Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

پێشانگای هه‌وه‌س و گوناح بۆ هه‌مووانه‌

بڵاو کرایه‌وه‌ onsdag 27 april 2011 kl 16.35
Danaë och guldregnet, Adolf Ulrik Wertmüller, Knäböjande nunna, recto, Martin van Meytens d.y. This girl has inner beauty (ett av tre i samma verk), Lotta Antonsson. Bilderna är beskurna.

دوای سه‌ده‌ها ساڵ ده‌رگا داخراوه‌کانیان لێ ده‌کرێته‌وه‌، ئیتر نه‌ ته‌نها پیاو هه‌موو که‌س بۆی هه‌یه‌ له‌ ڕووتییان وردبێته‌وه‌ و له‌ ڕوانگه‌کانی خۆیه‌وه‌ بیانخوێنێته‌وه‌. پێشانگای (Lust och Last) هه‌وه‌س و گوناح له‌ مۆزه‌خانه‌ی نیشتمانی ئه‌م به‌هاره‌ تا هاوینی داهاتوو به‌رده‌وام ده‌بێت و به‌ڕێوه‌به‌ری مۆزه‌خانه‌که‌ سۆلفرید سیۆده‌رلیند له‌ ئامانجی پێشانگاکه‌ ده‌دوێت.

سمت و سنگی ژنان پێچراو له‌ چیرۆکی ڕه‌مزی له‌ سه‌ده‌کانی چاخی ناوه‌ڕاسته‌وه‌ به‌ڵام تابلۆ و وێنه‌ی سه‌رده‌می نوێش که‌ ڕاسته‌وخۆ نۆرم و تێڕوانینی سه‌رده‌می کۆن سه‌باره‌ت به‌ سێکس و ئه‌خلاق ده‌خاته‌ ژێر پرسیاره‌وه‌. ئه‌مه‌ له‌ پێشانگای هه‌وه‌س و گوناحدا له‌ مۆزه‌خانه‌ی نیشتمانی له‌ ستۆکهۆلم که‌ له‌م به‌هاره‌وه‌‌ تا هاوینی داهاتوو به‌رده‌وام ده‌بێت. ده‌رگاکان واڵان به‌ڵام وه‌ک له‌سه‌ر تابلۆی به‌رده‌م پێشانگاکه‌ نوسراوه‌  ووریابه‌ وێنه‌ی وای تێدان که‌ ڕه‌نگه‌ ناڕه‌حه‌تت بکه‌ن.

 نزیکه‌ی 200 تابلۆ له‌سه‌رده‌می 1500کانی ئه‌ورووپا و سویده‌وه‌ تا ده‌گاته‌ سه‌رده‌می نوێ چیرۆکی تێڕوانینی مرۆڤ بۆ سێکس و ئه‌خلاق، پاکیزه‌یی ده‌گێڕنه‌وه‌. پاکیزه‌یی و داوێن پاکی چه‌مکێکی سه‌ره‌کییه‌  و بنه‌مای پیشانگاکه‌ی له‌سه‌ر وه‌ستاوه‌. پاکیزه‌یی له‌ ڕوانگه‌ی هه‌وه‌س و گوناحه‌وه‌، تابلۆکان چیرۆکی هه‌وه‌س و سێکس که‌ هه‌ست و پێکهاته‌یه‌کی سرۆشتیی مرۆڤه‌، ئنجا گوناح‌ و تابووه‌کان که‌ مرۆڤ له‌ سه‌رده‌مه‌ جیاوازه‌کانه‌ پێناسه‌ی جیاوازی بۆیان هه‌بووه‌. که‌شێکی شێدار و چه‌وریه‌کی زۆر، وه‌ک ئه‌و دوو میوانه‌ی پێشانگاکه‌ بۆ یه‌کتری باس ده‌که‌ن پێستی سپی پڕشنگدار و سمت و سنگی ڕووت، ژنێکی زۆر به‌ڵام پیره‌ پیاوانیش به‌ سه‌رنج‌ و نیگا پڕ شه‌هوه‌ته‌کانیانه‌وه‌ هۆڵه‌کانی مۆزه‌خانی نیشتمانی له‌م به‌هاره‌وه‌ تا هاوینی داهاتوو داگیر کردووه‌.

 ئه‌م هه‌موو گۆشت و هه‌وه‌سه‌ی که‌ سه‌ده‌ها ساڵه‌ له‌ ژوره‌ داخراوه‌کانی مۆزه‌خانه‌کاندا بوون مه‌به‌ست له‌ ده‌رخستنیان له‌م پیشانگایه‌دا ئه‌وه‌یه‌ که‌ له‌ ڕێی تابلۆکانه‌وه‌ له‌و نۆرم و تێڕوانینانه‌ تێ بگه‌ین که‌ مرۆڤ له‌ سه‌رده‌مه‌ جیاوازه‌کاندا بۆ سنوره‌کانی نێوان هه‌وه‌س و تابوو هه‌یبوون. هه‌ر به‌و مه‌به‌سته‌ پێشانگاکه‌ دابه‌ش کراوه‌ به‌سه‌ر سێ ژووردا که‌ هه‌ر یه‌کێکیان چیرۆکی سه‌رده‌مێک ده‌گێڕێته‌وه‌ به‌ڵام پێنج ژووری بچوکی تر که‌ مه‌به‌ست لێی نیشاندانی شێوازی په‌روه‌ده‌ و سزاکانی گوناهکردنه‌.

