Genetika pala anorexia?

2:31 min

Le roditora kerde jekh genetishno studia pe anorexia oud te zanen avri maj but o grundo kaj kado ätstörning vaj habeski problematika.

Jekh anda sherutne ande kadi studia e Cynthia Bulik kaj vi kerel rodipe pa anorexia ande Karolinska institutet kate ando Shvedo thaj vi ande Amerika penel che interesno si kadi studia kana dikle ke naj feri jekh psykiatrishno nasvalipe.

Ande kadi studia line dna katar opral 3000 manush kas si anorexia thaj pashti 11.000 manushendar kas naj kado habesko problemo.
Thaj pala kado resulato sikadjilas ke kado nasvalipe naj feri psykiatrishno.

Feri siles vi jekh grundo ando metabolismo. Kado si jekh zurales interesno resulato ke o gindo sas mindig ke o aneroxia nervosa si jekh psykiatrishno nasvalipe.

O panglipe si sar mashkar unji aspektora kaj si ande fetma thaj tulipe. Kate sikadjol ke shaj aven sakodol geni pangle andre feri anda varisosko grundo djalalij ande jekh zafsom kaver rig.

Oud te acharel kado o manush das e Cyntia Bulik jekh exemplo pe manush kas si fetma vaj tulipe thaj butivar kerde dieta che butesa maj letkoj pale te djan opre ande vaga, kana pale kezdin te hann, thaj le anorexia pasientora kaj den opre ande jekh normalno vaga pale shaj sigo hasaren kodi vaga, kade ke o tulipe thaj e anorexia si sako pe pesko agor pe jekh linija.

Ferik ke savo proseco shaj avel o grundo kaj kado chi zanen inke le roditora, thaj trubon te keren maj dur rodipe ande kado.

Feri e Cynthia Bulik pashal ke kadi studia dela motivatsia le roditoron te diken inke maj dur so shaj aven le grundora kaj e anorexia, thaj si positivni pe maj angle ande kadi buchi