بنکه‌ نه‌خۆشه‌وانیی تایبه‌ت فێڵ له‌ ئه‌نجوومه‌نی پارێزگه‌کان ده‌که‌ن.

بنکه‌‌ نه‌خۆشه‌وانییه‌ تایبه‌ته‌کان هه‌موو ساڵێک، به‌فڕوفێڵ، میلیۆنان کرۆنی پاره‌ی باج وه‌ک بایی چاره‌سه‌کردن و ئازماییشکردنی نه‌خۆشیان ده‌ست ده‌که‌وێ. ئه‌مه‌ بۆ ڕادیۆی هه‌واڵه‌کانی سوێد ئاشکرا بووه‌ که‌ په‌یامنێره‌که‌ی چاوی به‌ ئێمماناوێک که‌وتووه،‌‌ له‌ بنکه‌یه‌کی پزیشکی تایبه‌تدا ـ  له‌ ستۆکهۆلم  ـ کاری کردووه‌. ئێمما بۆ په‌یامنێره‌که‌ی گێڕاوه‌ته‌وه‌ که‌ چۆن سه‌رۆکی کاره‌که‌ ناچاری کردووه‌ له‌ ژمێرکاری و ڕاگه‌یاندنی کاره‌کاندا فێل بکات بۆ ئه‌وه‌ی پاره‌ی زیاتری له‌ ئه‌نجوومه‌نی کاروباری نه‌خۆشه‌وانیی پارێزگه‌ دابپچڕیت.

به‌ڵام ئێمما نایه‌وێ ده‌نگی بناسرێته‌وه‌ بۆیه‌ که‌سێکی تره‌ قسه‌کانی ده‌کات و‌ ده‌ڵێت، جارێ ناچاری کردم شتێک له‌ جیاتی جارێ دووجار بنووسم، که‌ وتم ئه‌مه‌م به‌لاوه‌ کارێکی ناڕه‌وایه‌، هه‌ڕه‌شه‌ی ئه‌وه‌ی لێ کردم ئه‌گه‌ر به‌ قسه‌ی بشکێنم هه‌ر بۆی ئاشکرا ده‌بێت.

دوا دوودڵییه‌کی زۆر ده‌چیته‌ سه‌ر باسی ئه‌وه‌ی که‌ له‌و بنکه‌ نه‌خۆشه‌وانییه‌ تایبه‌ته‌دا فێل ده‌کرا که‌ خۆی جاران کاری لێدا ده‌کرد. به‌ڵام ڕادیۆی هه‌واڵه‌کانی سوێد هه‌ر به‌ ئێمماوه‌ نه‌وه‌ستاوه‌ به‌ڵکه‌ نێوانی به‌ گه‌لێک نه‌خۆشه‌وان و په‌رستار، و سکرتێری پزیشک و هه‌روه‌ها پزیشکی تره‌وه‌ به‌ستووه‌، که‌ هه‌موویان ڕاستیی ئه‌م جۆره‌ فێڵانه‌ ده‌سه‌لمێنن و هه‌ر هه‌موویان به‌سه‌رهاتی وا ده‌گێڕنه‌وه‌ که‌ ئه‌و جۆره‌ تۆماری ساخته‌کارییانه‌ ده‌گرنه‌وه‌ که‌ بۆ ئه‌وه‌یان کراون پاره‌ی زۆر و زۆرتر له‌ ئه‌نجوومه‌نانی کاروباری نه‌خۆشه‌وانیی پارێزگه‌کان به‌ ده‌ست بهێنن.

به‌ڵام ئه‌م جۆره‌ فێڵه‌ که‌ ته‌شه‌نه‌ی کردووه‌ شتێک نییه‌ بۆ زۆر لایه‌نی پێوه‌ندیدار ئاشکرا نه‌بووبێت. و ئه‌نجوومه‌نی کاروباری نه‌خۆشه‌وانیی پارێزگه‌ی ستۆکهۆڵمیش به‌مه‌ی زانیوه‌ که‌ سه‌رۆکپزیشکانی ئه‌نجوومه‌نه‌که‌ ـ هێنریک ئالمکڤیست ـ له‌ خه‌رج و تێچووی ئه‌م فڕوفێله‌ کۆڵیوه‌ته‌وه‌، واته‌ ئه‌م بنکه‌ نه‌خۆشه‌وانییه‌ تایبه‌تانه‌ چه‌ندێکی ئه‌و پاره‌یه‌ی باج به‌ خۆڕایی ده‌خۆن، که‌ له‌ داهات و مووچه‌ی خه‌ڵک ده‌گیرێته‌وه‌ بۆ ئه‌وه‌ی ده‌وڵه‌ت بتوانێ خزمتی پێویست بۆ خه‌ڵکه‌که‌ دابین بکات.  

