Ulav e bal kusa jekh luskam foto:Scanpix/Jessica Gow

Maj but zhuva ande skoli

Zhuva!!!
7:49 min

Kana e adjesutne dada thaj deja barile ande e 60:e, 70:e thaj 80:e bersh nas but zhuva ando shvedo, but manush bisterde vi ke kadal balenge kerme sas. Ande 90:e bersh line manush te phenen ke arakhenas maj but zhuva ande chavernge shere.

Ando bersh 2011 sas zurales but zhuva ande shkoli ande intrego shvedo thaj vi ando bersh 2012 phenel pe ke si zurales but zhuva.

Sostar kado kerel pe akanak chi birij pe te del pe jekh atveto, numa jekh dosh ke si kade but zhuva shaj te avel kodo ke e dada thaj deja chi ulaven e chavorenge bal mishto, phenel o Johan Lindh so si parasitologo ande Smittskyddsinstitutet.

Maj lashio drom te arakhel pe e zhuva si kana ulavel pe e bal kusa jekh luskam, jekh specialno kangli so khinel pe ande apoteki khaj arakhel e zhuven thaj pala kodo trobuj pe te mudarel pe e zhuven specialne shamponosa.

Zhuva naj nasul po sastipe thaj chi mudarel e manushen thaj chi trobuj pe te tradel pe ande bolnicia phenel o Johan Lindh maj dur.

Sharlejka si jekh dej khaj si la 4 chavora, voj chi delas pe ghindo ke lake chavoren shajas te aven zhuva thaj voj phenel sar voj arakhlas jekh djes zhuva ande peska chake bal.

Zhuva si cine parasitura khaj trajin ande manushenge bal, von pien rat anda shero jokvar ando djes thaj pala kodo mukhen von lika kodol si e anre pe neve zhuva ande bal. Kadal lika puterdjion pe pala 8-9 djes thaj pala kado kerdjion feri maj but zhuva te na kerla pe variso karring kado.

Pasha kado trobuj pe te tovel pe avri sa so sas ando kontakto e zhuvenca, trobuj pe vi te tovel pe e shere savorende so sas ando kontakto kodolesa khas si zuva. Ke e zhuv shaj te traji bi balengo 5-6 chasura thaj te si e zhuv ande gada vaj ande chipki birin von te trajin maj but zhi khaj 2 djes.

E sharlejka phenel ke but buci sas ando kher kana voj djanglas kado avri.

E cini shej e zina phenel ke voj las e zhuva ande skola thaj ke kote si but zhuva.

Kana jek dej vaj dat arakhel zhuva ande peske chavoreske bal si obligatcia kodoleske te phenel ande skola ke si e chavoren zhuva ke kade perdjiona vi e kaver chavora ande skola khatar e zhuvia thaj pala jekh vrama boldena pe e zhuva vi palpale.

But manush ladjan pe te purin ke si len zhuva thaj chi kamen te purin avri pa zhuva, e sharlejka phenel ke voj purisardas savorrenge pa e zhuva numa phares sas vi lake ke voj ladjalas pe zurales khatar kado.

Zhuva shaj te peren ande sako jekhesko shero, e zhuva chi djan feri ande melale shere feri ande sa, phenel o Johan Lind, parasitolog anda Smittskyddsinstitutet.

Grunden i vår journalistik är trovärdighet och opartiskhet. Sveriges Radio är oberoende i förhållande till politiska, religiösa, ekonomiska, offentliga och privata särintressen.
Du hittar dina sparade avsnitt i menyn under "Min lista".