Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

بریا، نووسینی مه‌رزه‌ جه‌وانمه‌رد

بڵاو کرایه‌وه‌ fredag 10 juli 2009 kl 13.46

دایكم و پورم سه‌ریان لێشیواندبووم، دایكم ده‌یگووت:

__- له‌ پیاو قه‌له‌نده‌رتر و بێده‌سه‌ڵاتتر خودا خه‌لقی نه‌كردووه‌، له‌ تولحی به‌یانی له‌گه‌ڵ مه‌لابانگدانێ، هه‌تاكوو بانگی شه‌وان، هه‌روه‌ك داروهه‌لووك له‌ سه‌ر پێیان هه‌ڵده‌سورێ. بۆ پاروونانێك ده‌ست له‌ زاری سه‌د سه‌گ و گورگان ده‌نێ. كه‌م یان زۆر، هه‌رچی خودا بیدا، ماندوو و هیلاك دێته‌وه‌ ماڵ و چاو له‌ ده‌ستی كه‌ره‌می ژن داده‌نیشێ. ژنیش خۆی و ئیمانی خۆی چۆنی له‌گه‌ڵ بدوێ و چی له‌ پێشدانێ.

هه‌ڵوێستی پورم سه‌باره‌ت به‌ پیاو به‌ پێچه‌وانه‌ی بیروبۆچونی دایكم بوو. پورم ده‌یگووت:

-_ڕه‌بی هه‌ر به‌كه‌م بن! خوێنت له‌گه‌ڵ خوێنیان تێكه‌ڵ بێ، حه‌فتا و دوو كوڕت لێیان بێ و حه‌فتا و دوو میلله‌تیشان بۆ پێك بێنی، هه‌ر پێێ نازانن. داشامه‌جیدیان بۆ له‌سه‌ر خه‌زایی دانێێ، پێیان هیچه‌! بۆخۆشیان ته‌نیا یه‌ک شت ده‌زانن، هه‌ر ئه‌وه‌نده‌ی ساحێبی دوو قرانه‌ پووڵ بوون، ئاویان ده‌گونان ده‌گه‌ڕێ، نه‌ قه‌ت دیتوویانی و نه‌قه‌ت ده‌تناسن. له‌ سایه‌ی شه‌رع و عورف دا ده‌سه‌ڵاتی عه‌رز و قوورشیان له‌ ده‌ست دایه‌. دنیا به‌ كه‌یفی خۆیانه‌. ڕۆڵه‌! پیاو دوژمنی سه‌ر و دۆستی قونی ژنه‌...

دایكم لێێ وه‌ده‌نگ ده‌هات و ده‌یگووت:

_خوشكێ، ئه‌وه‌ ده‌ڵێی چی؟ مێرد چارشێوی سه‌ری ژنه‌، دوژمن كوێڕكه‌ره‌یه‌...

پورم ئه‌وه‌نده‌ی تر به‌ تووره‌یی و پێش ئه‌وه‌یكه‌ قسه‌كانی دایكم ته‌واو بێ، وه‌ده‌نگ ده‌هات و به‌دڵه‌وه‌ ده‌یگووت:

- تكاكارم له‌ خوای ته‌باره‌ك و ته‌عالا، ئه‌و چارشێوه‌ت با بیبا! دوایی ڕووی له‌ من ده‌كرد و ده‌گووت:

- ڕۆڵه‌! با كورت و كرمانجی پێت بڵێم، پیاو به‌ غه‌ڵه‌ت خولقاون، ده‌نا چۆن ده‌بێ كلكیان له‌ پێشه‌وه‌ بێ! هه‌ر ژنێكی پشتیان پێ ببه‌ستێ پشتی ده‌شكێ.

