Buciake uni phenen OK pe maj cino pocin

But anda e maj bare buciake uni thaj e buciake sherutne ande e industria dine vast pe jekh nevo modelli pe buci kana si phare vrami pe korttidsarbete - buci pe skurte vrami. Kado si te avel kana si ekonomiake krisi thaj kana e firmi chi birin te inkren penge buciaren.

Te na avel kade ke e firmi shuden avri penge buciaren birina e firmi te cinjaren maj feder e buciarenge love te birin e buciarra te ashion maj dur ande firma.

Ghindo kadale kontraktonca si te na veston e manush but feri te birin te ashion ande penge bucia phenel o Veli-Pekka Säikkälä anda IF Metall.

Trin riga njerin ande kadi buci phenel o Veli-Pekka Säikkälä, o buciari, e firma thaj o them ke o them chi pocinela bare love ande bibuciarengi kassa – a-kassa.

E diskussia pa kadal bucia djal aba dosta but vrama mashkar e firmi thaj e buciake uni thaj akanak avla kado vi ando Shvedo. Kado si aba ande kaver thema ande Europa.

Jekh kaver buci so si andre ande kado si ke e manush si vi te djan te sitcion thaj shaj vi te sitcion vi kaver bucia ande kado sitciaripe phenel o Veli-Pekka Säikkälä.thaj kadal bucia losharel vi e finansministros o
Anders Borg ke te nakhel kado chi hasarna but buciara penge bucia kana avna e phare ekonomiake vrami ando Shvedo.