که‌موکووڕییه‌کی زۆر له‌ هه‌ڵسه‌نگاندنی پرسی په‌ناخوازاندا هه‌یه‌

گه‌لێکی په‌ناخوازه‌ ناموسڵمانه‌کان که‌ ڕه‌وانه‌ی عێراق ده‌کرێنه‌وه‌ به‌ هۆی بێسه‌روبه‌ریی قسه‌کانیان و هه‌ڵه‌ و که‌موکورتییه‌کی زۆره‌وه،‌‌ داواکانیان ڕه‌ت ده‌کرێته‌وه‌. ئه‌مه‌ به‌دواداکه‌وتنێکی ڕادیۆی هه‌واڵه‌کانی سوێد ـ ئێکۆت ـ ئاشکرای کردووه‌، که‌ له‌ 53 داوای په‌ناخوازی وا کۆڵیوه‌ته‌وه‌. ئارنێ مالمگرێن که‌ یاساکاره‌ و هه‌ژده‌ ساڵی ته‌واو ‌له‌ ده‌ستگه‌ی کۆچدا بڕیارگر بووه‌، ده‌ڵێت ئه‌و زانیارییه‌ بنه‌ڕه‌تییانه‌ ده‌خرێنه‌ لاوه‌ که‌ بۆ په‌ناخوازی هه‌موار ده‌که‌ن مۆڵه‌تی مانه‌وه‌ی بدرێت‌.

ئارنێ مالمگرێن ده‌ڵێت ده‌ستگه‌ی کۆچ له‌و زانیارییه‌ پاشخانه‌کییانه‌ی په‌ناخوازن ‌ورد ده‌بێته‌وه‌، که به‌ که‌ڵکی په‌ناخواز ناکه‌ونه‌وه‌. له‌ ڕاپۆرتێکی بۆ نموونه‌ هۆوم ئۆفیسدا ئه‌و زانیارییه‌ به‌رچاو گیراون که‌ له‌ به‌رژه‌وه‌ندیی په‌ناخوازدا نین تا ئه‌وانه‌ی که‌ که‌ڵکی ده‌گرن، بۆ ئه‌وه‌ی بتوانن داواکه‌ی ڕه‌ت بکه‌نه‌وه‌ و وڵاته‌وده‌ری بکه‌ن. کاتێک ده‌ستگه‌ی کۆچ بڕیار ده‌گرێت، کارمه‌ندانی ئاماژه‌ به‌و شته‌ ده‌ده‌ن که‌ به‌ لیفۆس ناو ده‌برێت، واته‌ زانیارییه‌کانی وڵاتی په‌ناخوازه‌که‌، بۆ ئه‌وه‌ی یه‌کلای بکه‌نه‌وه‌ که‌ ئاخۆ په‌ناخوازه‌که‌ پێویستی ته‌واوی به‌وه‌یه‌ که له‌ مه‌ترسی بپارێزرێت. هه‌ر بۆ نموونه‌ له‌ ڕه‌تکردنه‌وه‌ی په‌ناخوازییه‌که‌ی خانمێکی عیساییدا ده‌ستگه‌ی کۆچ ئاماژه‌ به‌ ڕاپۆرتێکی هۆوم ئۆفیس داوه‌، که‌ وه‌زاره‌تیی دادی به‌ریتانیایه. له‌ ڕاپۆرته‌که‌دا وه‌سفی وردی ئه‌و هه‌ڕه‌شه‌ و مرۆڕفاندن و ته‌قاندنه‌وه‌ کڵێسه‌ و کرده‌ی تر کراوه که‌ به‌ تووش عیساییه‌کانی عێراقه‌وه‌ هاتوون. به‌ڵام ده‌ستگه‌ی کۆچ ڕاپۆرته‌که‌ هه‌ر بۆ ئه‌وه‌ به‌ کار ده‌بات که‌ جه‌ختی بکاته‌وه‌ بارودۆخه‌ ئاسایشییه‌که‌ی به‌غدا هه‌موار بووه‌. ئێکۆی ڕادیۆی سوێدیش چاوی به‌ 52 پرسی په‌ناخواز گێڕاوه‌ و، برینامه‌ی 32 ـیانی وه‌رگرتووه‌، بۆ ئه‌وه‌ی ئه‌و مه‌رجانه‌ی بۆ ئاشکرا ببێت که‌ ده‌ستگه‌ی کۆچ چاره‌نووسی په‌ناخوازه‌کانیان پێ بڕیار داوه‌. جا دیار که‌وتووه‌ که‌ زۆربه‌ی بڕیاره‌کان له‌ پره‌نسیپ لایان داوه‌. ـ ئارنێ مالمگرێن ده‌ڵێت هه‌ڵسه‌نگاندنی یه‌کگرتوو نییه‌، به‌ڵکه‌ یه‌که‌ی تایبه‌ت به‌ په‌ناخوازان هه‌ن‌ که‌ مۆڵه‌تی مانه‌وه‌ی په‌ناخواز ده‌ده‌ن، هه‌یشیانه‌ داوای په‌ناخوازان ڕه‌ته‌وه‌ ده‌که‌ن، به‌ڵام هه‌موویان له‌ هه‌مان هۆ و بنه‌ماوه‌ ده‌ست پێ ده‌که‌ن.  