Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

فسستیڤاڵی گه‌وره‌ی ستۆکهۆڵم بۆ پشتیوانی له‌ مافی مرۆڤ له‌ ئێران

بڵاو کرایه‌وه‌ måndag 31 augusti 2009 kl 16.41
1 av 2
2 av 2

دوانیوه‌ڕۆی ڕۆژی ڕابردوو هه‌زاران که‌س که‌ زوربه‌یان ئێرانی بوون، به‌ڵام له‌ ناویاندا خه‌ڵکی به‌ڕه‌گه‌ز سویدی و نه‌ته‌وه‌کانی تریشی تێدا بوون له‌ فستیواڵێکی گه‌وره‌دا بۆ پشتیوانی له‌ مافی مرۆڤ له‌ پارکی كونگسترێدگۆردنی ستۆکهۆڵم، به‌ مانای باخچه‌ی پاشا، کۆببوونه‌وه‌. به‌ ده‌یان ئاڵای ئێران و ئاڵای سه‌وز وه‌ک نیشانه‌ی بزاوی چاکسازیخوازی و گۆڕانی دوای هه‌ڵبژاردنی سه‌رۆککۆماریی‌ ئێران ده‌شه‌کانه‌وه‌ و ژنان و پیاوان به‌ سه‌ربه‌ند و مه‌چه‌کبه‌ندی سه‌وزه‌وه‌، دروشمی ڕه‌خنه‌گرانه‌یان هه‌ڵدابوو بۆ وێنه‌: ده‌نگی ئێمه‌ کوا؟ ئه‌حمه‌دی نه‌ژاد سه‌رۆکۆماری من نییه‌. سوید ده‌بێ دژی ئێران، کاردانه‌وه‌ له‌ خۆ نیشان بدات. یه‌کێتیی ئه‌ورووپا نابێ ئه‌حمه‌دی نه‌ژاد به‌ سه‌رکۆمار بناسێ.

ڕێکخستنی "ده‌ستپێشخه‌ریی بۆ ئێران" که‌ دوای هه‌ڵبژاردنی١٢ی یوونیی سه‌رۆککۆماریی‌ ئێران له‌ لایه‌ن ئێرانییه‌کانی نیشته‌جێی سویده‌وه‌ پێکهاتووه‌، ئاماده‌کاری ئه‌م فستیڤاله‌ بوو که‌ توانیبووی به‌ ده‌یان هونه‌رمه‌ندی ناسراوه‌ی سویدی و ئێرانی، هه‌روه‌ها سه‌رۆکی گشت حیزب و ڕێکخراوه‌ سیاسی و کۆمه‌ڵایه‌تییه‌ گرنگه‌کانی سوید، به‌ ئامانجی پشتگیری له‌ مافی مرۆڤ له‌ ئێران و ئه‌و بزاوه جه‌ماوه‌رییه‌ به‌رده‌وامه‌ی دژی ئه‌و ڕووداوه‌ی به‌ "ده‌نگدزی و کووده‌تا"ی سوپای پاسداران و ئه‌حمه‌دینه‌ژاد ناوی لێده‌نرێ، کۆبکاته‌وه‌.

پێتر ئێریکسۆن سه‌رۆکی پارتی سه‌وزی سوید، ژینگه‌، یه‌کێ له‌و سیاسه‌تمه‌دارانه‌ بوو که‌ بۆ نموونه‌ داوای ئازادیی هه‌موو زیندانییه‌ سیاسییه‌کانی ئێرانی کرد:

هانس لیندێ نوێنه‌ری په‌رله‌مان و ئه‌ندامی کۆمیسیۆنی ده‌روه‌ له‌ حیزبی چه‌پ پشتیوانیی حیزبه‌که‌ی له‌ خه‌باتی هه‌موو ئێرانییه‌کان، بۆ نموونه‌ ژنان، کرێکاران و که‌مه‌ نه‌ته‌وه‌کان دووپات کرده‌وه‌:

شه‌شتین لوندگرێن، ئه‌ندامی کۆمیسیۆنی ده‌ره‌وه‌ و ئه‌نجومه‌نی یه‌کێتیی ئه‌ورووپا له‌ حیزبی سه‌نته‌ر وێڕای وه‌بیرهێنانه‌وه‌ی جاڕنامه‌ی مافی مرۆڤ له‌ سه‌ر ئازادیی ده‌ربڕین، گوتی کۆماری ئیسلامیش مۆری ئه‌م جاڕنامه‌یه‌ی گرتووه‌ و ده‌زانێ که‌ ناتوانێ چیتر پێشێلی بکات و ده‌بێ مل بۆ ئازادی، که‌چ بکات:

