Bistevaš Sámi Giellagáldu lahkana

2:08 min

Duohtandahkat Sámi Giellagáldu bistevažžan golbma sámedikkiid gaskkas lahkana. Sámedikkit Norggas ja Suomas leat juo dohkkehan oktasaš evttohusa njuolggadusaide Giellagáldui. Ihttin lea ruoŧa Sámedikki vuorru gieđahallat ášši.

Förverkligandet av en permanent Sámi Giellagáldu mellan de tre Sametingen närmar sig. Sametingen i Norge och Finland har redan tagit beslut om det. Imorgon håller Sametinget i Sverige digitalt plenum med ett enda ärende och det är godkännande av stadgar för Sámi Giellagáldu.

Se det textade inslaget i kvällens Ođđasat, SVT2, kl.17.30 och på SVT Play

Ihttin duorasdaga galgá Sámedikki Ruoŧas gieđahallat áššidohkkehit go evttohusaid Sámi Giellagáldu njuolggadusaide. Giellalávdegotti jođiheaddji Lars Miguel Utsi vuordá dal ahte Sámediggi dohkkeha evttohusa giellagáldu ásaheapmái ja ii hálet ájihit ášši šat.

- Dát lea oalle hohpolaš ášši danin go mii háledit geargat dáinna mearrádusain dal čakčat vai bargu sáhttá ovdánit johtilit vai dat orgána sáhttá ceggejuvvot ja álggahuvvot juo boahtte jagi álggus, dadjá Lars Miguel Utsi.

Sámi Giellagáldu lea sámiid oktasaš davviriikkalaš ovttasbargoorgána sámi giellaáššiid várás. 2013 rájis dat lea jođihuvvon prošeavtta hámis muhto dal galgá ásahuvvot bistevažžan. Doaibma lea leahkit oktasaš máhtto- ja resursaorgánan ja neavvut giellaáššiid birra.

- Giellagáldu lea dehálaš buot Sámedikkiide ja buot giellageavaheddjiide ja olles sámi álbmogii. Mis lea bággu ovttasbargat giellaáššiid oktavuođas dan dihte go min giellarájit eai čuovu riikkarájiid ja mis lea nu ollu vuoitit dáinna ahte jierpmálaččat geavahit iežamet giellaresurssaid, dadjá Aili Keskitalo, presideanta Sámedikkis Norggas.

Sámedikkit Suomas ja Norggas leat juo dohkkehan njuolggadusaid mas earret iežá evttohuvvo ahte giellagáldu ásahuvvo Sámedikki vuollái Norggas muhto liikká leat bargit ja doaibma iešguđet riikkas.

- Norgga beale Sámedikkis leat buoret hálddahuslaš kapasitehta nu ahte lea álkibu dáppe ásahit dan ásahusa. Dat manašii jođaneabbu dáppe ásahit dan, dan dihte go norggabeale Sámedikkis lea stuorát friddjavuohta maiddái ieža bidjat doaimmaid johtui, dadjá Aili Keskitalo.

Borgemánus 2018 nammadii Davviriikkalaš virgoolmmošorgána sámi áššiin (NÄS) bargojoavkku bargogohččosin guorahallat organisašuvdnahámi Sámi Giellagáldui ja miessemánus maŋit jagi dat buvttii loahpparaporta ja evttohusa.

- Dát lea dat buoremus čoavddus danin go dat vuosttažin addá midjiide vejolašvuođa ahte Sámedikkit leat dat mat nammadit dan stivrra ja mat mearridit dan organisašuvnna badjel ja ahte ruhtadeapmi maiddái galgá stivrejuvvot Norggas, Suomas ja Ruoŧas dan organisašuvnnas. Diet leat diekkár čuolmmat maid mii leat šaddan iskat ja de mii leat gávnnahan ahte dát málle maid mii dal leat válljen evttohit lea dat mii deavdá min dárbbuid buoremusat, dadjá Lars Miguel Utsi.

Grunden i vår journalistik är trovärdighet och opartiskhet. Sveriges Radio och SVT är oberoende i förhållande till politiska, religiösa, ekonomiska, offentliga och privata särintressen.


Vuođđu min journalistihkas lea luohtehahttivuohta ja bealátkeahtesvuohta.Ruoŧa Rádio ja Ruoŧa TV leat sorjjasmeahttumat politihkalaš, oskkolaš, ruđalaš, almmolaš ja priváhta sierraberoštumiid ektui.


Läs mer om hur vi bedriver vårt arbete:
Loga eanet mo mii doaimmahat bargguideamet:

Sveriges Radio