Nationalno

Sar te trades ando Almedalen kana naj tu but love?

4:59 min

O Almedalen-kurko kaj si inkherdo ando Visby, Gotland, si jek anda le maj popularni eventura thela intrego bersh ando Svedo. 

O evento del e manushen possibilita te shunen e maj aktualni politicni seminariji, te dikhen so kerdzol ande kultura, te len e maj aktualni nevimata - zi kaj shukar resturanura thaj festura zi de tehara.

Ferik ke anda o baro populariteto pharesij te arakhes than kaj te soves, thaj vi dosta uchej e chimina po habe ande zurales but thana. Sar apol te dikhes o Almedalen kana naj tu kade but love vaj kam san studento?

E Karin Lindvall, kordinatorka ando Region Gotland kaj si värdar po evento, del tipsura sar maj lezno te les hasna o Almedalen kurko.

- Shaj trades parahodosa, kodi si e maj lezna alternativa. Thaj ame phutas avri shkolake sali avri kodolenge kaj kamen te trajin maj lezno. Atunchi ande gruppa soves ande shkolaki sala pe zurali phuv, zurales lezno. Shaj trajin pe hostelura, vaj vandrarhem vaj privatnie chi kodo naj kuch. Kan les udzalo thela kurko das avri manre de tehara, po luncho thaj pala mizmeri thaj kava mashkar kado, sa kado po jiva kana les udzalo ande seminariji. Thaj karing e rachi shaj hal o manush ando resturano vi lezni thaj vi maj kuch, phenel e Karin Lindvall.

Ferik ke sakone manusheski posochi si diferetno thaj so jekheske si lezno shaj avel e kavereske kuch vaj so jekheske kuch e maj barvaleske lezno. Soske chimina shaj zukarel o manush kaj si maj cine po habe thaj kaj te soves?

E Karin Lindvall majdur.

- Shaj has habe de katar o Mcdonalds-levelo zi kaj maj kuch sar kaj si ande maj lashe resturanura. O adjesutno lunchi biris te arakhes pe 50-60 koroni kathe ando Visby, thaj vi pe rachate shaj has ande maj lezni resturanura. Te soves ande shkolaki sala, birin 10-zene te soven pe 1 500 koroni pek rat. Privatnie site zas pala marketi. Si vi maj lezni thaj vi maj kuch thana kaj te soves, phenel e Lindvall.

O Almedalen-kurko si inkherdo thaj arrangovano po Gotland aba opral e 40-bersh. Thaj sako falo las kana o Olof Palme inke sas edukaciako ministro thaj vorbias opral katar jek tiro vaj lastbilsflak pasha kruttornet ando Almedalen.

Ferik adjes thela bersh kherdzilas kado evento o maj baro politicno than kaj maladzon manush thela bersh ando Svedo, kaj si opral e 2 500 eventura pe jek than.

E Karin Lindvall anda Region Gotland, phenel ke trobuj jek plano te avel manushes so kames thaj te dikhes kana aves kathe po Almedalen, ke kade shaj kerdzol eksera za but.

- Kana aves kathe trobuj jek plano, so kames te kheres, kasa te maladzos, save si mange e maj importantni tematura, kado si te dikhel o manush zipon aves. Ke kade aves kathe thaj shaj avel za but ke kichi but programuraj, anda kode sital tu plano. Thaj kodo inkres dosta zurales, ferik vi san phuterdo pe pharujimata te kheres vareso kaver, o maj importanto si ke kathe biris te maladzos intregi manushensa ke sa si phuterdo, phenel e Karin Lindvall kordinatorka ando Region Gotland.