌ دایکه‌وه‌ ئاخرین دارۆخه‌ی مهاباد بووه‌ و،بابپیری باپیریشم یه‌که‌م دارۆغه‌ شاری مهاباد بووه‌. شه‌شوومین منداڵی ماڵێم له هه‌وتان.  

‌  

  

-         9 ساڵانه‌ بوو که‌ بابم مرد، به‌ داخه‌وه‌ زۆرتر بابم به‌ زه‌لیلی وه‌بیردێ‌ تاکوو به‌ له‌ش ساخی. بابم که‌سێکی باسواد، ئه‌دیب، خه‌تخۆش و کوردپه‌روه‌ر بوو. بابم  له‌ جێژنی سه‌ربه‌خۆیی  کوردستان له‌ سندوس، شێعرێک له‌ شێعره‌کانی خۆی خوێندبووه‌ که،‌ له‌ کوردستانی ژماره‌35 ساڵی 1946دا بڵاوکراوه‌ته‌وه‌.

-         نزیک 18 ساڵم بوو که‌ دایکیشم مرد. دایکم هه‌رچه‌ند سوادی خوێندن و نوسینی نه‌بوو، به‌ڵام به‌ پێی ئه‌وه‌ی بابم هه‌رچی ده‌ێخوێندنه‌وه‌ بۆ ئه‌ویشی ده‌گێراوه‌ و خۆشی زۆر گوێ له‌ ڕادێو ڕاده‌گرت، ژنێکی ڕوون و به‌ ئاگا بوو. دایکم منداڵێ نه‌غده‌ی بوو و، له‌ ورمێش ژیابوو. به‌شی خۆی فارسی، عبری و ئه‌رمه‌نی ده‌زانی و، زمانی تورکی ئازه‌بایجانیشی به‌ باشی ده‌زانی. دایکم یه‌کێک له‌ به‌رگدرووکانی به‌ ناوبانگی جلی کوردی ژنان بوو له‌ شاری مه‌هاباد دا. شه‌وانه‌ تاکوو دره‌نگایه‌ک دروومانی ده‌کرد و له‌ پشت مکینه‌که‌ی له‌به‌رخۆیه‌وه‌ گۆرانی ده‌گووت و فرمێسکه‌کانی ده‌هاتنه‌خوارێ، هه‌رچه‌ند ژنێکی دم به‌ پێکه‌نین بوو. ئێستاش باوه‌ڕناکه‌م که‌س بتوانێ له‌ دایکم ده‌نگی خۆشتر بێ و بتوانێ گۆڕانی "کاکی جوتیار" وه‌ک دایکم خۆش بڵێته‌وه‌. ئێستاش نه‌مزانی دایکم بۆ ئه‌و فرمێسکانه‌ی هه‌ڵده‌وه‌راند. ئێمه‌ هیچ که‌موکوڕی ئابورییمان نه‌بوو، به‌ڵام دایکم ده‌یگووت: "پێمخۆشه‌ بۆ خۆم ده‌ست له‌ گیرفانی خۆم بنێم". وه‌ک شتێک سه‌ربه‌خۆیی ئابووری بۆ ژن به‌ گرینگ داده‌نا.   

-         هه‌ربۆیه‌ زۆر جاران که‌ کار و قسه‌کانی دایکمم وه‌بیردێته‌وه‌ و، هه‌ڵیده‌سه‌نگێنم ده‌بینم ڕووحی قسه‌کانی بۆنی تیۆری فێمینیستان لێدێ‌ بۆ وێنه ده‌ێگووت؛‌ ژن نابێ زه‌لاله‌تی قه‌بووڵ بکا. ژن ده‌بێ بۆ یه‌کتر خوشکی دنیا و قیامه‌تان بن. ژن نابێ باسی ژن بکا...

