BRIS del e shavoren suporto karing o Coronaviruso

6:12 min

E shavora daran kathar o Coronaviruso. But shavora chi djanen kaj shaj te bolden pe kana si le pushimata karing o nasvalipe Covid-19.

Coronaviruso gelas viralno pa intrege sajtora, sar pe socialne medie pe nevimatonge riga, thaj vi pe televizia. Pe sa kadal sajtora vorbipe pa sode zene si nasvale ande Coronaviruso, sode manush mole kathar kado nasvalipe Covid-19 thaj vi so o shtato planuli te kerel, soski buchi kamen te keren karing kado nasvalipe. Pa Coronaviruso shunel o manush variso nevo intrego chaso thaj sar shunel sa kado o manush beshen vi e shavora perig thaj shunen. Sar acharenpe von karing kadi situatsia kana shunen kasave seriozne nevimata intrego chaso?


Daran kathar o Coronaviruso? E 16 bershengi shejori e Natasha phenel sar voj acharelpe.

Sikazilas ke but shavora darjle kathar kadi pandemia kaj vazdaspe kathar o nasvalipe Coronavirus.

E organizatcia Bris, Barnens Rätt i Samhället diklas ke o levelo vazdaspe pe sode shavora vorbin lende ande dar, ke daran kathar o Coronaviruso, butivar kade si ke von maj but daran pa penge phure mamora thaj papora, tena kerzolpe lenge variso.

E Malin Rekke psykologo ando Bris del komentaro.

- Malin Rekke psykologo ando Bris phenel ke butivar kana vorbin e shavora lende te pushenpe pa Coronaviruso si anda e dar kaj von acharen karing peski famelia, von den pe gindo ke shaj te kerzolpe lenga famelijake variso, thaj ke dikhen ke lenge deja thaj dada martfinpe pa o nasvalipe Covid-19.

Sar o manush, jako doroslo manush site delpe gindo pa kado, phenel maj dur E Malin Rekke psykologo ando Bris.

-E shavora kana dikhen e dar ande dorosle manush, len vi von te daran. Shavora chi djanen sar te reagulin karing kasave seriozne situatsiji, thaj kam butivar cha charen vorta e informatsiji kaj shunen pe kadal sajtora. Shavora shaj vi butivar haminpe andre pa so si o chachipe thaj so naj, thaj anda kodo trubon e deja e dada, e mamora thaj e papora thaj sako doroslo manush te denpe gindo sar te keren kana avel kaj kado temato pa Coronaviruso thaj te ferin e shavoren kathar e dar kaj vazdelpe pe lende anda kado nasvalipe.


Malin Rekke psykologo ando Bris ulavel peske gindora karing kado pushipe.

-Univar trobuj o manush te mudarel sa kakal aparatora sar televizia, datoro, telefono, ipad, thaj te pehini kathar sa kado pa Coronaviruso kaj shunzol. Mishto avilov te kerel kodo o manush butivar thaj te parovel o temato ando kher, na vorbin intrego chaso pa Coronaviruso angla shavora, vorbin pa diferentne bajora te acharen von ke o trajo djal maj angle thaj site traipe jek normalno trajo, misho avilov te inkren rutini thaj vi te keren variso kethanes, na mukhen e shavoren jek zene.
Phenlas e Malin Rekke psykologo ando Bris.

E Natasha kaj si 16 bershengi phenelas sar voj rodel informatsia pa Coronavirus.


Akanak te san to jek anda kodol shavora kaj daras pa Coronaviruso thaj kames te vorbis varikasa pa kado atonchi shaj keres kade:

-Push chire pushimata kathar jek vuxen/doroslo manush, tena chi djanel kodo manush o atveto pe chiro pushipe, atonchi si to vi posibilita te boldes to amende ando Radio Romano, bishav amenge komentaro, skirin amenge chiro pushipe pe amare socialne medie sar po Facebook thaj Instagram.

Tena naj tot facebook vaj instagram shaj skiris amenge vi jek mejl po www.radioromano@sr.se thaj ame las tusa kontakto.

Te si tuke phares te les amenca kontakto ando Radio Romano si tot vi kaver drom kaj shaj te rodhes zutipe.

Shaj boldes to karing e organizatcia BRIS, von si jek specialno organizatcia kaj zutin le shavoren ande kasave situatsiji, den e shavoren supporto.


Kontakto ando BRIS pa telefono si: 116 111

Vaj dja andre pe lengi internetoski rig kaj si:

www.bris.se


Mishtoj vi te djanes ke kana les kontakto ando BRIS naj musaj te phenes kon san, naj musaj te phenes chiro anav shaj aves anonym, garodino. Kade ke nabister te san shavoro thaj daras kathar o Coronavirus, naj so te daras si mindik jek doroslo manush vaj vuxen kaj shaj zuti to.


www.bris.se
www.radioromano.se

Reporterka: Naghmeh Abedin

naghmeh.abedin@sr.se