له‌ به‌دواداچوونه‌که‌ی ڕادیۆی هه‌واڵه‌کانی سوێددا ئه‌و مه‌رجانه‌ی به‌ڵگه‌نواندن خراونه‌ته‌ ڕوو که‌ زۆرجار عه‌قڵ نایانگرێت. بۆ نموونه‌ سه‌میر که‌ عیساییه‌ و له‌ کۆمپانیایه‌کی ئاساییشپارێزی ئه‌مه‌ریکیدا کاری کردووه‌ و، که‌ به‌و هۆیه‌وه‌ ئه‌لقاعیده‌ و هه‌م گرۆی تێرۆرکاری شیعه‌کان به‌ دژمنی خۆیان داناوه‌، گوتوویه‌تی که‌ هه‌م به‌ ته‌له‌فۆن هه‌م به‌ نامه‌ هه‌ڕه‌شه‌ی کوشتنی لێ کراوه‌. به‌ڵام ده‌ستگه‌ی کۆچی سوێد به‌سه‌رهاته‌کانی سه‌میری پێ ڕاست نین، چونکه‌ هه‌ڕه‌شه‌نامه‌که‌ی ئه‌و ده‌یڵێت ئیمزای پێوه‌ نه‌نراوه‌‌ و ئه‌وانه‌ی به‌ ته‌له‌فۆن هه‌ڕه‌شه‌یان لێی کردووه‌، خۆیان پێی نه‌ناساندووه‌.  سه‌میر دوای هه‌ڕه‌شه‌کان هه‌ڵهاتووه‌ و له‌ ماڵی خوشکه‌که‌ی خۆی وه‌شاردووه‌‌، به‌ڵام توندڕه‌وه‌کان به‌ ماڵی خۆشکیان زانیوه‌ و، سا که‌ هه‌ڕه‌شه‌ی تریان به‌ نامه‌ لێی کردووه‌، خوشک و زاواکه‌ی له‌ ترسی گیانی خۆیان عێراقیان به‌ جێ هێشتووه‌. به‌ڵام ئه‌و هه‌ڕه‌شانه‌ی بۆ نموونه‌ له‌ سۆنیای خۆشکی کراون، ده‌ستگه‌ی کۆچ‌ گومانی لێیان نییه‌ و به‌ شیاویان داناوه‌ مۆڵه‌ت بدرێت، به‌ڵام سه‌مری برای نابێت، لێره‌ بمێنیته‌وه‌. ئارنێ مالمگرێنی یاساکار، که‌ له‌ به‌هاری ئه‌مساڵدا وازی له‌ کاری ده‌ستگه‌ی کۆچ هێناوه‌، ئیتر ـ دیاره‌ خۆی ده‌ڵێت ـ له‌ باریدا نه‌ما ئه‌و نابه‌کارییه‌ی ده‌ستگه‌ی له‌ ڕووی پاراستنی ئاساییشی په‌ناخوازه‌وه‌ ده‌یکات،‌ قه‌‌بووڵ بکات. ئارنێ مالمگرێن لای وایه‌ که‌ سیاسه‌تی کۆچ به‌ده‌م ڕۆژگاره‌وه‌ دژوار بووه‌ و تا دێت دژوارتر ده‌بێت و ئیتر بۆ هه‌موو که‌سێک سه‌خت ده‌بێت‌ مۆڵه‌تی مانه‌وه‌ی له‌ سوید پێ ڕه‌وا ببینرێت. ئه‌م گۆڕینی نه‌ریتی کارکردنه‌ که‌ ڕێبه‌رانی سه‌ره‌وه‌ بڕیاریان داوه بۆ ئه‌وه‌ به‌رپا کراوه‌ که‌ وه‌ک زه‌نگی کاریگه‌ری بکه‌وێته‌وه‌. ئه‌م کاره‌ ده‌بێت وه‌ک زه‌نگ وا بێت و ڕایبگه‌یه‌نێت ئیتر که‌س بیر له‌وه‌ نه‌کاته‌وه‌ بۆ سوید بێت و کاری وا که‌ڵکی ناگرێت. ئارنێ مالمگڤیستی یاساکار ده‌ڵێت، که‌ دوا 18 ساڵی کارکردن له‌ ده‌ستگه‌ی کۆچ ئێستا وازی له‌و کاره‌ی هێناوه‌.به‌ڵام ده‌ستگه‌ی کۆچ ئه‌م ڕه‌خنانه‌ ڕه‌ت ده‌کاته‌وه‌ و میکایێل ریببێنڤیکی ده‌ستگه‌که‌ ده‌ڵێت، ئاسان نییه‌ هه‌موو ده‌ستگه‌یه‌کی ده‌وڵه‌ت هه‌موو دادگه‌یه‌ک هه‌ڵوه‌سته‌یه‌کی یه‌کگرتووی یاساییان هه‌بێت. کاری ئێمه‌ نواندنی هه‌ڵوه‌سته‌یه‌ یاساییه‌ و بڕێار به‌ نموونه‌ ده‌گرین و ڕێکار له‌ کتێبی ڕێنوێندا دیاری ده‌که‌ین بۆ ئه‌وه‌ی هه‌وڵی ئه‌وه‌ بده‌ین یبه‌ یه‌ک شێوه‌ ڕه‌چاوی یاسا بکه‌ین، که‌سێکیش ئه‌مه‌ی قه‌بووڵ نه‌بێت پارێزه‌ری بۆ ده‌ستنیشان کراوه‌ که‌ یاریده‌ی ده‌دات و ده‌توانێت پرسه‌که‌ی به‌ دادگه‌ بگه‌یه‌نێت. میکایێل ریببێنڤیک ده‌ڵێت