Dološ kamerain govvi sámiid eallima
Dál lea govvejeaddji Hans Jonsson plánegoahtán čájáhusa govaiguin maid lea govven ja muitalusaiguin maid lea gullan. Lea nubbi geassi go son lea leamaš Sámis govveme.
Govvejeaddji Hans Jonsson geavaha dološ kámera ja dat gáibida ahte son pláne govaid dárkilit. Ii sáhte nugo ođđaáigásaš digitálakámerain govvet olles ráiddu govaid.
– Dán áiggi leat nu hirbmat ollu govat juohke sajis, nu ahte adno juoga eará vai olbmot bisánit geahččat. Mun jáhkán ahte olbmot soitet jurdilit veaháš dobbelii das movt lea leat sápmelaš.
120 kg rusttegat
Lea ádjás bargu, ja dasa adnojit ollu diŋggat. Ieš govvateknihkka hutkojuvvui jagi 1851, muhto kámera lea ođđaseabbo, go dat ii leat go birrasiid 100 jagi boaris.
Ovdal go govve ferte njuoskadit pláhta man ala govve, ja maŋŋel govvema ferte dagahit gova.
– Mun lean guhká bargan govvejeaddjin ja lean máŋgga lágan kámeráid geavahan, dieđusge maid digitálakámeraid ja dihtoriin divodan govaid, muhto njealje jagi áigi fuomášin dán vuogi ja dál lean darvánan dasa, muitala Jonsson.
Ovddit geasi lei vuohččan govveme sápmelaččaid. Son vásihii ahte fertii čilget olbmuide manin son lei boahtán govvet ja maid galgá govaiguin, iige lean riekta vuordán ahte galggai leat váttis beassat govvet.
– Dat lea ádjás proseassa ja dan olbmot ipmirdit. Sii váldet maid dili muinna humadit ja muitalit munnje fearániid. Ja dat lea hui mávssolaš.
Áigu čájehit movt sápmelaččat ellet
Dál son lea álgán ovttas kuratoriin geahččat ja válljedit govaid čájáhussii. Son háliida čájáhussii maid čállit olbmuid muitalusaid, muhto go govven válddii nu ollu áiggi geasset de ii astan čállit maid olbmot muitaledje. Son boahtá váldit oktavuođa singuin geaid lea govven vai beassá jearahit sin.
Juste goas ja gos čájáhus galgá leat ii dieđe vel, muhto su jurdda lea ahte galgá leat oaidnin ládje maid Sámis.
