حوکمه‌ت سه‌رۆکی سیدا له‌ کار ده‌خات

حوکمه‌ت ئه‌مڕۆ بڕیاری دا سه‌رۆکی گشتیی ڕێکخراوی کۆمه‌که‌ داراییه‌کان ـ سه‌رۆکی سیدا ـ ئاندێرش نوردستریۆم له‌ کار بخا و ئه‌م ده‌ستگه‌یه‌ ـ که‌ ڕه‌خنه‌ی توندی به‌ گژدا کراوه‌ ـ سه‌رله‌نوێ دابڕێژێته‌وه‌. وه‌زیری کۆمه‌که‌ داراییه‌کان ـ گونیلله‌ کارلسۆن ـ به‌ هۆی که‌موکورتی و هه‌ڵه‌ی سیستمی کاره‌کانه‌وه‌ ڕه‌خنه‌ی توندی له‌ به‌ڕێوه‌به‌رایه‌تیی ڕێکخراوه‌که‌ هه‌یه‌، که گه‌نده‌ڵی و فڕوفێڵی ئابووریی لێدا که‌وتووه‌ته‌وه‌.

گونیلله‌ کارلسۆن ده‌ڵێ سیدا له‌ ساڵانێکی زۆره‌ کێشه و که‌موکورتیی زۆری له‌ کارگێڕانی ئابوورییه‌که‌ی و ڕێکخراوه‌که‌یدا هاتووه‌ته‌ ڕێ.

ئه‌م ده‌ستگه‌یه‌ که‌ بودجه‌یکی نۆسه‌دمیلۆینی هه‌یه‌، چلوپێنجمیلیۆن کرۆن که‌میی هێناوه و، به‌م هۆیه‌وه‌ وه‌زیری کۆمه‌که‌ ئابوورییه‌کانی گۆنیله‌ کارلسۆن له‌ سیاتی نیوزمیللی هه‌واڵه‌کاندا ستوونێکی نووسیوه‌ و لێیدا ڕوونی کردووه‌ته‌وه‌ که‌ کۆمه‌ک و به‌ڕێوه‌بردنی کۆمه‌که‌کان هه‌ڵی گه‌وره‌ی له‌ سیستمدا هه‌ن، به‌تایبه‌ت ئه‌و گه‌نده‌ڵییه‌ ئاوڕووچووێنه‌ی که‌ هاوینی پار له‌ زامبیا که‌وته‌وه‌ و، ئاشکرا بوو ئه‌و کۆمه‌که‌ داراییه‌ی سوێد بۆ پرۆژه‌یه‌کی ته‌ندروستی له‌ زامبیا دابین ده‌کات، زۆری ده‌خورێ و سیدایش ده‌می ناوه‌ته‌وه‌. سا بۆ ئه‌وه‌ی سیدا بتوانێ که‌موکورتییه‌ به‌رچاوکه‌وتووه‌ کارگێڕی و ئابووری و ڕێکخراوه‌ییه‌کانی بهێنێته‌وه‌ جێ، حوکمه‌ت وا بڕیاری داوه‌ ڕێکخراوه‌که دابڕێژێته‌وه‌. ‌ ‌

له‌به‌ر ئه‌وه‌ی ده‌سته‌ی به‌ڕێوه‌به‌ری ئه‌م ڕێکخراوه‌ بایه‌خێکی زۆری به‌ بڕێوه‌بردن و کۆنترۆڵکردنی ناوخۆیی نه‌داوه‌ و، ئه‌مه‌یش کاری له‌ شێوه‌ی کارگێڕانی کۆمه‌که‌ ئابوورییه‌کانی کردووه‌ و له‌به‌ر ئه‌وی سیدا هێشتا نخشه‌یکی متمانه‌به‌خشی دانه‌هێناوه‌ باره‌ ئابوورییه‌که‌ی ده‌ستگه‌که‌ هاوسه‌نگ بکات، گونیللا کارلسۆنی وه‌زیری کۆمه‌که‌ ئابوورییه‌کان، که‌ خۆی به‌ برپرسی ئه‌م کایه‌ سیاسییه‌ ده‌زانیت، به‌ گرنگی گرتووه‌ چاره‌ که‌موکورتییه‌کانی سیدا بکات. سیدایش دیاره‌ ده‌ستگه‌یه‌کی سه‌ر به‌ وه‌زاه‌تی ده‌ره‌وه‌ی سوێده‌ و به‌پێی نامه‌یه‌کی ساڵانه‌ی حوکمه‌ت ئامانج بۆ کاره‌کانی ئه‌م ڕێکخراوه‌ دیاری ده‌کرێت و دیاره‌ ئه‌و پاره‌یه‌یش که‌ بۆ ئه‌نجامدانی کاره‌کان به‌ پێویست ده‌زانرێت. سیدا کۆمه‌کی کاری کورتخایه‌نی مرۆیینه‌ و کاری درێژخاینی په‌ره‌پێدان ده‌کات و بۆ نموونه‌ کاره‌ کورتخایه‌نه‌کانی له‌ کاتی که‌وتنه‌وه‌ی ناکۆکی و کاره‌ساتی سروشتیدا ئه‌نجام ده‌دات. بۆ بودجه‌ی ئه‌مساڵی کۆمه‌که‌کانی ئه‌م ڕێکخراوه‌یه‌یش حوکمه‌ت زیاد له‌ سیویه‌ک میلیارد کرۆنی ته‌رخان کردووه‌‌.