سوید، په‌یماننامه‌ی جیهانیی مافی منداڵان پێخوست ده‌کات

پاش بڕیاری ده‌رکرانی ژنه‌ ڕووس ئیننا و کچه‌ ساوا‌که‌ی، باسی پێشێلکرانی په‌یمانی جیهانیی مافی منداڵان له‌ لایه‌ن حکوومه‌تی سویده‌وه‌ هاتۆته‌ گۆڕێ‌. هه‌روه‌ها ئه‌و ڕه‌خنه‌یه‌ش به‌رزبۆته‌وه‌ که‌ بۆچی ڕێسای نه‌ته‌وه‌یی له‌ په‌یمانه‌ واژۆکراوه‌ نێونه‌ته‌وه‌ییه‌کان به‌ گرنگتر ده‌گیرێت؟

 لارش گوستاڤسۆن پزیشکی منداڵان ده‌ڵێ بێتوو سوید ئه‌و ژنه‌ بگه‌ڕێنێته‌وه‌ ڕووسیه‌، ئه‌وا سوید ئه‌م پێشێلکارییه‌ی کردووه‌ بۆیه‌ باشتره‌ وه‌ها بڕیارێک نه‌دا. به‌ گوێره‌ی بڕیاری ده‌زگاای کۆچ، ئیننا و کچه‌ تازه‌له‌دایکبووه‌که‌ی ده‌بێ سوید به‌جێ بێڵن و له‌ مێرد و منداڵه‌که‌ی تری که‌ پێشتر مۆڵه‌تی مانه‌وه‌ له‌ سویدیان هه‌یه‌ جودا ببنه‌وه‌ و له‌وێ ده‌بێ داوای په‌نابه‌ریی بکه‌ن.

ئه‌م چاوه‌ڕوانییه‌ ڕه‌نگه‌ ته‌نانه‌ت زیاتر له‌ شه‌ش مانگ بخایێنێ. هه‌رچه‌ند گه‌ڕاندنه‌وه‌ی منداڵ دژایه‌تییه‌ له‌گه‌ڵ په‌یمانی جیهانیی مافی منداڵان، به‌ڵام توبییاس بیلستروێم وه‌زیری کۆچ پشتی ئه‌م بڕیاره‌ ده‌گرێ و ده‌ڵێ په‌یمانی جیهانی منداڵان به‌شێک له‌ یاسای نه‌ته‌وه‌یی ئێمه‌ نییه‌ و پێویست ناکا له‌ به‌ر چاوبگیرێ.، چونکه‌ ته‌نیا بۆ ڕێنوماییه‌ نه‌ك شتێکی دی.

کریستینا هێلبۆرن، پارێزه‌ی منداڵان له‌ یونیسێف ده‌ڵێ ئێمه‌ پێمان سه‌یره‌ که‌ داخوویانیی وا له‌ لایه‌ن بڕیارده‌رانه‌وه‌ بڵاو ده‌کرێته‌وه‌ و پێشلی ڕێککه‌وتنامه‌ جیهانییه‌که‌ی له‌ سه‌ر مافی منداڵان ده‌کرێ له‌ حاڵێکدا سوید بیست ساڵ له‌وه‌ پێش به‌ واژۆکردنی، خۆی پێوه‌ گرێداوه‌ و ئێستاش ناچاره‌ ڕه‌چاوی بکات.