ڤانیا لوندبی ڤێدین سه‌رۆکی یه‌کێتیی سه‌راسه‌ریی کرێکارانی سوید، ئێل ئوو، پشتگیریی خۆی و ڕێکخراوه‌که‌ی له‌ خه‌باتی جه‌ماوه‌ریی ئێرانییه‌کان ده‌ربڕی و بۆ نموونه‌ داوای کرد که‌ خه‌باتکارانی گیراوی بواری سه‌ندیکایی ئازاد بکرێن و هه‌موو ئه‌وانه‌ی له‌ سه‌ر کار ده‌رکراون بگه‌ڕێندرێنه‌وه‌ سه‌ر کاره‌کانی خۆیان:

زینه‌تی پیرزاده‌، کچه‌ کۆمیدیه‌نی به‌ڕه‌گه‌ز ئێرانی یه‌کێکی دیکه‌ له‌ ئاخێوه‌ران بوو که‌ چه‌ند نووکته‌یه‌کی به‌تامی له‌ سه‌ر سوید و ئێران گێڕایه‌وه‌. وه‌ک نموونه‌ گوتی کاتێ بۆ یه‌که‌مجار داری چله‌ی هاوینی له‌ سوید دیت به‌ خۆی گوت وه‌ڵلا سویدییه‌کان زۆر له‌ مه‌لا ده‌سه‌ڵاتداره‌کانی ئێران پێشکه‌وته‌ترن و به‌ جارێک دوو که‌س به‌ داری‌ ئێعدامه‌وه‌ ده‌که‌ن:

سوێره‌ن یووڤاس سه‌رۆکی ڕێکخستنی هاوڕه‌گه‌زخوازانی سوید و ئه‌ندامی سه‌رۆکایه‌تیی ڕێکخراوه‌ جیهانییه‌که‌ی هاوره‌گه‌زخوازان، داوای له‌ سوید کرد که‌ له‌ به‌ر ئه‌و زوڵم و زۆره‌ی کۆماری ئیسلامی له‌ گشت خه‌ڵک و بۆ وێنه‌ هاوجینسخوازانی ده‌کات، ئیزنی مانه‌وه‌ بداته‌ په‌ناخوازانی هاوڕه‌گه‌زخوازی و دووجینسخوازی ئێرانی و نه‌یانگه‌ڕێنێته‌وه‌.

نوێنه‌ری مۆدێراته‌کان له‌م فستیڤاله‌دا گوستاڤ بلیکس بوو، که‌ ئه‌ویش نوێنه‌ری په‌رله‌مان و ئه‌ندامی کۆمیسیۆنی ده‌ره‌وه‌ی ئه‌نجومه‌نی نوێنه‌رانه‌. بلیکس له‌ قسه‌کانی خۆیدا گوتی بلا خه‌ڵکی ئێران بزانن که‌ ئێمه‌ش پشتیوانیان ده‌که‌ین و ئازادی ڕۆژێک ده‌گاته‌ ئێران و هه‌موو چین وتوێژه‌کانی ده‌گرێته‌وه‌، ژنان، پیاوان، منداڵان و گشت که‌مه‌ نه‌ته‌وه‌کانیشی.

چه‌ند قسه‌بێژێک له‌ وتاره‌کانی خۆیاندا ره‌خنه‌ی توندیان ئاراسته‌ی حوکوومه‌تی ره‌ینفێڵد کرد که‌ نه‌ده‌بوو باڵوێزه‌که‌ی بنێرێته‌ ڕێوڕه‌سمی سوێنددرانی ئه‌حمه‌دی نه‌ژاد وه‌ک سه‌رۆککۆماری ئێران و به‌مجۆره‌ ڕه‌وایی به‌ که‌سێک بدات که‌ زۆرینه‌ی خه‌ڵک ده‌نگیان نه‌داوه‌تێ. ئه‌رده‌ڵانی شه‌که‌رابی سه‌رۆکی پێشووی یه‌کێتی لاوانی حیزبی سوسیال دیموکراتی سوید

