Maaginen kriini aukeaa taasen

Sveriges Radio/Meänraatio aukasee taasen Maagisen kriinin joka tällä kertaa tarjoaa uusia meänkielisiä kertomuksia nykyajan lapsista ja heän iloista ja suruista.  Nämät löytää niin raatiosta ko webbiltä;

Mikael Niemi on kirjottanu tyttärestä jonka murfaarin suuri toive on ette tyär kerran pääsee lehtheen sen takia ette se väylästä saapi issoiman kalan. Mutta kalamatkala on käymässä pahon ja murfaari oppii kunnon läksyn. Apu on yllättävä ja hullunkurinen, niinku Mikaelin kertomuksissa ussein pruukaa olla. Ja semmosenna kirjailia Mikael Niemi on tunnettu, aina "Populärmusik från Pajala"-romanista saakka. Inga-Britt Uusitalo on kääntäny  saun.

Marita Mattsson-Barsk selittää Juliasta joka kauhistuu siittä ko vanheemat meinaavat työn takia lähteä Aafrikhaan ja siksi jättää tyttären mummun tykö Tornionlaaksoon kesäksi. Mitä Mäntyjärvessä tekkee kesän ei ymmärä Julia. Mutta ko kesä on menny niin on syntyny villiä muistoja ja Julia on saanu kaverin. Marita Mattsson-Barsk on bibliuteekinhoitaja Haaparannalla ja kans kirjottaja.

Regina Veräjä kertoo päivästä jotako on vain yks ainua elämässä - päivä ko alkaa oikehaan kouhluun. Mutta saapiikos koulussa jatkaa olheen semmosenna ko sitä on ollu siihen päihvään saakka - vaikka poikana lähtee sinne kläninki päälä? Regina Veräjä on monipuolinen kulttuurityöntekijä ja kirjottaja Pajalassa.

Mona Mörtlundin kertomuksessa on kysymys vaikeista tuntheista ja asioista. Minnan muffa on kuolu ja hänen mamma on niin ikävissä. Minna yrittää päästä pääle kunka hän saisi mamman ilosemaksi - ja viimen hän onnistuuki. Mona Mörtlund on kirjailia joka assuu Luulajassa.

Anton Raukolan päähenkilöt on Nille ja hänen harakkakaveri Börje. Nillen suuri into on ette koota kiviä. Siittä ei kaikki tykkää. Mutta se selviää ettei se niin hullu hommaa olekhaan. Anton Raukola on töissä Norrbottensteatterille Luulajassa.

Sari Oja vettää näitä ohjelmia ja antaa poruukan kläppiä kuunella ja kommenteerata niitä.

Ohjelmat kuuluvat Meänraatiossa/Sisuradiossa viis viikkoa peräkkää ja alkavat tiistaina l5/2 kello l7.50 p4 Norrbottenissa/Sisuradiossa. Repriisin kuulee jokhaisesta ohjelmasta tuorestaina p2;ssa/Sisuradiossa kello 16.50

Webbilä ohjelmat on jo 14/2 ja seiltä pystyy net mp3-fiilinä hakehmaan.

Grunden i vår journalistik är trovärdighet och opartiskhet. Sveriges Radio är oberoende i förhållande till politiska, religiösa, ekonomiska, offentliga och privata särintressen.
Du hittar dina sparade ljud i menyn under Min lista