ئەو کەسانەی بە مۆڵەتی کار دێنە سوید دەکەونە بەر مەترسی ئەوەی کاریان دەست نەکەوێت دەرئەنجام ناتوانن لەگەڵ کۆمەڵگەی سویدیدا بگونجێن، زۆرێک لەو کەسانەشی تا ئێستا بە مۆڵەتی کار هاتوونەتە سوید پاش تەواو بوونی ماوەی مۆڵەتەکەیان ناچار دەگەڕێنەوە ئەو وڵاتەی لێوەی هاتوون. ئەمە لێکۆڵینەوەیەکی نوێ دەریخستووە. لیسا پێللینگ بەڕێوەبەری لێکۆڵینەوەکەیە و بەڕێوەبەری تۆڕی ڕاسازیی (Global Utmaning)ە.

سوید ئەمڕۆ لە دوو بەرنامەی سوپاییدا کە لەلایەن ڕێکخراوی ناتۆوە لە کۆسۆڤۆ و ئەفغانستان بەڕێوە دەچێ  ئەرکی دەدرێتێ. هاوکاریکردن لەگەڵ ناتۆ بۆ ئەو وڵاتانەی ئەندام نین لە ڕێی پرۆگرامی ناودێر بە "هەروەز لەپێناو ئاشتیدا" دەکرێ کە سوید لەوەتەی ساڵی ١٩٩٤ەوە لەگەڵدا بووە. یان ئەوەی لە بەرنامەی هەروەزی نێوان وڵاتانی ئاتلانتیکی ئەرووپادا کە لە ساڵی ١٩٩٧ەوە وەک ڕێکخراوی گۆڕینەوەی زانیاری و تاووتوێکردنی پرسی ئاسایش لە نێوان ئەندامانی ناتۆ و وڵاتانی هاوکاردا چالاک بووە.

قسەکانی سەرۆکی ئێریتێریا لەسەر ئەوەی پێوەندیی نێوان سوید و ئێریتێریا هەڵوەشاوەتەوە و هیچ قسەیەک لە نێوان ئەوان و سیاسەتمەدارانی سویددا لەسەر ڕۆژنامەوانی گیراوی سویدی داویت ئیسحاقدا لە گۆڕێدا نییە، وەزارەتی دەرەوەی سویدی تووشی سەرسوڕمان کردووە.

فرانک بێلفراگ سکرتێری وەزارەتی دەرەوە دەڵێ ئەمە ڕاست نییە و دوو ولات پێوەندی و دانوستاندنیان لەسەر داویت ئیسحاق هەڵنەبڕیوە. ئەو بە هەواڵدەریی تێ‌تێی گوت کە ئێمە زۆریش چالاکین و لەگەڵ سەرۆکانی ئەم وڵاتە دانوستاندنی بەردەواممان هەیە.

فرێدریک ڕاینفێڵد سەرۆککوەزیریش جەختی لەسەر هەبوونی گفتوگۆ لەگەڵ سەرۆکانی ئێریتێریا کردەوە و گوتی لەم ڕۆژانەدا کاربەدەستانی سویدی لەگەڵ جێگری وەزیری دەرەوەی ئێریتێریادا لە پێوەندیدا بوون و باڵوێزی سویدیش نزیکەی سی جاران لەگەڵ بەرپرسانی ئەم وڵاتە لە پێوەندیدا بووە.

یەکێتیی کرێکارانی بیناسازی و خاوەنکارانی شیرکەتگەلی گەرماساز و ئاڵوگۆڕی هەوا ئەمڕۆ لە گفتوگۆدا دەبن تا بە ڕێککەوتنێک لە سەر مووچە بگەن و بەر لەم پلانە مانگرتنە بێنن کە بڕیارە ٨٥٠ کارگەری تری ئەم بوارە سبەینێ بیکەن.

خاوەنکارانیش وریاییان داوە کە بێت و ئەو سەد کۆمپانیایەی لەم بوارەدا کار دەکەن مان بگرن، ئەوا ئەوانیش مەجبوور دەبن شوێنی کار لەسەر کارگەرانیان دابخەن (بە سویدی لۆکئاوت). 

مانگرتنەکە لە چوارەمین هەفتەی خۆیدایە و تا ئێستا ٢٠٠٠ کارمەند و کارگەر لە مانگرتندان.

لە زۆرینەی کۆمۆنەکانی سویددا قوتابیانی کوڕی پۆلی نۆ نمرەی خراپتر لە هاوپۆلانی کچیان دەگرن. ئەمە توێژینەوەیەک نیشانی داوە کە تلەڤزیۆنی سوید کردوویەتی.

تلەڤزیۆنی سوید لە نمرە‌کانی ئەم سێ ساڵەی دوایی قوتابیانی پۆلی نۆی وڵاتی ڕوانیوە و لە جیاوازییەکانی نێوان کارنامەی فێرخوازان ورد بۆتەوە و بۆی دەرکەوتووە کە بە شێوەی مامناوەندی کوڕەکان دە لەسەد لە دواوەی کچەکانەوەن. لە زۆربەی کۆمۆنەکانی وڵاتیشدا ئەم ژمارەیە هەروایە و بگرە زیاتریشە.

