1 av 3
Rom anda Bulgaria avile te khiden muri ando Tierp / Foto: Rikard Parno Jansson
2 av 3
Rom anda Bulgaria avile te khiden muri ando Tierp / Foto: Rikard Parno Jansson
3 av 3
Rom anda Bulgaria avile te khiden muri ando Tierp / Foto: Rikard Parno Jansson
Nationalno

Kerdzilas maj lashi e situacia le romenge kaj aven te kiden muri?

Ame kheras buchi sar kamas
7:05 min

- Te dikhes po paluno bersh, dichol ke buthesa maj cera ziene avile te kiden muri, shaj si 10 procenti anda kodol kaj sas o paluno bersh. Thaj kado shaj avel ke maj lashi buchi sas kherdi mashkar le diferentni departementura thaj le thema kaj e rom trajin shaj avel ke masj lashi informacia si adjes pa e problematika, phenel o Mattias Bredberg anda Tierppolisen.

O paluno bersh milaje avile but Bulgariska rom ando Svedo o te khiden muri ande vesha. Ferik ke but ziene chi zanenas so zukarel le. Pherdo rom kaj avile te kheren buchi sas hohade, chi lenas penge pochinimata, thaj trajinas thela chore kondiciji. O majoriteto manush nas le love kana sas te traden khere ande Bulgaria, thaj musajsas te zukaren pe love anda Bulgaria.

Ferik ke kerdzilas maj lashi e situacia le romenge kado milaj? O Mattias Bredberg pale.

- Ja shaj phenav ke naj amen sa kodi problematika safsion sar kaj sas o paluno bersh, kana avenas andre but rom problemonsa, ke hi den lenge love thaj kasave bucha. Samas kothe te dikhas chi sa mishtoj, thaj te vorbisaras le manushensa kaj si le phuv ande vesha, phenel o Mattias Bredberg.

Ferik ke chi hasajlas intrego problematika, but ziene kaj si le phuva ande vesha birin o te holajven pe rom kana shon peske cerhi kothe, vaj kana phiren o te khiden le muri.

- Sas incidentura kana holajven e manush kaj lengej e phuva, ke naj lenge drago ke shon pe but ziene cerhensa pe lenge phuva, thaj chi respektulin o regulo ando Svedo kaj phenel ke ferik jek djes shaj rachares pe varekaski phuv, o allemansrätten, phenel o Bredberg.

Thaj atunchi ashel o pushipe sar si o zakono ando Svedo? Kaj shaj racharel o manush aj kaj na? O Allemansrätten kaj si jek svedisko phurano zakno phenel, ke sakone manushes ando Svedo si e prava te zal avri ande natura, vaj te kheres campa vaj te rachares jek djes.

Ferik ke butivar shaj avel jek confusia pa kado zakono, so shaj aj so na. O Svedisko zakono phenel ferik opral ke savoren si e prava thaj e responsibilita kana avel kaj e natura. Ferik ke butivar chi zianen but ziene exakt so shaj kheren.

Pala kode kana mukhlem e policijni stancia, shutema po drom te traden karing le vesha thaj le thana kaj le rom kaj kiden e muri inkerdizon. Zumaden te tradav pala le instrukciji kaj das o policianto, ferik ke phares sas mange te arakhav. Loshajlem kana diklem sar shtar panch ziene tordzion pasha drom bradjensa.

Kothe maladzilem le romea o Zlatko kaj avilas angluno razo ando Svedo te khidel muri, thaj vi vov phenel ke maladziol ke unjivar holajven pe lende e manush kaj si le phuva.

O Staffan Danielsson, riksdagsledamot ando Centerpartiet, phenel ke kamel tena avel slobodo te khiden muri ande le svediska vesha, thaj kadalesa kamel vov o te zurarel o svedisko zakono o allemansrätten. Thaj pala but bersh kaj sas konfliktura mashkar e bärplockare thaj e manush kaj si le phuv ande vesha, kamel vov te kezdij jek debatto pa kado pushipe.

- Me kamav te ashel o allemansrätten ande peski chachi forma. Ferik o te biris te les sama pala kado regulo musajij te arakhas atveto pe problemura. Thaj anda kodo trobujas angla mande te dikhen po allemansrättem, soske possibiliti del thaj soske si e limiti. Thaj trobujas vi te dikhen so kerdziol kana o manush chi respektulij kodo, phenel o Staffan Danielsson, anda Centerpartiet.

Anglunes kana pashilem pasha le rom kaj khidenas e muri pasha drom, lem sama ke sas eksera reservovani mansa ke chi zanensas kon sim, ferik ke kana shunde ke vorbij romanes line te vorbin mansa.

E romnji Svetanka tordziol duje bradjensa pherde murensa, thaj phenel ke lenge mishtoj kate ando Svedo, ke len konik chi hohavel, thaj ke kheren buchi sar von kamen.

Kana tordzios pasha le rom thaj vorbisaras, lem sam ke naj le biziala. Jek anda le romnja phenel ke vi o Svedo phendas ke sas te zutij le, ferik ke bishade le palpale ande Bulgaria.

Me pushlem katar o Zlatko chi si les plano te avel palpale po kaver bersh, thaj vov phendas kade.

O Staffan Danielsson anda Centern, åhenel ke vov majdur site zial la buchasa ande peski partija thaj vi ande kave partiji. Ke trobuj te dikhen mishto pe kado, phenel vov.

Grunden i vår journalistik är trovärdighet och opartiskhet. Sveriges Radio är oberoende i förhållande till politiska, religiösa, ekonomiska, offentliga och privata särintressen.
Du hittar dina sparade avsnitt i menyn under "Min lista".