Neve miljardura pe kodol so si te peren avri anda e nasvalengo insuranso
E 50 000 manush so hasaren e nasvalenge love katar pengo nasvalengo insuranso len jekh nevo zutipe. O regeriungo del neve love ande tomnako budzeto ande jekh buciakomarketosko politicno programo pe introdukcia. Kado te na peren e nasvale manush bi lovengo.
Kado si pa kodol manush so si nasvale lungo vrama. Jekh nevo zakono avilas ande kado bersh ke del pe jekh vrama sode vrama e nasvale birin te len love katar e försäkringskassan.
Akanak del o regeriungo 17 miljardura koroni tela 3 bersh thaj o ghindo si te del pe zor thaj te sashtarel pe e nasvalen te birin te dzan palpale ande buci. 1,5 miljardura koroni dzal khaj e Arbetsförmedlingen te birin te dzanen sar te birin e nasvale te dzan palpale ande buci.
O maj cino pocin avla 223 koroni ande jekh dzes, thaj kodo kon si ande a-kassa lela katar 320-680 koroni ande dzes. Te na dinov kado zutipe o regeriungo pelov but manush khaj o socialo te len o ekonomicno zutipe.