هه‌رچه‌ند دایكم خوشكی گه‌وره‌ بوو، به‌ڵام ئه‌وه‌ی ڕاست بێ به‌ پوورم نه‌ده‌وێرا و له‌ لای ئه‌و زۆری له‌سه‌ر نه‌ده‌ڕوێشت. به‌ڵام به‌ دزی پورم ته‌واو هه‌وڵی خوی ده‌دا كه‌ من وه‌دوای خه‌تی پورم نه‌كه‌وم و هه‌ر بۆیه‌ به‌ تكا و ڕه‌جا داوای لێده‌كردم و ده‌یگووت:

- ڕۆڵه‌ گۆی بۆ قسه‌ی خوشكم ڕامه‌گره‌. نه‌كه‌ی به‌ قسه‌ی وه‌ی بكه‌ی و په‌كی خۆت بخه‌ی! چۆن ده‌رزی بێ كون ده‌مێنێته‌وه‌؟ ئه‌وه‌ به‌ دوو قرانه‌ پووڵی گیرفانی غه‌ره‌ بووه‌. تۆ ئه‌وه‌ی ناناسی، ئه‌سته‌غفیره‌ڵا به‌ سیڕاته‌لموسته‌قیمی ده‌ڵێ، "خواره‌"!!

له‌به‌ر ئه‌وه‌ كه‌ من ئازادیخواز بووم پشتیوانی كردن له‌ هه‌ژاران و ڕزگار كردنیان ڕێگا و ئاواتی من بوو. سه‌رباقی هه‌موو شتێك من كچی دایكم بووم و دایكم ده‌یویست ئه‌من له‌ سه‌ر پنچكی وی شین بم. هه‌روه‌ها من به‌ چاوی خۆم ده‌مدیت چۆن پیاوه‌كانمان له‌ ماڵ به‌ده‌ست ژنه‌كانیان به‌ هه‌زار و یه‌ك شێوه‌ ده‌چه‌وسانه‌وه‌، له‌ ده‌ره‌وه‌ی ماڵێش ئه‌و پیاوه‌ چاره‌ڕه‌شانه‌مان بگره‌ له‌ بنكه‌ ده‌وڵه‌تییه‌كان و ته‌نانه‌ت له‌ كوچه‌ و كۆڵانانیش ملكه‌جی مه‌ئمووره‌كانی ده‌وڵه‌تی بوون و بێ حورمه‌تیان پێده‌كرا. له‌ هیچ شوێنێك نه‌یانده‌توانی پڕ به‌ پێستی خۆیان بجووڵێنه‌وه‌، له‌ ماڵێ له‌ ترسی ژنیان و له‌ ده‌ره‌وه‌ش له‌ ترسی كاربه‌ده‌ستان! به‌ڵام من له‌وه‌ تێنه‌ده‌گه‌یشتم ئاخۆ، زووڵم و زووری دوژمنی ده‌ره‌وه‌ یان توند و تیژی و ناوچاوان گرژی ژن له‌ ماڵه‌وه‌، ئه‌م پیاوانه‌ی ئاوا بێده‌سه‌ڵات كردووه.

ئه‌وه‌یكه‌ جێی گومان نه‌بوو، ئه‌وه‌ بوو كه‌ ئه‌وان چاوه‌ڕوانی كه‌ره‌می ده‌ستی ژن و دوژمن بوون و هێچكام له‌م دوانه‌ ڕووحمیان به‌م پیاوه‌ داماوانه‌ی كورد دانه‌ده‌هات. هه‌ربۆیه‌ ڕوون كردنه‌وه‌ و پشتیوانی لێكردنیان گه‌لێك پێویست بوو، تاکوو بتوانن مافی خۆیان بستێنن. هه‌روه‌ها بۆ له‌ ناوبردنی ئه‌م كوێله‌تییه‌ شورشێك پێویست بوو. منی تازه‌ لاوی ئازادیخواز، له‌گه‌ڵ خۆم شه‌رتم كرد تا ڕووحم له‌ سه‌ر یه‌خه‌ی كراسم بێ، بۆ مافی خوراوی ته‌واوی پیاوانی جیهان به‌تایبه‌ت پیاوانی كورد كه‌ دوو هێنده‌ی پیاوی گه‌ڵانی تر ده‌چه‌وسێنه‌وه‌، تێبكۆشم.

