Nationalno

Krechunosko bazari -tradicia vaj na?

6:43 min

Ando December kidenpe pherdo turistura aj vi svedura, pe le themeske krechunoske bazara. No te pennes ke kadi si jek purani tradicia ando them, nastik. Alle kado chi ashaven le ciavoren kaj avile po Stortorget ando Gamla stan ando Stockholmo te diken vaj saj nirin vareso.

Po Stortorget ando Gamla stan ando Stockholmo si pherdo turistura, skolenge klassi aj vi familji. E sang katar e pabarde pendeha aj o hango kaj o lyckohjul kerel aj vazdel e manuszenge gindura ke saj kam nirin vorta adjess, del kasavi atmosfera ke achares ke o krechuno pashol. Vorta kado bazari inkren de 100 bersz kodoleske, aj anda kado kerdzilas kado sar jek tradicia kaj le stockholmara. E Sylvi Rudi kaj tordjol ande jek anda le 38 lole buttki po bazari biknel lotterji, aj iva but turistura kinnen le lottura si vi uni ternimata kaj kinen lattar:

E Birgitta aj e Michele Morelle si duj anda kodol manusz kaj kinde loterji katar e Sylvi Rudi, Von aven anda Swedo, aj trajin ando parizo de 47 bersz kodoleske. Von aven duvar andek bersz ando swedo, aj aven pe kado bazari sako bersz.

Nador katar e Sylvi Rudi tordzol e Åsa Nilsson. Voj de 10 bersz abba biknel delikatessura anda kiruna pe kado bazari, kaj puterdoj sako djess zi kaj o krechuno. Aj opruch delikatessura saj kinnel o manusz vi vasteske bucia kaj so keren ando swedo. Kodi firma kaj del avri le 38 buttki bushol Stockholms-Gillet aj e Åsa Nilsson pennel ke pharesi te pheres pe kasavo kontrakto, te les ungule e buttka pe kado bazari.

E Åsa Nilsson pennel ke but anda kodol kaj tordjon kathe adjess daranas kanna avilas e ekonomicno kriza ke gindonas ke chi avna dosta manusz po bazari. No zi akana chi dikel voj ke maj chorri kerdzilas e situacia, voj gindoj ke le manusz kanna peren phare situacji maj sigo kinen peske maj lashio habe, sar te kinen televji vaj neve matori. Aj kodol kaj konnen le delikatessura katar e Åsa Nilsson si manusz pa intrego luma.

Ke le manusz anda swedo inkren le krechunoske bazara de but bersz palpale naj chaches. O Jonas Engman kaj si intendent anda Nordiska Museet pennel ke le krechunoske bazara kade sar kaj ame dikas le adjess, ke saj kinnes tuke bajura kaj sukaravel o kher aj glögg, feri zal palpale zi kaj o agor ando 1800 bersz. Angla kadi vrama nas chudaso te sas kade ke bazara sas pe vulici, aj atunchi paruvenaspe le manusz, kade ke te sas tu lon birisas te paruves avri ekcerra mas, aj nas safchem mysiga vaj spännande. O Jonas Engman pennel ke sar tenna avel gindon but zhene ke le krechunoske bazara si ande purani tradicia, ke kanna del o manusz pe kasave bazara achares ke kado si vareso purano aj vareso chacho.

Aj maj dor pennel o Jonas Engman ke ame le manusz kamas te pachas ke kadi tradicia zal zi kaj le bavorura, kaj chachimasa sas jek phari vrama le manuszenge. Iva but zhene gindon pe kodi vrama sar bish te avilo jek paramicha kaj e Astrid Lingren skirisardas. Chachimasa nas bute manuszen love te kinen goja, aj pa guglimata naj chinna sote vorbis.

Boldas ame palpale po bazari po Stortorget ando Gamla Stan, o shil kerel kade ke o manusz chi acharel peske vas, aj so maj but manusz kidenpe po tan. Le turistura zumaven o sweditsko glögg, kinnen shuke ezonge ile. Krujal o lyckohjul kidipe pherdo ternimata aj lenge jeka zan krujal la rotasa zupin chi ashavel.