-         زۆر باشم له‌بیره‌ کاتێک باجه‌ ئه‌شره‌فی جیرانمان هات و گه‌ڵایی مێرده‌که‌ی له‌ لای دایکم کرد، که‌ چۆن له‌گه‌ڵی خراپه و هه‌ڕه‌شه‌ی ژن به‌سه‌رهێنانی لێده‌کا، پێگووت: "ئه‌و جاره‌یان ئه‌گه‌ر هاتوو په‌ڵپوو و، بیانووی پێگرتی پێبڵی؛ به‌ قازانجی هه‌ردووکمان پێکه‌وه‌ پێڕاکێشین و، پێکبێن. ئه‌گه‌ر هاتوو هه‌ر ملی نه‌دا، منه‌تت به‌ که‌س نه‌بێ و پێبڵی، گه‌ر بۆ تووه‌ هه‌یه‌ لێچک به‌سه‌ر بۆ منیش هه‌یه‌ کڵاو به‌سه‌ر. دوو ... له‌ ماڵه‌که‌ی بکه ‌و، بڕۆ ده‌رێ. "

-         هه‌روه‌ها هه‌روه‌خت پوورم ڕه‌خنه‌ی لێده‌گرت که‌ بۆ ئه‌وه‌ کچانه‌ت ئاوا به‌ کێفی خۆیان له‌به‌ر ده‌که‌ن، دێن و ده‌ڕۆێن له‌ وه‌ڵامدا ده‌ێگووت: "تا له‌ ماڵه‌منن با له‌ ئازادیدا بژین. خودا ده‌زانێ دوو ڕۆژی دیکه‌ تووشی چ سه‌گ و سه‌گبابێک ده‌بن و چۆن ڕووحیان له‌ قه‌فه‌س ده‌کا".

-         دایکم ناڕا‌سته‌وخۆی فێری؛ ڕاستی، پاکی، بوێری، سه‌ربه‌خۆیی، بێ منه‌تی، کارکردن، خۆماندووکردن و فێربوونی کردم.

-         ده‌توانم بڵێم سه‌رده‌می منداڵیم سه‌رده‌مێکی تێکه‌ڵاوێک له‌ تاڵی و شیرینی بوو.

-         هه‌موو گه‌وره‌کانی گه‌ڕه‌کێی به‌ شێوه‌یه‌ک منداڵی گه‌ڕه‌کێیان به‌ منداڵی خۆیان داده‌نا. به‌یانانه‌ ده‌رگا‌کان زوو ده‌کرانه‌وه‌ و، شه‌وانه‌ ده‌رنگایه‌ک داده‌خران. ژیان له‌سه‌ر خۆشی و ناخۆشی به‌کۆ، دڵنه‌وازی و گه‌ردن ئازایی یه‌کتر ده‌سووڕا. کاتێک یه‌کێک له‌ کچه‌کانی بنه‌ماڵه‌یه‌کی ده‌سته‌نگی گه‌ڕه‌ک که‌ له‌ ماڵێکی ناکورد کارداری ده‌کرد تووشی ده‌ستدرێژی جنسی ببووه ‌و سکی پڕببوو. نه ‌که‌س کچه‌ی کووشت و نه‌ منداڵه‌که‌ی، که‌سیش به‌ردی له‌ ماڵیان نه‌گرت و، به‌رته‌وس و توانجی نه‌دان. منداڵه‌که‌ هه‌روه‌ک منداڵه‌کانی دیکه‌ی گه‌ره‌کێی چاوی لێده‌کرا.

-         ئێمه‌ی منداڵیشی شه‌ریکی خۆشی و ناخۆشییه‌کانی گه‌وره‌کان ‌بوون. ئه‌و ڕۆژه‌ی که‌ قه‌رار بوو باجه‌ دوولی که‌ یه‌کێک له‌ کچه‌کانی گه‌ره‌ک بوو، به‌ بووک بچێی ئێمه‌ هه‌موو له‌ به‌یانی تاکوو ئه‌و وه‌خته‌ی هاتن و بووکیان برد به‌ بنی ئافتاوه‌ی له‌ کووچه‌ی بۆی هه‌ڵپه‌ڕین.