به‌ ته‌واوی دژی تێۆری و ئه‌زمونه‌كانی پورم سه‌باره‌ت به‌ پیاو ڕاوه‌ستابووم. له‌وه‌یكه‌ پورم ئه‌و نازه‌نینانه‌ی ئاوا به‌ "ده‌عبایه‌كی بێ ڕه‌زا" داده‌نا زۆری پێ تێكده‌چووم. ڕۆژ به‌ ڕۆژ زۆرتر ده‌چوومه‌ به‌حری ڕزگار كردنی ئه‌و چینه‌ مه‌زلوومه‌، هه‌تا وای لێهات سوێندم خوارد، ده‌بێ په‌تكی قه‌ناره‌ لێم ببێته‌ ملوانكه‌ بۆ ئه‌م ڕێگایه‌. كاتێك وه‌بیرم  ده‌هاته‌وه‌، له‌ فلاح و جوتیار ڕا بگره‌ تا ره‌ئیس و مه‌رئوس چۆن هه‌ڵچزاون و چاوترسێن كراون، كووڵی گریانم هه‌ڵده‌ستا و فرمێسكم ده‌هاتنه‌ خوارێ.

ماڵه‌كه‌مان له‌سه‌ر جاده‌ بوو، هه‌ر بۆیه‌ هه‌ركه‌س ڕێێ لێ هه‌ڵه‌بووبایه‌، یان ئه‌و شوێنه‌ی كه‌ لێی ده‌گه‌ڕا نه‌دیتبایه‌وه‌، له‌ ده‌رگای ئێمه‌ی ده‌دا و پرسیاری ده‌كرد، "ماڵی فڵانی له‌ كۆیه‌؟" یان "فڵان جێگا له‌ كۆییه‌؟".

ڕۆژێك دیسان له‌ ده‌رگایان دا، كه‌ چووم ده‌رگام كرده‌وه‌، كوڕه‌ جحێڵێكی قیت و قۆزی جوان چاكه‌ی گوندی بوو به‌ جل و به‌رگێكی كۆن و دژێون. ماندوو دیاری ده‌كرد، پرێسكێكی له‌ بن هه‌نگڵی دابوو و كیته‌ڵه‌ ماستێكیشی پێ بوو. گووتی:

- داده‌، ئێره‌ ماڵی میرزا ساڵه‌ی كوره‌خانه‌چێیه‌؟

گووتم: - نه‌خێر، ئێره‌ هه‌و نییه‌، به‌ڵام من به‌ ماڵیان ده‌زانم و ده‌توانم پێتی نیشان بده‌م.

له‌گه‌ڵی وه‌ڕێكه‌وتم تا گه‌یشتینه‌ ماڵه‌ میرزا ساڵه‌ به‌ پرسیاران هه‌موو شتێكم سه‌باره‌ت به‌م گه‌نجه‌ لادێیه‌ هاته‌ ده‌ست، نێوی چێ، خه‌ڵكی كام گونده‌، كارداری ماڵی كام ئاغایه‌، له‌ هه‌موو گرینگتر پێنج كلاسی خوێنده‌واری هه‌یه‌، له‌ قسه‌كانی ڕا زانم ئه‌وه‌ یه‌كێك له‌و به‌دبه‌ختانه‌یه‌ كه‌ من ده‌بێ ڕزگاری كه‌م. سه‌روبه‌ندی شۆرش و ڕاپه‌ڕینی گه‌ل بوو، ڕۆژ تاكوو ئێواره‌ له‌ ناو جه‌رگی خه‌باتدا خه‌ریكی ڕوون كردنه‌وه‌ی تاریكه‌كان و وه‌خه‌به‌ر هێنانی نووستۆكان بووم. هه‌ڵبه‌ت زۆرتری حه‌ولی من بۆ نه‌جاتی پیاوان بوو. هه‌ر ئه‌وانیش بوون گۆیان بۆ ڕاده‌گرتم، هه‌ركه‌ ده‌چوومه‌ ناو ژنان به‌ر له‌مه‌ دم بكه‌مه‌وه‌ به‌ پرسیاران تێكیان ده‌دا، "خوشكه‌ مێردت هه‌یه‌؟"، "بۆ مێردت نه‌كردووه‌؟"، " چت به‌ پیاوان داوه‌؟"، "خودا بۆ خۆی ده‌زانێ بۆ باڵ نادا به‌ گامێش"، ...