مۆنا سالین سه‌رۆکی حیزبی سوسیالدیمۆکراتی سوید یه‌کێ له‌و سیاسه‌توانانه‌ بوو که‌ کاتێ مه‌چه‌کبه‌نده‌ سه‌وزه‌که‌ی نیشان دا و پێی گوتن که‌ به‌ڵێنی ده‌دات تا ئازادیی خه‌ڵکی ئێران، له‌ مه‌چه‌کی نه‌کاته‌وه‌. ئه‌و گوتی ئه‌وه‌ی له‌ ئێران ڕوو ده‌دات پرسیاری ئه‌ویشه‌ و هی هه‌موو که‌سێکی دیکه‌ش. ده‌بێ به‌ کراوه‌یی باسی ئه‌وه‌ بکرێت که‌ ئاکامی هه‌ڵبژاردنی ئێران دزراوه‌. مۆنا سالین پشتیوانی خۆی و حیزبه‌که‌ی له‌ هه‌موو ئێرانییه‌کان ده‌ربڕی له‌ ئه‌ندامانی ڕێکخراوی موجاهیدینی خه‌ڵق که‌ سه‌ربازانی نووری ئه‌لمالکی له‌ که‌مپ ئه‌شره‌فی عێراق به‌ زۆری چه‌ک ده‌ریانکردن، له‌ کورده‌کان، له‌ ئاسوورییه‌کان و له‌ به‌لووچه‌کان. ئه‌م ده‌ربڕینه‌، هه‌راو هوریای یه‌کجار زۆری به‌شدارانی لێکه‌وته‌وه‌.

یان بیۆرکلوند سه‌رۆکی پارتی لیبرالی گه‌ل و وه‌ززیری په‌روه‌رده‌ی سوید له‌ قسه‌کاانی خۆیدا، ڕاسپێریی کرده‌ ئاخونده‌ حاکمه‌کانی ئێران که‌ باشتره‌ ده‌سه‌ڵات بده‌نه‌ بره‌وه‌ی هه‌ڵبژاردنه‌که‌ و ڕێز له‌ مافه‌کانی خه‌ڵک بگرن.

گودرۆن شیمان له‌ سه‌رۆکانی ڕێکخراوی ده‌ستپێشخه‌ریی ژنانه‌ و ئووڤێ برینگ پرۆفیسۆری مافه‌ نێونه‌ته‌وه‌ییه‌کانیش له‌ ڕیزی میوانانی ئاخێوه‌ر بوون که‌ ئه‌وانیش به‌ نۆره‌ی خۆیان به‌ تایبه‌ت پشتگیرییان له‌ مافی ژنان و مافه‌ گشتییه‌کانی هه‌موو پێکهاته‌کانی وڵات کرد.

هونه‌رمه‌ندان لاله‌، سپیده‌ وه‌زیری، شاهین نه‌جه‌فی، تووماس دیلێڤا، پرۆمۆ و گرووپی سپایدردۆگس، ئاده‌م تێنستا، لابیرێنت، ستێفان سیمۆندز و چه‌ندین گرووپ و سیمای هونه‌ریی دیکه‌ش له‌ ناوبڕی وتاره‌ سیاسییه‌کاندا گۆرانیان چڕی و موزیکیان ژه‌ند. ئه‌وه‌ی من دیتم کۆڕێکی سه‌رکه‌وتووی شکۆمه‌ند بوو که‌ توانیبووی خه‌ڵكێکی زۆری له‌ ده‌وری خۆیدا کۆبکاته‌وه، که‌چی له‌م ناوه‌دا به‌شداریی کورده‌کانی نیشته‌جێی ستۆکهۆڵم زۆر به‌رچاو نه‌بوو. له‌ سه‌ر شانۆش، هونه‌رمه‌ند یا وتارده‌رێکی کوردی ئێران به‌شدار نه‌ببوو. ئه‌مه‌ش به‌ لای منه‌وه‌ بوو به‌ پرسیار. ئاخۆ بۆ کورده‌کان به‌ گشتی و کورده‌کانی پارچه‌ی ئێران وه‌ک پێکهاته‌کانی تری ئه‌م وڵاته‌ له‌م ڕێوه‌ڕه‌سمه‌دا به‌شدار نه‌ببوون؟

ئاماده‌کار: ناسری سینا
nasser.sina@sr.se

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min Lista".