Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

Tevlîhevî di kontrola nasnameyan de

Hat weşandin tisdag 5 januari 2016 kl 10.14
Alozî: Kîjan nasname lê ye kîjan ne lê ye?
(4:38 min)
Wêne: Johan Nilsson / TT.
Wêne: Johan Nilsson / TT.

Doh kontrola nasnameyan a ji bo rêwiyên ku ji Danîmarkayê têne Swêdê dest pê kir. Lê di nav şirketên seyahatê de tevlîheviyekê rû daye û şirket nizanin ew ê kîjan nasnameyan qebûl bikin û kîjanan red bikin.

Li gor agahiyan gelek kes bi qasî ku nasnameyên wan hene hatine rawestandin û nikarîne werine Swêdê. Doh nêzîkî 10 hezar kes di balafirgeha Kopenhagenê Kastrupê re hatine Swêdê. Berpirsê agahîdanê yê şirketa trênan a Danîmarkayê DSB Tony Bispeskov dibêjê kesên ku derbasbûna wan hatiye red kirin ji 100î kêmtir in.

Trên tenê 10 deqîqeyan bi derengî ketine, lê hin trên heta devê xwe hatine dagirtin.

Di destpêka rojê de nasnameyên ji Daîreya Bacê ya swêdî hatine red kirin. Herwiha nasnameyên norwecî jî nehatine qebûl kirin. Lê piştî nîvro şirketa DSByê ragihand ku ew hemû nasnameyên ewropî qebûl dikin.

Tê ragihandin ku kesekî ku kontrolantek red dike kontrolantê din qebûl dike û rêwî ji ber vê tevlîheviyê di zorê de dimînin.

Herwiha şirketa otobûsan Swebus li ser vê tevlîhevî û nezelaliyê nerazîbûna xwe diyar dike.

Berî niha bi demeke kurt polîs qaîdeyên kontrolkirina nasnameyan belav kir. Di lîsteya qaîdeyan de dinivîse ku divê taybetmendiyên nasname ne sade bin û divê bi wêne û navê bêkêmasî bin.

Christel Grip berpirs çapemeniyê ya Swebusê ye. Ew dibêje qaîde ne zelal in û bifikar e ajovanên wan ku qismen kontrolan dikin dê şaşiyan bikin.

Christel Grip dibêje biya min divê personelê me perwerdehiyekê bistîne da ku ew karibin kontrolan bikin. Ew diyar dike ku di vê dema kurt de ew negihane wan perwerde bikin.

Şirketa Eurolinesê qismek û ajovan qismekî kontrolên Swebusê pêk tînin. Ji Swebusê tê pirsîn ka ew pasaportên somalî qebûl dikin û ew dibêjin ew hemû pasaportan qebûl dikin. Lê Daîreya Koçê berî niha diyar kiriye ku pasaportên somalî yên ku piştî sala 1991ê hatine standin ne lê ne.

Kêşeyeke din jî zimanî ye. Christel Grip dibêje ajovanên wan nikarin nasnameyên bi zimanên din ên weke afganî  û tîgrînî fêm bikin.

Lê ma eger şaşiyek çê bibe? Wê demê jî rîska cezayekî 50 000 kronî heye. Christel Grip dibêje loma di kontrolan de ew ê gelekî bidîqet bin û heye ev zerarê bide rêwiyan.

Grip dibêje mixabin encameke wiha derdikeve holê û heye rêwî wê demê di navberê de bimînin. Ji ber ku ajovan naxwazin li gor şans tev bigerin.

Şirketên din jî diyar dikin ku qaîde ne zelal in. Bo mînak şirketa swêdî ya ewlehiyê Securitas ji ber ku qaîde ne zelal in wezîfeya kontrola nasnameyan red kiriye.

Björn Ericsson li rêxistina kardêran Almega pisporê branşê ye. Ew dibêje divê personel were perwerde kirin da ku kontrol bi awayekî hiqûqî pêk werin.

Ericsson dibêje ji ber ku belgeyên bi zimanên din ku personel fêm nake hene heye mirov bi belgeyên sexte derbas bibe û bêyî ku em perwerdehiyekê bidin em naxwazin berpirsiyariyê bidine personelê şirketên ewlehiyê.

Ji Swebusê Christel Grip rexneyan li biryara hikûmetê dike. Ew dibêje biryar bi lez hatiye dan û qaîde ne zelal in û emrên ku wan li ser qeydkirina belgeyan standine gurî ne.


Hîmê rojnamegeriya me duristî û bêterefî ye. Radyoya Swêdê ji aliyê berjewendiyên siyasî, dînî, aborî, resmî û şexsî ve serbixwe ye.
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min lista".