پرسیار و ڕێنموونێكانیان له‌ جنێوپێدان بۆم گرانتر بوو، به‌ڵام من كۆڵم نه‌ده‌دا له‌سه‌ر هه‌ڵوێسته‌كانم به‌رامبه‌ر به‌ مافی ئه‌و ڕه‌نجبه‌رانه‌ هه‌ر سوور بووم. ڕۆژێ له‌ یه‌كێك له‌ متینگه‌كانم دا كه‌ له‌ مێدانێك له‌ نێوان چوار گونددا خه‌ریكی نووتق كردن و هاندانی تۆژی چه‌وساوه‌ بووم، ته‌نیا پیاو و منداڵه‌وركه‌، له‌ ده‌ورم كۆ ببوونه‌وه‌. ناوه‌ڕۆكی وتاره‌كه‌م وه‌ك هه‌میشه‌ له‌ سه‌ر ڕۆژی ڕه‌شی پیاوان ساغ ببووه‌؛ ئه‌ی برایان: "كاتێك ئێوه‌ به‌ نیوه‌شه‌و جێگه‌وبانه‌ گه‌رمووگوڕه‌كانتان به‌ ئیجبار به‌ جێ ده‌هێڵن و هه‌تا بانگی شه‌وان بۆ په‌یدا كردنی دوو قرانه‌ پووڵ نایه‌نه‌وه‌ ماڵ و ئه‌وه‌ی وه‌ده‌ستان هێنا ده‌بێ له‌ مست خانمه‌كانتانی بكه‌ن و ئه‌وانیش به‌ كه‌یفی خۆیان بێده‌ن به‌ ئاڵاوواڵا و ڕه‌نگوئاوڕه‌نگ و خویان برازێنه‌وه‌ و وه‌كووچه‌ و خه‌یابانان كه‌ون، له‌ ماڵێدا بێجگه‌ له‌ به‌خۆ ڕاگه‌یشتن هیچ كارێكی تریان نییه‌، له‌ دوو منداڵ زیاتر ناێهێنه‌ سه‌ر دوونیا ئه‌ویش ده‌بێ هه‌ردووكی كچ بێ، ده‌نا نابێ ببێ!

فه‌لسه‌فه‌ی ژیانیان له‌سه‌ر حازرخۆری و حه‌سانه‌وه‌ی به‌ر سێبه‌ری و پیلاندارشتن بۆ تێكشكانی پیاوانی بێ ده‌سه‌ڵات و مه‌زلووم دامه‌زراوه‌". هه‌ر دوروشمه‌ی كه‌ ده‌مگووت، له‌سه‌ر داوای گوێگران چه‌ند پاتم ده‌كرده‌وه‌، شه‌قه‌شه‌قی ده‌خسته‌ ناو گیان له‌به‌ران.

وتاره‌كه‌م به‌ گووتنی ئێمه‌ زاڵم له‌ هه‌ر لیباسێك دابێ مه‌حكووم ده‌كه‌ین و ئێمه‌ مێژوو ده‌گۆڕین، كۆتایی پێهێنا به‌ دواییدا، ئیزن درا تا پرسیار بكه‌ن و وه‌ڵام وه‌رگرن. له‌ به‌ر چۆنێتی و گه‌رمووگوڕی وتاره‌كه‌ بێجگه‌ له‌ جوڵه‌جوڵ ، جێ هیچ پرسیارێكم بۆ كه‌س نه‌هێشتبۆوه‌. به‌ دوای ئه‌مه‌دا دڵنیام كردن هیچ پرسیارێك بێ وه‌ڵام نامێنێته‌وه‌، له‌ ناو عه‌شیمه‌تدا ده‌ستێك به‌رزكرا.

گووتم: _به‌ڵێ، فه‌رموو!

گووتی: _داده‌ ئه‌ستی، تۆ هه‌مان نی، به‌ر له‌ دوو ساڵ ماڵی میرزا ساڵه‌ت پێ نیشاندام؟

كه‌ جوانی لێخورد بوومه‌وه‌، ناسیمه‌وه‌ خۆی بوو، حه‌مه‌! گووتم: _به‌ڵێ بۆخۆمم!