 ژووری یه‌که‌م پره‌ له‌و تابلۆیانه‌ی به‌ ئامانجی ئاینی و دورخستنه‌وه‌ی مرۆڤ له‌ هه‌وه‌سی جنسی کێشراون، وێنه‌ی ئینجیلیانه که‌ ژن و شه‌راب تێیدا سیمبولی گوناحه‌کارییه‌ و پیاو ده‌بێت خۆیانی لێ به‌دروو بگرێت گه‌ر به‌هیوای به‌هه‌شتبێت. وه‌ک تابلۆکه‌ی ئوتۆ ڤان ڤین.

  له‌و سه‌رده‌مه‌دا ته‌نها پیاو بۆی هه‌بوو ئه‌و وێنانه‌ بکێشێت و بۆ پیاو ده‌کێشران.

-    سولفرید سیۆده‌رلیند به‌ڕێوه‌به‌ری مۆزه‌خانه‌ی نیشتمانی له‌ ستۆکهۆلم ده‌ڵێت به‌ڵام له‌پاڵ ئه‌م وێنه‌ ڕه‌مزییانه‌دا که‌ پاکیزه‌یی تێیدا مه‌به‌سته‌ پیاوان له‌ ژووره‌ تایبه‌ته‌کانیاندا وێنه‌ی رووتی ژن و سمتیان به‌ شێوه‌کاره‌کان ده‌کێشا. وه‌ک ئه‌و تابلۆ دوو به‌شییه‌ی مارتین ڤان مێیته‌ن که‌ له‌ یه‌کێکیاندا ڕووی داپۆشراوی ڕاهیبه‌یه‌ک و نیوه‌ ده‌مووچاوی پێاوێکیش ده‌بینی که‌ به‌دزییه‌وه‌ لێی ده‌ڕوانێت تا له‌ به‌شی دووه‌می تابلۆکه‌یان ئاشکرا ده‌بێت که‌ له‌ دواو داوێنی هه‌ڵماڵراو و ڕووتی ڕاهیبه‌که‌ ده‌ڕوانێت.

تا ژووری دووه‌می یشانگاکه‌ و که‌ ئیتر ژیانی شار له‌ ئه‌ورووپادا ده‌ست پێ ده‌کات سه‌رده‌می 1800 که‌ ئیتر ژن و مناڵیش بۆیان هه‌بوو له‌و تابلۆیانه‌ بڕوانن به‌ڵام به‌ گه‌ڵازه‌یتونێک سه‌رنجه‌کانی ژنان له‌ ئه‌ندامی زاوزێی په‌یکه‌ره‌ پیاوه‌کان داده‌پۆشراون.

 ژووری سێیه‌می پێشانگاکه‌ نامه‌ نهێنییه‌کانی نێوان دوو هونه‌رمه‌ندی سویدی سێرگه‌ل و ئێرنێسڤارده‌ که‌ به‌ وێنه‌ی کاریکاتێری خه‌یاڵی سیێکس و په‌یورندییه‌ نهێنییه‌کانی نێوان ژن و پیاو ده‌گێڕنه‌وه‌. به‌ڵام له‌هه‌ر ژورێکدا وێنه‌یه‌کی قه‌باره‌ مه‌زن له‌ به‌رهه‌می هونه‌رمه‌ندانی سه‌رده‌می نوێ وه‌ک لارش نیلسۆن و به‌تایبه‌ت ژنانی وه‌ک سێسیلیا پارشباری دانراوون که‌ ئیتر تێییاندا ئه‌وه‌ی که‌ سه‌رده‌می کۆن دابه‌شکراوبوو به‌سه‌ر تایبه‌ت و گشتی دا سنووره‌کانیان هه‌ڵوه‌شێنراوه‌ته‌وه‌. تابووه‌کانی نێو تابلۆکانی ئه‌و ده‌م له‌  وێنه‌ نوێکاندا به‌به‌رچاوی هه‌موو که‌سێکه‌وه‌ ڕووت کراونه‌ته‌وه‌.

 ئه‌وه‌ی ئه‌و کات گوناح بوو تایبه‌ت بوو به‌ ژوره‌ تایبه‌ته‌کانی پیاوان ئه‌مڕۆ بۆ هه‌موان ڕێ پێدراوه‌ و چیتر ژنیش چۆته‌ ئه‌‌و دونیایه‌ له‌ هونه‌ردا، هونه‌ری وروژێنه‌ر و شۆکهێن. وه‌ک ئه‌و فیلمه‌ی که‌ ژنێکی رووت له‌ جووڵه‌یه‌کی میکانیکی دووباره‌ بۆوه‌دا له‌ خۆ ڕاده‌موسێت. یان ئه‌و پیاوه‌ بێ سه‌روده‌موچاوه‌ی له‌ چاکه‌ت و پانتۆڵێکدا له‌سه‌ر کورسییه‌ک دانیشتووه‌ و ده‌وری به‌ کتێب و بتڵه‌ مه‌ی دراوه‌ به‌ڵام سه‌رنجڕاکێشتر ئه‌وه‌یه‌ که‌ دانیشتنه‌که‌ی له‌ژێر چه‌ند سمتێکی بێ چوارپه‌ل گوێلاکدایه‌.

 پێشانگای (Lust och Last )  له‌ 24 مارسه‌وه‌ تا 14 ئاگوستی به‌رده‌وام ده‌بێت. ئامانج لێی ئه‌وه‌یه‌ له‌ ڕێی تابلۆ و وێنه‌کانه‌وه‌ له‌و گۆڕانکارییانه‌ تێبگه‌ین که‌ له‌ تێگه‌شتنی مرۆڤ بۆ نۆرم و ڕه‌وشت به‌رده‌وام ڕوو ده‌ده‌ن.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min lista".