-         ئه‌وه‌نده‌ به‌سه‌رهاتی باجه‌ گووڵێم بیستبوو به‌ر له‌وه‌ی خۆم ئه‌وینداربم، زانیم ئه‌وینداری شتێکی‌ زۆر به‌ ئازاره. ‌ده‌یانگووت؛ باجه‌ گووڵێ تازه‌ ده‌گه‌یشتێ که‌ ئه‌وینداری کاک "محه‌مه‌د"ی ببوو، به‌ڵام له‌به‌ر ئه‌وه‌یکه‌ کاک محه‌مه‌د شایه‌ر بووه،‌ نه‌یان دا‌بوویه‌. هه‌رچه‌ند باجه‌ گووڵێ پیر ببوو‌، بێوه‌ژن بوو‌ و چه‌ند مێردیشی کرد بوو، هه‌روه‌ها کاک مه‌حه‌مه‌د چه‌ند ژنی هێنابوو، به‌ڵام ئه‌و دوویه‌ هه‌ر یه‌کتریان خۆشه‌ده‌ویست.

-         منیش زۆر ده‌ترسام عاشق بم و دایکم به‌ ئه‌و که‌سه‌م نه‌دا که‌ خۆشم ده‌وێ و، به‌ ده‌ردی باجه‌ گوڵێ بچم. بۆیه‌ ئاخری ڕۆژێک له‌ دایکم پرسی؛ دایه‌ ئه‌گه‌ر ئه‌من مێردێ بکه‌م ده‌بێ به‌ قسه‌ی تۆ مێردێ بکه‌م یان به‌ قسه‌ی خۆم؟ دایکم ته‌ماشایه‌کی کردم و گووتی: "دڵت به‌ بانگده‌ری گاڕانێشه‌وه‌ بێ، ناڵێم نا. ئه‌ما ده‌بێ بێته‌ ماڵی و خوازبێنی تۆم لێبکا". خودا چاکه‌ بۆ دایکم بکا ئه‌و خه‌مه‌شی له‌کۆڵ کردمه‌وه‌ هه‌رچه‌ند نه‌مزانی بانگده‌ری گاڕانێ کێیه‌.

-         به‌ بۆنه‌ی ڕابردووی بابم و، هاوگه‌ره‌کی له‌ ته‌ک ماڵی شه‌هید مووعینییه‌کان، شه‌هید عه‌وڵای ئیسحاقی و مامه‌ غه‌نی  پرسی سیاسی و کوردایه‌تی بۆ ئێمه‌ منداڵانی گه‌ره‌ك شتێکی نامۆ نه‌بوو.  کورته‌ چیرۆکی "ئاسمان بۆ ناگرێ"، به‌ یادی کاک سولێمان و کورته‌ چیرۆکی "ساڵی تازه‌یه‌ نه‌ورۆزه‌"، به‌ یادی شه‌‌هید سه‌ید عومه‌ر، به‌رهه‌می بیره‌وه‌ییه‌کانی ئه‌و سه‌رده‌مه‌ن.

-         ساڵی 1975 دوای ته‌واوکردنی دوو ساڵ ده‌وره‌ی ماموستایی له‌ شاری مهاباد، له‌ دێ داره‌له‌ک ده‌ستم به‌ کاریی مامۆستایی کرد. له‌ ژێر کاتێکه‌ری سیسته‌می ناجایز و غه‌ڵه‌تی فێرکردن و فێربووندا و، دابی ناشیرینی زۆربه‌ی زۆری مامۆستایان شوولک به‌ده‌ستگرتن تووشی منیش هات. به‌خته‌وه‌رانه‌ زۆرزوو وه‌لام نا، به‌ڵام وه‌ک بیره‌ورێکی ناخۆشی هه‌شت ساڵه‌ی ده‌ورانی مامۆستاییم هه‌ر له‌ یادمدا ماوه‌ته‌وه‌.

-         ‌هه‌ر له‌ هه‌مان ساڵیشدا دیپڵۆمی ئه‌ده‌بیم وه‌رگرت. ئه‌ده‌بییات ئه‌و خۆشه‌ویسته‌ی که‌ قه‌ت به‌دڵی خۆم پێیڕانه‌گه‌یشتووم.

له‌سه‌رده‌می تازه‌لاوییدا بیری سیاسیم ڕۆژ به‌ ڕۆژ له‌ زۆری ده‌دا، ته‌نانه‌ت بریاری ئه‌وه‌شم دابوو ته‌نیا مێرد به‌ که‌سێک بکه‌م که‌ بیر و بۆچوونی سیاسی هه‌بێ.

