Stina Pavval: Stipeanddat livčče movttidahttán

Seammás go Stina Pavval ráhkada dokumentárafilmma Árjepluovve filbmafestivála birra de leat sus guokte barggu. Son illosa go gullá ahte sámedikki kulturlávdegottis lea áigumuš ásahit bargostipeanddaid kulturbargiide.

Son lea vel maŋemus oasážiid govveme ovdal beassá čuohppagoahtit filmma mii galggašii šaddat su vuosttaš dokumentáran.
Váldobargun buvttada Stina Pavval Árjepluovve filbmafestivála, mii lágiduvvo juohke guovvamánu. Diibmá lei earenoamáš vásáhus go ovtta filmmas lei vuosttaščájáhus.  

– Mii lebbiimet rukses mátta ja mis ledje pressegovvejeaddjit ja sii ožžo diplomaid ja bálkášumiid, muitala Stina Pavval.

Dálvái sávvá son gárvet iežas dokumentára ja vuosttaščájáhus šaddá dieđusge Árjjepluovves.

Ollu kulturbargit Sámis
Su lágánat leat sámis ollu, kulturbargit geaidda váldobargu bukta duššo oasi birgejumis, dasa áiggošii sámediggi dál rievdadusa. Mannan vahku dohkkehii dievasčoahkkin kulturdoaibmaplána mas oassin lea áigumuš ásahit bargostipeanddaid kulturbargiide.
Dan dihte vai eambbogat bálleše ollesáiggi bargat kultuvrrain.

Movt ja makkár ruđain dat galggašii dahkot lea ain guorahallamis. Muhto kulturlávdegottis lea nana jáhkku ahte čoavdášuvvá.

– Dat ii galgga váldit nu guhkes áiggi, ii gánnit buktit evttohusa ja diktit dan orrut dassážii mandáhtaáigi nohká. Mun goit anán ahte mii galgat nu johtilit go máhttit geahččalit oažžut mátkái stipeandaortnega, dadjá Ingrid Inga, sámedikki kulturlávdegotti ságadoalli. 

Áigumuš lea dán mandáhta áigodaga siskobealde?

– Juo, dán vai boahtte jagi maŋemus, lohpida Ingrid Inga.

- Dat livččii albma buorre. Mun barggan ortnetváktan vahkkoloahpaid ja friddja áigi ii oro goassege. Friddja vahkkoloahpa gal dohkkešii muhtomin, dadjá Stina Pavval.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Sveriges Radio