Internationalno

Eva pennel sar naklas o Auschwitz

9:46 min

Ame avas anda jek barvali romani familja, sas ma 5 pral aj trin peja, aj man sas trin shavora.

Angla o maripe, kherasas ame kade ke kanna tradasas ando wesz mukhas semnura le dromesa, te zanas kaj sam intrego vrama, aj jek djess kanna o maripe las pe linne aj huchilde ma pennel e Eva Alexandrowicz, huchildema sar pashluvos aj garudzuvos ando shanco. Le ketani, atunchi vorta linne aj arakle mura biba, aj dinne la aj lake panze chavoren puske,khade ke kanna man arakle ando shanco, chi zanos so zukarel ma, vaj puske site den ma po tan, vaj te unglaven ma,chi zanos, so zanos sas ke khado chi avla lokho.

Kade ke linne aj vazdema punrendar, aj linne te maren ande ma. Kade marenas ande ma, ke pe punre e kokala dennas avri pa morchi. Kanna malavenas ande ma, acharos ke varesosa, sar belasa marenas, aj kothe kaj reselas e beli, kothe pharavelas po tan e morchi aj pechalas o rat, khade dukhalas ma ke naj ma vorbi te pennav.

No ferik sajek inkerdem varesar avri aj chi dem ma. Khade ke pala kado ingerde ma ando oswenchimo, aj kothe hos inke maj but kinno. Kothe kiravenas paji pe buraki, aj anda kodo paji dennas ame jek dopasz bohari te pas sako djess, jek cinno kotor shuko maro dennas ame jokhvar andek shon,aj kade musajas buci intrego djess te keras, kanna dellas brisind zumavos te pav kodo paji kade trushali simmas.

Jek momento kaj shaj pennav tumenge sas kanna jek maj phuro manusz, las aj cirdas amen le zuvlan andek sobba, pendas te las tele e intregi gada pa ame, aj te pashluvas pe mesala, kanna me kado kerdem, las te marel ma vov, aj kanna nas abba ande ma zor te ratulij ma, las vov aj le kaver ketani, aj dinne jek zaschiko ande ma, kasavo zaschiko kaj del bare dukha andral. Aj kade lennas aj cirdenas sakona avri anda kodi sobba, sar zukla, me atunchi sammas 20 berszengi, mure romes phabardesas zipun chi mulas, aj kade ashilem ekzeni.

Aj kade palak vrama, linne le ketani aj kide ame, aj kamenas te ingren ame te tasaven ame, no feri po drom avile samolotura, aj kade musajas von te ashaven kodo so kernas, aj kathe lem me aj garudzilem, chi zanos kaj sim kaj site zav, aj so te kerav. Me kamos ande polska te resav, aj o problemo sas ke chi zanos e niamtsitsko ship, daros te vorbij varekasa tenna purij ma avri, kade ke ando baro chorripe lem te rovav.

Vi bokali aj vi trushali, simmas garudini, no palak vrama shundem ke aven manusz, vi darajlem aj vi loshajlem, kanna linne te pashon shundem ke russitska vorbin, aj lem aj sikadzilem, kanna dikle ma von, loshajle vivon, chumide ma, aj ingerdema ando foro, ande bolnica, avilem mande, aj dinne ma lilla, ot te shaj sikavav khatar sim aj tenna huchilen ma pale, aj khade trajisardem m evaresar zi adjess.

Fundo pe amari journalistiska si te avas neutralne thaj te pachan pe amari buchi. Sveriges Radio si neutralno thaj chi ljol rig andi politika, religia, ekonomia vaj varesave oficilane prvatne njerimta.
Du hittar dina sparade ljud i menyn under Min lista