-         جوانه‌مه‌رگبوونی "برایم"ی برا‌م له‌ ته‌مه‌نی هه‌فه‌ده‌ سالێدا، چه‌ند مانگ به‌ر له‌شوڕشی ئێران زه‌برێکی جه‌رگبڕبوو، که‌ قه‌ت نه‌ خۆی و نه‌ ئه‌و شێعره‌ی که‌ له‌سه‌ر گۆره‌که‌ی نووسراوه‌ فه‌رامۆش ده‌که‌م؛

-         ئه‌ی دایکه‌ جگه‌ر سۆزه‌ که‌ نه‌دبوو خه‌بری من

-         له‌م چه‌رخه‌ که‌ڵه‌کبازه‌ چ هاتووه‌ به‌سه‌ری من

-         من خه‌نچه‌ گووڵێ بووم له‌ گووڵزاری ئه‌ویندا

-         مـه‌رگ هات و سووتاندی باڵ و په‌ڕی من   ‌

له‌ ساڵێ 1978ته‌قریبه‌ن به‌ شێوه‌یه‌کی ڕێکوپێک چالاکی سیاسیم ده‌ستپێکرد. به‌ بۆنه‌ی مه‌رگی کاک "عه‌زیز یوسفی" و له‌ ڕێوڕه‌سمی سێ ڕۆژه‌ی ئه‌و به‌ڕێزه‌دا له‌ گۆڕستانی مه‌هاباد، شێعرێکی خۆمم خوێنده‌وه‌. ئه‌و ڕێوره‌سمه‌ یه‌که‌م  خۆپێشاندانی شاری دژ به‌ حه‌مه‌ڕه‌زاشای لێکه‌وته‌وه‌. هه‌روه‌ها له‌گه‌ڵ دوو ده‌سته‌خوشکم ده‌ستمان به‌ نووسین و بڵاوکردنه‌وه‌ی ئیعلامییه‌ کرد، له‌ ژێرناوی "خۆشکه‌ له‌یلا – هواداران حیزب دیمکراتی کوردستان".

-         به‌ر له‌ ئاشکرابوونی حیزبی دێموکراتی کوردستان بووم به‌ ئه‌ندامی حیزب. له‌ به‌شداریکردن له‌  خۆپێشاندانه‌کان ڕابگره‌، تاکوو په‌یام نووسین و په‌یام خوێندنه‌وه‌، یارمه‌تی کۆکردنه‌وه‌، پێکهێنانی  ته‌شکیلاتی یه‌کێتی ژنان به‌ بارگا، به‌ گۆڤار، به‌ ئه‌ندامگیری، سازدانی کۆڕ و سیمینار و، یادکردنه‌وه‌ی ڕۆژی جیهانی ژن بۆ یه‌که‌م جار دوای ڕووخانی کۆماری کوردستان هه‌موو به‌شێک له‌و کارانه‌ بوون که‌ کردوومه‌. زۆری پێنه‌چوو که‌ پشتم له‌ سیاسه‌ت کرد، لێره‌دا‌ جێگای ئه‌وه‌ی نییه‌ که‌ باسی هۆی هاتنه‌ده‌رم له‌ حیزبدا بکه‌م ته‌نیا ئه‌وه‌ی ده‌ڵێم نه‌گه‌یشتن به‌ ئاوات هه‌میشه‌ ئازاری خۆی هه‌یه. ‌منێک که‌ هه‌ر له‌ منداڵییه‌وه‌ به‌ ئاوات بووم ڕۆژێک له‌ ڕۆژان ببم به‌ "جه‌میله‌ بوپاشا"یه‌ک بۆ وڵاتی خۆم، چووم له‌ گۆشه‌ی ماڵێ بۆی دانیشتم.

