Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

گرووپێکی فەیسبووک ژنێکیان لە توندووتیژی ڕزگار کرد

بڵاو کرایه‌وه‌ onsdag 14 december 2016 kl 09.26
بە ماوەیەکی کورت گەیاندیانەوە سوید
(6:37 min)
بەڕێوەبەرانی گرووپی کچانی کوردی سوید لە تۆڕی کۆمەڵایەتی فەیسبووک
بەڕێوەبەرانی گرووپی کچانی کوردی سوید لە تۆڕی کۆمەڵایەتی فەیسبووک. لە ڕاستەوە: کامیار سەردار، ئەڤین چرایی و هێلین مەهمی. وێنە: نیشتمان ئیراندوست

ماوەیەک پێش گروپێکی تایبەت بە کچانی کورد لە تۆڕی کۆمەڵایەتیی فەیسبوک بە ناوی  (Kurdiska tjejgruppen) چیرۆکی دایکێکیان بڵاو کردەوە، کە بە نهێنی داوای ئامۆژگاریی و ڕینمایی لە ئەندامانی گروپەکە کردبوو.

هێلین مەهمی یەک لە سێ بەڕیوەبەرانی گروپەکە، یەکەم کەس بوو کە پەیامەکەی وەرگرت. لە سەرەتاوە کەمێک گوومانی لە بەسەرهاتەکە بوو بەڵام زۆر کەوتە ژێر کاریگەریی ئەو چیرۆکە دەڵتەزێنە.

 ئێوارە درەنگان بوو کاتێک هێلین پەیامەکەی لە سەر دیواری گروپەکەیان بڵاو کردەوە. ئەندامانی گروپەکە زۆر خێرا چالاک بوون و بە ئامۆژگارییەکانیان هەوڵیان دەدا یارمەتی ئەو دایکە لێقەوماوە بدەن.

جێی باسە ئەم ژنە لە تەمەنی منداڵیدا بە زۆر دراوە بە شوو و ئێستا سێ منداڵی هەیە. ژیانی لەگەڵ هاوسەرەکەی پڕ بوو لە بێڕێزیی و زۆر جار لێی دەدرا. بەڵام بڕیاری جوودابوونەوە لە ناو بنەماڵەی ئەواندا مەحاڵە. هەر بۆیە ئەم دایکە، بێڕێزیی و ئازارەکانی تەحەموول دەکرد. تا ماوەیەک لەمەوپێش، مێردەکەی داوای لێ کرد سەفەرێکی کورت بۆ کوردستان بکەنەوە. کاتێک دەگەنەوە ئەوێ، پیاوەکە پاسپۆرتەکان دەبات و هیچ پارەش ناداتە ژنەکەی. ماڵ و ژیانی ئێرەشیان هەروا بەجێ هێشتووە. جگە لە بێڕێزیی و لیدانەکان لە کوردستان ئەم ژنە لە خەمی ژیانی سویدیش بوو. هەر بۆیە وەک دوایین ڕێگاچارە پەنای بردە بەر ئەو گروپە تایبەتەی فەیسبووک.

 ئەڤین چراییش یەکێکی تر لە بەڕێوەبەرانی گروپەکەیە و دەڵیت لە سەرەتاوە چەند کەس لە گرووپەکەدا باوەڕیان بەم چیرۆکە نەدەکرد. پێیان وابوو درووستکراوە و تەنیا بە دوای پارەوەیە. بەڵام پێشنیاری پارە کۆکردنەوە لە لایەن ئەندامانی گروپەکەوە دەستی پێکرد.  

 کاتێک پێشنیاری پارە کۆکردنەوە هات، لە ماوەی ڕۆژێکدا پارەیەکی زۆر کۆ کرایەوە. ئەندامانی گرووپەکە بە خەمخۆرییەوە پارەیان بۆ هێلین فەهمی دەنارد و دوواتر پارەکە بۆ ئاشنایەکی ژنەکە لە کوردستان بەڕێ کرا.

 لە ماوەی دوو سێ ڕۆژدا ژنەکە بە هاوکاری ئاشنایەکیان لە کوردستان، پاسپۆرتەکانی دۆزیەوە و بلیتی کڕی. ڕۆژی سەفەرەکە، کە ماڵ چۆل بوو کەڵکی لەو دەرفەتە وەرگرت و لەگەڵ منداڵەکانی لە ماڵ چووە دەر. هەر ئەو ڕۆژە کاتێک گەیشتەوە سوید پەیوەندی بە هێلینەوە گرت و بە دەنگی خۆشحاڵی و لەرزانەوە سپاسی خۆی دەربڕی.

 بەڕیوەبەرانی گرووپەکە ئەمڕۆ زۆر دڵخۆشن کە ژنێکی بێدەسەڵاتیان لە دەستی زۆڵم ڕزگار کردووە. ئەڤین، کامیار و هێلین شەوانە خەویان خۆشە، شانازی بەو گرووپەوە دەکەن و دڵخۆشن گەر توانیبێتیان ببن بە پەناگای کەسانی لێقەوماو.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min Lista".