Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

Hêviya li ser kavilên Kobanî

Hat weşandin torsdag 12 maj 2016 kl 16.56
Belgefîlma Dûr e ya li ser jinên Kobanî
(5:27 min)
En kvinnokrigare i Kobane fr dokumentären Distance.
1 av 2
Şervaneke jin ya di belgefîlma ‘Dûr e‘ de. Wêne: Fr dokumentären Distance, Dûr e
Regissören Leyla Toprak
2 av 2
Derhênera belgefîlmê Dûr e Leyla Toprak. Wêne: Besir Kavak, Sveriges Radio

Goterek li ser belgefîlmê Dûr e ku li ser jinên şervan yên Kobanî hatiye kişandin û li Swêdê tê nîşandan.

Beşek girîng ya medyaya cîhanê di van du salên dawî de bi lehengî û heyranî behsa şervanên jin yên kurd dikin. Belgefîlmên mîna Female State ango

“Dewleta Jinan“ ku di 2014ê de bi ingilîzî hatibû weşandin û li ser rola jinan ya li rojavayê Kurdistanê bû baleke mezin ya navneteweyî kişandibû ser xwe. 

Belgefîlmekî nû yê bi navê ’Dûr e’ ku li Kobanî hatiye kişandin li Tirkî û Ewrûpa bi taybetî ji aliyê derdorên femînîst ve pêrgî baldariyeke berbiçav tê. Derhênera fîlm Leyla Toprak ji bo nîşandan û danasîna fîlm hatibû Swêdê:

– Mîna ku lîstikeke şer be behsa berxwedana Kobanî dihate kirin. Bi rastî vêya ez aciz kirim. Ji ber ku perdeya di navbera mirin û jiyanê de li wira pir zelal û tenik e. Lewra gava bi sivikayî behsa têkoşînê dihate kirin li min nexweş dihat û li hemberî vê ez li riyeke ravekirinê geriyam. Û ji Stenbolê Leyla Toprak berê xwe dide Kobanî.

Qetên kelpîç, prîkêt, hestî, camên şikestî, bist, sifre û wesayitên perçiqî di nav kevir, ax, xweliya tarî de bi dehan girik û tilmanên rengên qurşînî pêk anîne, li Kobaniyê piştî şer. 

Li ser riyên xirabûyî, erda qelişî, konçal û kortikên di nîvê rê de (eger mirov jê re bibêje rê), erebeyên jihevdeketî di nav toz û dûmanê de bi zor, bi teqeteq, hêdî hêdî mirov dibîne ku ber pêş ve dilebitin. Ew naxindirin, naherikin. Nexêr ew hildipekin. 

Bi temaşekerina li ber şaşeyê jî bi mirov ewqas nêzîk tê ku adeta bêhna toz û barûda taze dikeve pozê mirovan de.

Lê di nav van kavilan de, di vê malwêraniyê de dengên ku têne bihîstin ne qîjîn û qarîn, ne dengên bikeser, xembar û bikovan in…

Jinên çikurandî, bi cilên eskerî jidandî, di destên wan de sîleh, li qafê van tilmanan bi kubarî behsa evîn, azadî û aştiyê, behsa govend, stran û dîlanê dikin.

Belgefîlmê Dûr e di nav vê malwêraniyê de behsa gera li vê hesreta ciwan, heta behsa xweqanîkirinek, yan jî baweriyeke ku vê ciwaniyê dijî dike.

Tiştekî berbihev ve nemayî, jihevdeketî û jineke ji xwebawer ku behsa wateya jiyanê dike.

Û di nav vî bajarê kavil yê hilweşiyayî, Kobanî de, xeyala danseke narîn ya dîlbereke nazenîn di ber dengê piyanoyeke nerm re rê li ber vekirina xeyalên xweş vedike.

Li şûnwarê bajarekî kurdî, cilûbergên kurdî, zimanekî bi kurdî, hêviyeke kurdî ku ji aliyê derhênereke kurd ya bi kurdî nizanê ve hatî hûnandin. 

Di belgefîlma 15 deqeyî ya ’Dûr e’ de rastî û xeyal, dûr û nêzîk, mirovî û hovîtî, şînahî û ziwayî, delalî û kirêtî, koletî û azadî, cidiyet û îronî, kevnarî û nûjenî di nav hev de bi yek carê têne hişê mirovan.

Hîmê rojnamegeriya me duristî û bêterefî ye. Radyoya Swêdê ji aliyê berjewendiyên siyasî, dînî, aborî, resmî û şexsî ve serbixwe ye.
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min lista".