Du måste aktivera javascript för att sverigesradio.se ska fungera korrekt och för att kunna lyssna på ljud. Har du problem med vår sajt så finns hjälp på http://kundo.se/org/sverigesradio/

Vuosttilda ođđa čáhcefápmorusttega

Publicerat torsdag 12 november 2015 kl 14.25

Dal leat boazoeaiggádat ieža plánegoahtan čáhcefápmorusttegat Guvtjávrái Johkamohki duoddaris, davvi Ruoŧas. Muhto eai buohkat gal leat mielas dakkár huksemii, sis leat doarvái dulvaduvvon jávrrit meidne guoskevaš boazoeaiggát Kjell Erik Tuolja Sirgá čearus.

Kjell Erik Tuolja gohčasta seaidnái gova Áhka- čohkas ja jávrris mii lea dulvaduvvon máŋgii. Dal gávdno plána cegget ođđa seahkkorusttega lihkatkeahtes Guvtsjávrái, mii lea su geasseorohat.

- Mon gal vuosttildan go álget speadjat báikki. Got dát jurdda lea eallán in ipmir, go mii leat bargan Laponia oažžut. De álget sámit ieža dakkár hommáid. Nuogis ollu fápmorustegat leat min čearus. Mii eat dárbbat eanet, dadjá Kjell Erik Tuolja.

Laponiacenter AB ja norggabeal Musken center, dat áigguše seahkkorusttega cegget diehke Guvtjávrái, Laponia máilbmeárbbi siste. Plána lea bohkut čáhcetunnela eatnama vuoli Áhkajávrái el-fápmorusttegii ja čáhcevuollinjjáin fievrridit seahkku rastá jávrri Ritjemii. Eai áiggo dulvadit jávrri, muhto veaháš luoitit čáhcemeari. Rusttet attalii jagis el-fámu badjel 400 viesuide ja vuoitu, 40-50 miljuvnna jahkái manalii báikkálaš sámiide. Ola Pittsa, gii lea okta dain mii áŋgirušša dán plána, ipmirda  olbmuid vuostehágu, muhto jáhkká ahte olbmuid oaidnu muktusa albma dieđuiguin.

- Dat lea hui mávssolaš ruhta mii boahtá báikkálaččat. Go bohtet veahá vahágat de ferte gierdat daid danin go dat addá nu ollu ruđaid báikkálaš sámi servodahkii ja min sámi servodagas lea unnan ruhta, Sámedikki ruhtadássi lea leamaš seammalágán dan rájis go ásahuvvui 1993, dadjá Ola Pittsa, gii lea boazoeaiggát Sirgesa ránnjáčearus Unna čerušis.

Sirgá ságadoalli Jakob Nygård lea ožžon vuosttaš dieđuid dáid plánaid birra muhto ášši ii leat vel ollen čearu rádjái. Son goit eahpida ahte su čearru buorrinváldá plánaid ja Ola Pittsa lea čielggas dainna ahte vuosttildivvčče go čearru, de ii šatta mihkkege.

- Mon goit galggan geahččalit ahte čearru lea vuostá ja in jáhke ahte okto lean, eanas mu rátnáin leat nu, loahpaha Kjell Erik Tuolja.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Har du frågor eller förslag gällande våra webbtjänster?

Kontakta gärna Sveriges Radios supportforum där vi besvarar dina frågor vardagar kl. 9-17.

Du hittar dina sparade avsnitt i menyn under "Min lista".