-         له‌ سه‌ره‌تاکانی 1979دا ژیانی هاوسه‌ریم له‌ ته‌ک "قاسم ڕه‌یانی"، پێکهێنا. له‌م پێوه‌ندییه‌دا له‌ کورته‌ چێرۆکی "بۆخۆم بووم بۆخۆم"، په‌رده‌م له‌سه‌ر هه‌تیوی فڕێداوه‌. هه‌ڵبه‌ت ئاکامی ئه‌م پێوه‌ندییه‌ ته‌نیا کورته‌ چیرۆکی "بۆخۆم بووم بۆخۆم"، نییه‌ به‌ڵکوو ‌سێ منداڵیشه‌، ئاڵا، گه‌ڵا، ڕه‌وا. گه‌ر بێتوو له‌ ژیانی ژنومێردایه‌تیدا واتا له‌ ژیانی ئینساندا خۆشه‌ویستی نه‌بێ، هیچ گرفتێک چاره‌ی ناکرێ. گه‌ر بێتوو بمرم و زیندوو بمه‌وه‌ هه‌ر دیسان مێرد به "قاسم"‌ی ده‌که‌مه‌وه‌. 

  له‌ کۆتایی ساڵی 1986 دوای چه‌ند مانگ ده‌ربه‌ده‌ری‌ که‌وتمه‌ وڵاتی سوئید. سوئێدێکی ساردوسڕ، تاریک و بێده‌نگ و، نامۆ‌ به‌ڵام دڵئاوه‌ڵه‌ ومێهره‌بان. ئه‌و وه‌ڵاته‌‌ بوو به‌ په‌ناگا بۆ من و منداڵه‌کانم. هه‌رچه‌ند تێکه‌ڵاویی ژیانم له‌ ژیانی گه‌له‌که‌م جیابوونه‌وه‌ی نییه و‌ نه‌بووه‌، به‌ڵام ده‌توانم بڵێم به‌شێوه‌یه‌ک که‌وتمه‌ نێو ئارامشێکی ره‌ژه‌یی و، ئێش و ئازاره‌کان کۆنی و نۆی بۆم بوو به‌‌ وه‌زه‌یه‌کی ئه‌رێنی بۆ ده‌ستپێکردنی‌ ژیانێکی تازه.

-         له‌ ژیاندا ته‌نیا به‌خیلی به‌ ئه‌و که‌سانه‌ ده‌به‌م که‌ له‌ قه‌دیمدا توانیوایانه‌ به‌ نانی سکی جووتێک پێلاو و ده‌سته ‌لیباسێک ژیان به‌سه‌ربه‌رن و، ته‌واوی ته‌مه‌نیان ته‌رخانی ویست و زه‌وقی خۆیان کردووه‌. هه‌رچه‌ند تاکوو ئه‌و جێگایه‌ی له‌ توانام دابووه‌ هه‌ولمداوه‌ ئاخه‌کانم بنێژم. به‌ڵام ده‌ردی ژن بوون و کوردبوون زۆر ئاخی له‌ ناخمدا قه‌تیس ڕاگرتووه‌‌ و، تاکوو‌ ئێستاکه‌ نه‌متوانیوه‌‌ پڕ به ‌دڵی خۆم پییانڕابگه‌م.

-         دوای دابڕانێکی دوور و درێژ له‌ نووسین له‌ساڵی 1999دا به‌ به‌رده‌وامی ده‌ستم داوه‌ته‌وه‌ قه‌ڵه‌م.  تاکوو ئێستا حیسابم له‌ ده‌ست دانییه‌ چه‌ند وتاری کورت و درێژم نووسێوه‌ و، وه‌رگێراوه‌ته‌وه‌. نزیکه‌ی 18کورته‌چیڕۆک و، چه‌ند په‌خشانم نووسیوه، جار به‌جاریشی شووباره‌ شێعر ده‌ر‌که‌م پێده‌گرێ‌. کتێبی "داستانی دوو شاران" چارلز دیکێنز‌ و،  کتێبی "پرسی ژێنده‌ر"،م له‌ سوئێدییه‌وه‌ وه‌رگێراوه‌ته‌وه سه‌ر زمانی کوردی. هیچ  کتێبی چاپکراوم نییه‌.

-         کاتێک ڕووناکبیرانی قه‌لم زێرین و پله‌ وپایه‌ به‌رزمان، به‌ سه‌روسه‌کوتی ژنانی نووسه‌ر و نووسراوه‌کانیان دا‌ده‌ده‌ن و، گلایی و  گازه‌نده‌ی ئه‌وه‌ی ده‌که‌ن؛ که‌ به‌رهه‌می ژنانی نووسه‌ری ئێمه‌ ناگه‌نه‌وه‌ تۆزی ژنانی نووسه‌ری جیهان. واباشتره‌ هۆیه‌که‌شی بزانن.