دیاره‌ به‌ مه‌زه‌نه‌ی هێنریک ئالمکڤیست ئه‌م فڕوفێله‌ هه‌ر له‌ ستۆکهۆڵم 50 میلیۆن کرۆنی تێ ده‌چێت، چجای شار و پارێزگه‌کانی تری سوێد. بۆ ئه‌مه‌یش ڕادیۆی هه‌واله‌کانی سوێد ئه‌مه‌ی له‌ هه‌موو نه‌جوومه‌نانی کاروباری نه‌خۆشه‌وانیی پارێزگه‌کانی سوێد پرسیوه‌، که‌  نۆزده‌ له‌ بیستی ئه‌نجوومه‌نه‌کان وه‌ڵامیان داوه‌ته‌وه‌ و به‌مه‌یش دیار که‌وتووه‌ که‌ هه‌موو ساڵێ چوار میلیارد کرۆنی پاره‌ی باج به‌م جۆره‌ بنکه‌ نه‌خۆشه‌وانییه‌ تایبه‌تانه‌ ده‌ده‌ن. به‌ڵام هێشتا ئاشکرا نییه‌ که‌ چه‌نێکی ئه‌م پارانه‌ به‌ فڕوفێڵ به‌و بنکانه‌ ده‌ده‌ن و ئه‌گه‌ر ئه‌م جۆره‌ ساخته‌کارییه‌ی له‌ ستۆکهۆڵم ده‌کرێت له‌ سه‌رانسه‌ری سوێدیشدا هه‌ر وا بیت دیاره‌ هه‌موو ساڵی 100 میلیۆن کرۆن زیاتر به‌ فڕوفێل ده‌خورێ. دیاره‌ بۆ ئه‌م بنکه‌ نه‌خۆشه‌وانییانه‌ ئاسانه‌ فێلی وا له‌ سیستمی نه‌خۆشه‌وانیدا بکه‌ن، ئه‌مان له‌جیاتی ئه‌وه‌ی دیاری بخه‌ن نه‌خۆشی سه‌ردانێکی ئاسایی پزیشکی کردووه‌، زۆر ئاڵۆزی ده‌که‌ن و شتی تری له‌ پاڵ ده‌خه‌ن و به‌مه‌یش بنکه‌که‌ پاره‌ی زیاتری له‌ ئه‌نجوومه‌نی پارێزگه‌وه‌ پێ ده‌درێت. جا چاره‌کردنێکی ئاسایی که‌ بیست خوله‌ک ده‌خایه‌نێ  و بۆ ئه‌نجوومه‌نی پارێزگه‌ 700 کرۆنێکی تێ ده‌چێ، ئه‌م بنکانه‌ چاره‌سه‌ره‌که‌ زۆر گه‌وره‌تر ده‌که‌ن و له‌وانه‌یه‌ دووهه‌زا تا سێ هه‌زار کرۆنیان بۆی ده‌ست بکه‌وێ.

ئه‌م جۆره‌ فێڵه‌ بۆ له‌مه‌ولایش هه‌ر به‌رده‌وام ده‌بیت چونکه‌ ئاشکرابوونی ئاسان نییه‌. به‌ڵام بۆ ئه‌وه‌ی ڕیی بگیرێت ده‌بیت ئه‌نجوومه‌نی کاروباری نه‌خۆشه‌وانیی پارێزگه‌کان کۆنترۆلی بنه‌مای فاتووره‌ و پسووله‌ی خه‌رجی و تێچووه‌کانی نه‌خۆشه‌وانی بکات و له‌گه‌ڵ تۆماری نه‌خۆشه‌کاندا به‌راوردی بکات و بزانێت که‌ دێنه‌و سه‌ر یه‌ک. به‌ڵا ئه‌م جۆره‌ کۆنترۆله‌ زووبه‌زوو ئه‌نجام نادرێت. هێنریک ئالمکڤیست که‌ سه‌رۆکپزیشکی سه‌ر به‌ ئه‌نجوومه‌نی کاروباری نه‌خۆشه‌وانیی پارێزگه‌ی ستۆکهۆلمه ده‌ڵیت سیستمی نه‌خۆشه‌وانیی له‌سه‌ر بنه‌مای ئه‌وه‌ پێک هێنراوه‌ که‌ که‌سی نه‌خۆشه‌وان ده‌بێ جێی باوه‌ڕ بێت و فڕوفێلی لێ نه‌وه‌شێته‌وه‌.‌