بۆسنه‌ییه‌ک له‌ سوید به‌ گومانی تاوانکاری جه‌نگ دادگایی ده‌کرێت

ئه‌مڕۆ له‌ دادگای سویددا دوا پرۆسه‌ی به‌ڵگه‌هێنانه‌وه‌ له‌دژی ئه‌و پیاوه‌ بۆسنه‌ییه‌ به‌ ڕێوه ‌ده‌چێت که‌ گومانی تاوانی جه‌نگی لێ ده‌کرێت. ئه‌و پیاوه‌ که‌ ته‌مه‌نی 43 ساڵه‌ و جنسییه‌ی سویدی هه‌یه‌ له‌ سه‌ره‌تاکانی 1990  دا وه‌ک پاسه‌وانی ئۆردوگا له‌ هێرزێگۆڤینیا کاری کردووه‌ ، له‌ مانگی یانوه‌ری ساڵی ڕابوردوودا به‌ هاوکاری کۆمسیۆنی سویدی تایبه‌ت به‌ تاوانکاریی جه‌نگ و دادگای هاگ له‌ هۆڵه‌ندا که‌ سه‌ربه‌ڕێکخراوی نه‌ته‌وه‌ یه‌کگرتووه‌کانه‌ و تایبه‌ته‌ به‌ داداگایی کردنی تاوانکارانی سه‌رده‌می جه‌نگی هه‌ڵوه‌شانده‌وه‌ی یوگوسلاڤیا ، ده‌ستگیر کرا.

گومانه‌کان له‌سه‌ر ئه‌و پیاوه‌ بۆسنییه‌ له‌ لایه‌ن شایه‌تحاڵانی سربییه‌وه‌ جه‌ختی لێ ده‌کرێته‌وه‌ که‌ داوای سه‌رجه‌م پێنج ملیۆن کرۆن قه‌ره‌بوو ده‌که‌نه‌وه‌. گه‌ر گومانه‌کانیشی له‌سه‌ر ساغ ببنه‌وه‌ 10 ساڵ یان زیندانی هه‌تایی  چاوه‌ڕێی ده‌کات.