Idre/Eajra

Eajra čearru ii ožžon veahki Riikkabeivviid áššeolbmás

Meahcceeallit leat stuora váttisvuohtan Ruoŧa oarjeleamos čearrui ja sin ballet ahte boazodoallu galgá nohkat jus eai oačču veahki unnidit daid. Boazodoallit oidnet ahte meahcceeallit váldet beali sin ealus. Čearru moaitá Dalarna leanastivra go eai ipmir sin váttisvuođa.

Eajra čearru dolkkai Dalarna leanastivrra meahcceealli hálddahussii ja váide leanastivrra riikabeivviid áššeolbmái (JO) Muhto riikabeivviid áššeolmmái ii váldán ášši.

– Čearru váiddii leanastivrra go sin eai vástit reivviide ja go sii eai bargga meahcceeallihálddahusain, dadjá Benny Jonsson, čearu ságadoalli.

Ságadoalli muitala ahte čearru lea dán dálvvi bargan eanet meahcceelliiguin go boazodoaluin. Dat lea čuohcan ekonomalaččat ja čohkken maŋŋonii dálvet. Leanastivrras eai leat ovttaoaivilis čearuin ja atnet sin leat bargan eanet go iežá leanastivrrat meahcceeallihálddahusain.

– Mis ii leat vejolaš čuohti prosentii ipmirdit čearu hástalusaid. Muhto mu mielas lea leanastivrras leamaš buorre ságastallan. Sihke čearru ja mii leat buktán oaiviliid got meahcceeallihálddahus galggalii doaibmat, dadjá Jonas Bergman, Dalarna leanastivrras.

Čearu bealis ledje sávvan ahte riikabeivviid áššeolmmái livččii sin veahkehan. Ságadoallis ii leat báljo luohttámuš leanastivrra meahcceeallibargui.

– Mii leat jearran deaŧalaš áššiid, muhto eat leat ožžon vástádusa. Min mielas lea leanastivra heaitán bargat meahcceealliplánain. Mii leat áidna čearru olles Dalarna leanas ja danin galggalii leanastivrras návccat bargat áššiiguin mat gusket midjiide, dadjá Benny Jonsson.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Sveriges Radio