حه‌مه‌ خۆی گه‌یانده‌ من بڵیندگۆكه‌ی به‌ده‌سته‌وه‌گرت و هاواری كرد: _داده‌ ئه‌ستی به‌ر له‌ شۆرشیش هه‌ر شۆرشگێر بوو، پشتیوانی كردن له‌ ئه‌و، پشتیوانی كردن له‌ خۆمانه‌، بژی سه‌رۆك ئه‌ستی! بژی سه‌رۆك ئه‌ستی مه‌یدانی داگرت. له‌پڕ خۆم له‌سه‌ر شانی جه‌ماعه‌ت دیته‌وه‌ و له‌سه‌ر به‌رزترین قه‌ڵاغی دایانبه‌زاندم، له‌سه‌ر قه‌ڵاغ دیسان په‌یمانم تازه‌ كرده‌وه‌. به‌ تێكرایی به‌ره‌و مزگه‌وت وه‌ڕێ كه‌وتین، هه‌ر له‌وێ شانه‌یه‌كی تێكۆشانمان پێكهێنا و حه‌مه‌ بۆ سه‌رشانه‌ هه‌ڵبژێردرا. زۆری نه‌خایاند دێێ حه‌مه‌ بوو به‌ بنكه‌ی ناوه‌ندی، له‌به‌ر نێونووسی لایه‌نگران و هات و چۆیان ناوی خۆمان له‌بیر چووبۆوه‌. هه‌ركه‌ چاوت به‌ پیاوه‌ چوارشانه‌ سمێڵ فشانه‌ ده‌كه‌وت له‌ ترسی خاتوونی ماڵێیان چۆن به‌ نه‌هێنی دێن و داوای ئه‌ندام بوون ده‌كه‌ن، ئاورت تێبه‌ر ده‌بوو. حه‌مه‌ی لێهاتوو له‌ ژێر چاوه‌دێری خۆم و نان به‌ قه‌رزدان به‌ یه‌كتر، بێئه‌وه‌ی بۆخۆی به‌خۆی بزانێ بوو به‌ هاوشانی حیزبیم و هاوسه‌ری ژینم.

خاتوونه‌ ده‌سه‌ڵاتداره‌كانی ماڵێ هه‌روا به‌ سووك و هاسانی ئاماده‌ نه‌بوون واز له‌ ده‌سه‌ڵاتی خۆیان بێننن، به‌ر له‌ هه‌موو شتێك به‌ نه‌حله‌تیان كردم و فتوای قه‌تڵمیان دا. دوای ماوه‌یه‌ك ژیانی نه‌هێنی من و حه‌مه‌ له‌ ترسی گیانمان به‌ نابه‌دڵی و دڵخۆشی ڕێگه‌ی ئوروپامان گرته‌به‌ر. ژیانی ئوروپی ڕێگه‌ی له‌ خه‌بات و تێكۆشانمان نه‌گرت. من هه‌ر به‌ یازده‌ مانگان جارێك كوڕێكم ده‌بوو. هه‌ر وه‌ك ژنی ئورووپی به‌ دوو گیانی ، منداڵێكم له‌ سه‌ر پشتی ته‌ركی دوچه‌خه‌كه‌م و ئه‌ویدیكه‌م له‌ پێشه‌وه‌ داده‌نا و جووته‌ كوڕه‌كه‌ی دیكه‌شم به‌ سواری دووچه‌رخه‌ی خۆیان به‌ دوای یه‌كتر له‌ پێشم ده‌ روێشتن.