-         له‌بیرمه‌ کوڕه‌شه‌ڕانییه‌کانی گه‌ڕه‌که‌کانی شار شه‌ڕه‌گه‌ره‌کیان ده‌کرد و، هه‌رکه‌س به‌ کووچه‌دا تێپه‌ڕیبایه‌ ده‌بوایه گومرکی دابا یان، نه‌ده‌بوایه‌ له‌ کووچه‌ ڕه‌دبێ. ئیستاش که‌ له‌ سایه‌ی سه‌ری خودای مه‌زن به‌گشتی حیزبه‌ کوردییه‌کان هه‌رکامه‌ی به‌شی خۆیان ده‌موده‌زگا و بڵیندگۆیه‌کیان هه‌یه‌. هه‌ر شاعیر و نووسه‌ر و هونه‌رمه‌ند و به‌هره‌مه‌ندێ بیهه‌وێ به‌رهه‌می خۆی به‌ شێوه‌یه‌ک به‌ خه‌ڵکه‌که‌ی بگه‌ینێ ده‌بێ گومرکی خۆی به‌ یه‌کیان بدا، واتا ده‌بێ ته‌ئیدیان بکا تاکوو ته‌عیدی بکه‌نه‌وه‌. ده‌نا بوونی جایز نییه‌ و که‌س کای به‌ کلاویان ناپێوێ. به‌ڵام کۆڕه‌شه‌ڕانییه‌کان قه‌ت به‌ هیچ شێوه‌یه‌ک دزیان نه‌ده‌کرد. ده‌زگای چاپه‌مه‌نی موکریان له‌ گۆڤارێ تۆژینه‌وه‌دا‌ له‌ ژماره‌ 11 مایسی 2008 وتارێکی منیان بڵاوکردووه‌ته‌وه‌ به‌ ناوی "له‌ش فرۆشی". به‌ر له‌ هه‌مووشتێک ئه‌وان‌ هاتوون ناوی من واتا "مه‌رزه‌ جه‌وانمه‌رد"یان له‌ سه‌ر وه‌ڵابردووه‌ و، دوایی هاتوون ناوی وتاره‌که‌ که‌ من به‌ "خۆفرۆشی" ناساندوومه‌، کرددویانه‌ته‌‌ "له‌ش فرۆشی"!

-         ئه‌م تاقمانه‌‌ که‌ به‌ وته‌ی خۆیان ڕێبه‌ری بیروباوه‌ڕی پێشکه‌وتووی کۆمه‌ڵایه‌تین، پارێزه‌ری مافی مرۆڤن و، ڕوونکه‌ره‌وه‌ی گه‌لن، چۆن ئاوائیزن به‌ خۆیانده‌ده‌ن ماندووبوون و زه‌حمه‌تی که‌سی تر بدزن. ته‌نانه‌ت به‌ حورمه‌تی ناوی گۆڤاره‌که‌ نه‌ده‌بوا ئاکاری ئاوا ڕه‌چاو بکه‌ن.

هه‌ڕچه‌ند من چه‌ند جارێک ناره‌زایه‌تی خۆم به‌ گویان گه‌یاندووه‌، به‌ڵام ئه‌وان به‌ که‌ڵه‌گایه‌تی هیچ وڵامێکیان نه‌داومه‌ته‌وه‌.

به‌ڵام من تاک تاکی خه‌ڵکی خۆم خۆشده‌وێ و، ئاواتم گه‌شه‌کردن و سه‌رکه‌وتنیانه‌.  هه‌ربۆیه‌ ده‌ڵێم:  

نیشتمانی من

نه‌ باشوره‌

نه‌ باكوره‌

نه‌ ڕۆژهه‌ڵاته‌

نه‌ ڕۆژئاوا

نیشمانی من كوردستانه‌

كوردستانی  من

گه‌وره‌ترین هه‌تاوه‌

كه ‌چل میلێۆن ئه‌ستێره‌ ده‌وره‌ی داوه‌

مه‌رزه‌ جه‌وانمه‌رد 2009-06-27


بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min lista".