توێژینەوە لەم گومانلێکراوە ڕیزەکوژەی مالموێ، واتا پێتر مانگس تا ئێستا لانی کەم ٤٨ میلیۆن کرۆن پارەی تێچووە. ئەمەش بە گرانترین و پڕخەرجترین توێژینەوەی پۆلیسی سکۆنێ و یەکێ لە گرانترین توێژینەوە تەنانەت لە مێژووی سویدیش دادەنرێ. بێت و ئەم خەرجیانەش حیساب بکرێن کە پاش گیرانی پێتر مانگس لە نۆڤەمبەری ٢٠١٠دا کراون، ئەوا سەرجەم لە دە میلیۆن کرۆنیش زیاتر دەکات.

سویدییەکان وەک رەوتی بەرێ پارە لە بانک قەرز ناکەن، هەرچەند لە گوێن ئەو ئامارەی نووسینگەی ناوەندیی ئاماری سوید بڵاوی کردۆتەوە ڕێژەی قەرز‌وەرگرتنەکان هەر دێ و زیاد دەبێ. 

لە یەکەم وەرزی ساڵدا ڕێژەی قەرزوەرگرتنی بنەماڵەکان ٢٧ میلیارد کرۆن بوو و ئەمە لە ماوەی هەشت ساڵی ڕابردوودا هەرگیز وا نزم نەبووە.

بارودۆخی گەڕەکی تێنستا لە ڕۆژانی شەممە و یەکشەممەدا لە رۆژانی پێشووی هەفتە‌دا ئارامتر بوو. ناوەندی پێوەندییەکانی پارێزگا رایگەیاند کە پەنجا پۆلیس لە ناوچەی تێنستا لە گەشتدا بوون و هیچ رووداوێکی گەورە نەقەوماوە.

شەوی چوارشەممە‌ی هەفتەی ڕابردوو نائارامییەک لەم گەڕەکەی پەراوێزی ستۆکهۆڵمدا ڕووی دا کە تێیدا چەند گەنجێک بوونە هۆی شێواندن و ئاگردانی چەند بینایەک. پۆلیسی هەرێمەکە لەم پێوەندییەدا حەوت گەنجی دەردەست کرد.

بە پێی ئەو زانیارییانەی پۆلیس باسی لێوە کردووە رووداوەکە بە ڤیدیۆ تۆمار کراوە و ئەمەش بۆتە هۆی ناسینەوەی سی گەنج لە رووداوی فێرگەی رینکەبیدا کە گومانی خراپکاری و زیانگەیاندن، توندوتیژی و ئاژاوە و کوشتن بە هۆی سووتاندنیان لێکدەکرێ.

هۆکان یەڤرێل، سکرتێر و نزیکترین کەس لە وەزیری پێشووی بەرگریی سوید ستێن تۆلی‌فۆش، کە زۆربەی کارەکانی پێوەندی بە عەرەبستانی سعوودی لە رەوتی دانانی کارخانەی چەکسازیی سویدی لەم وڵاتەی ئەنجام داوە لە سەر کار لابراوە. بەشی ناوەندی دەنگوباسی رادیۆی سوید، ئێکۆت، وێڕای گێڕانەوەی ئەم هەواڵە دەڵێ حوکوومەت بڕیارەکە‌ی ڕۆژی دەی مانگی مەی گرتووە.

هۆکان یەڤرێل بە ڕادیۆی سویدی گوت کە ئەمە زۆر ئاساییە کە کاتێ وەزیر وازی هێنا، منیش داوای وازهێنان لە کارەکەم بکەم. منیش هەر ئەم کارەم کردووە.

وەبیر دێنمەوە کە ستێن تۆلی‌فۆش وەزیری بەرگریی سوید لە ٢٩ی مانگی مارسدا بە دوای ئەو لەقاودرانەی ڕادیۆ سوید لە مۆرکرانی ڕێککەتننامەیەک لە نێوان سوید و عەرەبستاندا بۆ دانانی کارخانەی چەکسازی کرا، وازی لەکاری خۆی هێنا.

هێشتا هیچ کەس وەک جێگری هۆکان یەڤرێل دیاریی نەکراوە.

درەنگانی شەوی رابردوو تاقمێک لە گەنجانی نیشتەجێی گەڕەکی رینکەبی لەو پەڕ ڕۆژاوای ستۆکهۆڵم بەردەبارانی پۆلیسیان کرد. پەڤچوونەکان چەند دەقیقەیەکیان خایاند و لەم پێوەندییەدا دوو گەنج لە لایەن پۆلیسەوە گیران.

کێشەکە لەوەوە هات کە پۆلیس پاش ئاگرکەوتنەوەیەک لە فێرگەی کڤارن‌بی هاتە ناوچەکە. سەدان گەنج لەوێ کۆببوونەوە و پۆلیس پاش ماوەیەک توانی ئاگرەکە بکوژێنێتەوە.