 ڕۆژێ هه‌شت ساعه‌ت له‌ كارخانه‌ كارم ده‌كرد و زۆر جار كاری زیده‌شم ده‌كرد و دوو سه‌عاتانیش له‌ ڕێگاوباناندا ده‌بووم. هیچ ئه‌ركێكی ژنانه‌، پیاوانه‌ و دایكانه‌ نه‌بوو كه‌ بێ منه‌ت به‌ جێی نه‌گه‌نم. هه‌ڵبه‌ت به‌ نازكێشانی حه‌مه‌ش ڕاده‌گه‌یشتم. ڕۆژانی شه‌مۆ و یه‌كشه‌مۆ له‌ دووكان و بازاران هه‌ر كێشه‌وه‌م ده‌كرد بۆ ماڵێ، هه‌تا خواردنه‌مه‌نی هه‌رزان و خۆشی خۆماڵی بۆ حه‌مه‌ گیان سازبكه‌م. به‌ شانازێوه‌ سه‌یری حه‌مه‌م ده‌كرد، حه‌مه‌كه‌م  خوێندكاری زانكۆ له‌ لقی مافه‌كانی مرۆڤ بوو، شێوه‌ی گوفت و لوفت و هه‌ستان و دانیشتنی ته‌واو پێشكه‌وتوانه‌ ببوو. له‌به‌ر سه‌رقاڵی كۆڕ و كۆبوونه‌وان كه‌متر چاومان پێكده‌كه‌وت. هه‌روه‌خت كه‌ ده‌هاته‌وه‌ ماندوو بوو، منیش  باڵه‌نده‌م له‌سه‌ر داران ده‌رده‌كرد تا جیوه‌جیو نه‌كه‌ن و خه‌وی حه‌مه‌م تاڵ نه‌كه‌ن. دایم دڵخۆشی خۆم ده‌داوه‌، سپاسم ده‌كرد كه‌ تۆڵه‌ی منیش ده‌كاته‌وه‌. ڕۆژێك حه‌مه‌ دوای چه‌ند ڕۆژان هاته‌وه‌ ماڵ، ویستم بچم باڵه‌نده‌كان له‌ سه‌ر داران ده‌ربكه‌م تا جریوه‌یان نه‌یه‌ و،‌ حه‌مه‌كه‌م خه‌وی لێبكه‌وێ و ماندووی بحه‌سێته‌وه‌. به‌ڵام حه‌مه‌ نه‌هێشت و ڕایگرتم و گووتی:

_ئه‌ستی! تۆ خۆت ده‌زانی ئێره‌ ئوروپایه و‌، دنیای ئازاده‌. لێره‌ ئینسان گیاش بخوا له‌ شتێك شتێك فێرده‌بێ. چاو و گۆی ده‌كرێته‌وه‌. من له‌ ماوه‌ی ئه‌م چه‌ند ساڵه‌ی ژیانمان له‌ ئوروپا به‌ كه‌ماڵ گه‌یشتووم و هه‌ر ئه‌م پێگه‌یشتنه‌ وای لێكردووم بزانم ژن چییه‌ و چۆن ده‌بێ له‌گه‌ڵی هه‌ڵسوكه‌وت بكه‌ی. هیوادارم تۆش پێبگه‌ی، ئه‌گه‌ر تا ئێستا پێنه‌نه‌گه‌یشتووی! دوێنێ له‌ لایه‌ن "بنكه‌ی لێكۆڵینه‌وه‌ی مافی مرۆڤ لقی ژن ناسین" خه‌ڵات كرام و نازناوی"بابی ژنان"یان پێدام...

سه‌رم سوڕما بوو، هیچ تێنه‌ده‌گه‌یشتم، به‌ چاوی زه‌ق و زاری ئاوه‌ڵه‌ تێڕامابووم، پێش ئه‌وه‌ی ده‌نگێكم لێ بێته‌ده‌ر گووتی:

- ده‌بێ تۆ ئه‌وه‌ی قه‌بووڵ بكه‌ی كه‌ بیر و باوه‌ڕ عه‌نتیكه‌ نییه‌! بیروباوه‌ر وه‌ك مۆدی لیباس ئاڵوگۆڕی پێویسته‌! ئێستاش "نینا"ی هاوبیرم له‌ ماشێن له‌سه‌رم مه‌حته‌له‌، ده‌بێ بڕۆم. ئه‌گه‌ر ناونیشانی بارگاكه‌مانت پێویست بوو، له‌ كاتالۆك داهه‌یه‌ هیوادارم بتوانی بیدۆزیه‌وه‌!

منی كاڵه‌ دڕاوی هیچ پێنه‌بڕاو به‌ شه‌رمه‌زارێوه‌ ده‌نگی پورم له‌ گوێمدا ده‌زرینگایه‌وه‌ كه‌ ده‌یگووت:

- ڕۆڵه‌، خودا به‌و ڕۆژه‌ی نه‌كا ئاویان ده‌ گوونان گه‌ڕێ، نه‌قه‌ت دیتوویانی نه‌ قه‌ت ده‌تناسن... 

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min lista".