Radio Romano

Johann "Rukeli" Trollmann

8:21 min

Johann Trollmann arakhadjilas ando bersh 1907 ando njamco, vov sas jekh cinto thaj bushiolas Rukeli Romanes.

Johann Trollmann sas jekh anda e maj lashie boxera ando njamco ande peski vaga kana agorijas pe e 1920-vrama.

Ande 1930-bersh aresle e Nazistura ande Njamcisko regeriungo thaj kado parudas sa khaj o terno Johann Trollman.

Hitler skirisardas ande peski kenvia Mein Kampf ke o sporto boxing si jekh anda e maj uzhe thaj maj pacivale sportura thaj kodolesa sas o boxingo zurales vazno e nazistonge thaj e nationalisticno socialisticno 3 ljuma.

Trollmann marlas pe maj dur thaj njerijas matchura thaj sas zurales popularno sar boxeri e manushenge, e nazistura chi kamenas te den les jekh matcho te ashiol njamcicko championo numa pala lesko zuralo resultato dine les e nazistura jekh matcho te birij vov te ashiol njamcicko championo.

E nazistura alosarde jekhes khaj von ghindinas njerija e Trollmannos.

Ando bersh 1933 9 juni naklas o matcho

Pala sa e fakti so si skirime thaj pala kodo so manush seren sas o Johann Trollmann o maj lashio boxeri, vov marlas pe maj sigo thaj vi maj feder, lesko stilo anel but pe kodo stilo so o Muhammed Ali but bersh pala leste inkrelas ande pesko boxingo.

Pala 12 rondi zukarlas e publika ke o Johann Trollmann avla o championo e njamcosko thaj savorri chiddisajle kana o resultato avilas.

Resultato phendas ke konik chi njerisardas, e publika so diklas o matcho las te cipij thaj te kerel kalabalika ke von dikle kon sas o chacho championo ande boxi.

Pala kado parude e boxoski federatcia pesko ghindo thaj dine e Trollmannos o titlo sar najmcicko championo.

Kadi losh hasajlas feri pala uni djes kana e boxoski federatcia parudas pesko resultato thaj las lestar lesko njeripe.

Officialne phendo sas ke o Trollmann marlas pe chorres thaj lesko stilo nas acceptovano.

E boxoski federatcia phendas khaj o Trollmann ke trobuj te paruvel pesko boxosko stilo te kamel vov maj dur te marel pe thaj sas vi phendino leske ke te na paruvla stilo lena von lestar leski licencia po boxo ke kado stilo khaj sas e Trollmannos naj jekh specificno njamcicko stilo.

Ando bersh 1933 chi birijas te avel jekh rom vaj conto championo ande hitelosko njamco thaj kado achardas o Trollmann thaj djanelas ke leske avla phares maj ange ande lesko kamado sporto boxing.

21 juli ando bersh 1933 las o Trollmann jekh nevi chansa, akanak sas vov te marel pe jekhesa khaj bushiol Gustav Edler. Gustav Edler marlas pe ande e maj phari klassa ando Weltervikt thaj o Trollman sas feri ande mellanvikt.

Khaj o Trollmann sas phendino ke te kamel pe vov te boxulij pe musaj vov te mukhel pesko stilo khaj sas elegantno thaj djalas sigo, vov sas te marel pe njamcicko stilo.

Kanda aresle e boxera khaj o ringo avilas o Johan Trollmann maklo ande parni farba pe intrego pesko stato, vov maklas peske bal po blond thaj kamlas te sikavel ke vov acharlas so e nazistura lestar mangenas.

Von kamnas vov te avel sar von, jekh parno arie kusa blondovane bal.

Matcho agorisajlas pala 5 rondi thaj o Trollman sas tele malado.

Kadi raci agorisajlas vi leski karriera ando boxo.

E bersh so pashonas lenas e Nazistura te roden e romen thaj e cinton.

Johann Trollmann sas jekh ketana ande e njamcicko armia thaj ando bersh 1942 sas vov avri shudino khatar e khetania thaj sas shutino ande e koncentratciako lagero Neuengamme khaj sas avri anda Hamburg.

Kote pe koncentratciako lagero pindjardas les jekh vakto thaj manglas e Trollmannos te trenulij les thaj kavere vakton kote ande Neuengamme.

Pala jekh vrama ande kodo lageri sas vov shutino ande jkeh kaver lageri.

Vi kote sas vov pindjardo thaj kote sas jekh kriminalno kapo khaj manglas jekh matcho kusa o Johann Trollmann.

Trollmann njerisardas o matcho lettko numa vestosardas pesko trajo.

O Kapo sas kade holjako ke vov vestosardas o matcho karring jekh romano boxeri kke vov las jekh bari lopata thaj mudardas e Johann Trollman ande bari holji.

Nas but vorbipe pa Trollmann thaj lesko boxino zhi khaj o bersh 1990 khaj jekh skiritori vazdas opre kado so kerdas pe kusa o Trollmann kana e nazistura line lesko njeripe.

Kado vazdas opre jekh diskussia thaj ando bersh 2003 - 70 bersh pala o matcho pindjaradas e njamcicko federatcia po boxing ke o Johann Trollmann sas njamcicko champion ande peski vrama thaj dine les vi e paciv sar o champion anda bersh 1933.

Pala kado sas vi jekh monumento shutino anda leste ando Viktoriaparko ando Kreuzburg khaj si ande Berlin.

28 januari ando bersh 2011 sas jekh boxoski halla shutini anavesa Johann Trolmann Boxcamp

Adjes ando bersh 2012 si o Romano cinto Johan Rukelli Trollmann andre skirisardo ande sa historicne kevni sar o rom so njerisardas palpale peski paciv ando boxo pala 70 bersh.

Fundo pe amari journalistiska si te avas neutralne thaj te pachan pe amari buchi. Sveriges Radio si neutralno thaj chi ljol rig andi politika, religia, ekonomia vaj varesave oficilane prvatne njerimta.
Du hittar dina sparade ljud i menyn under Min lista