O lil khatar o SIN

400 rom mangle zhutipe khatar SIN

400 rom mangen zhutipe khatar SIN
3:51 min

Ando september paluno bersh mukhlas e gazheta Dagens Nyheter ke si karring 5000 rom ande policiaki registra. Ande kadi registra si terne, phure, mursh, djuvlia thaj vi mule manush. But kritika sas vazdini karring e policia thaj o SIN - Säkerhets och integritetsskyddsnämnden so si jekh themeski myndighet phenel ando November ke si but dosha ande policiaki registra thaj si vi buchia so si illegalno ande policiaki registra.

Ando December phendas SIN ke manush shaj te bolden pe lende te mangen zhutipe te djanen vaj von si ande registra thaj te si e rom ande registra shaj von te roden e manusheske ekonomiaki kompenzatcia khatar JK - justitie kanslern.

400 rom mangle zhutipe khatar o SIN thaj kanak keren von buchi te dikhen perdal kadal mangimata phenel e Eva Melander Tell khaj si Kanslichef po SIN

400 rom bishade lila khaj Säkerhets och integritetsskyddsnämnden te dikhen vaj von si andre ande e debatovano policiaki registra pe rom khaj bushiol Kringresande.

E buchi khaj SIN kerel si te dikhen vaj e manushesko integriteto si phaglo khatar diferentne myndigheter thaj ande kadi buchi so sas e romenca pa Kringresande si ekcera maj kaver sar e normano buchi so SIN kerel, ke kadi registra sas jekh maj kaver registra phenel e Eva Melande Tell

Manush so mangle lendar zhutipe thaj bishade lila lina lendar jekh lil - jekh bekräftelse ke lende areslas e buchi thaj ke von kerna kadalesa buchi.

E buchi si naklas kade sigo ke but mangimata aresle lende thaj pasha kodo  chi djanenas von  sar te keren kadalesa buchi thaj anda kodo vorbisajle von pe khetanes kusa justite kanslern thaj akanak si len rutini sar te keren buchi thaj akanak pachal e Eva Melander Tell ke e buchi djala maj sigo.

E oficialno decizia ande sako buchi lel o nämnden thaj o nämnden maladjiol 1 data sako shion thaj ando februari beshla o nämnden te dikhel perdal but anda kadal 400 buchia.

Numa kadi buchi si ekcera kaver ke  aba ando november phendas o SIN ke si dosha thaj uni ilegalne buchia ande kadi registra. Anda kodo ghindoj e Eva Melander Tell ke but anda kadal buchia djana maj dur khaj o JK te zumavel pe vaj kadal manush shaj te len lovengi kompenzatcia.

But rom vazde reaktci kana JK muklas tele e investigatcia pe kodol 2 policiantura khaj phenlas pe ke von kerde kadi registra thaj but rom phenenas ke vi o SIN mukela akanak peski buchi.

Numa kade naj phenel e Eva Melander Tell khaj si kanslichef po SIN.

Voj phenel ke o SIN aba las jekh decizia pa registra thaj kodo ke JK - justitiekanslern mukle tele peski investigatcia pe policia chi hamij pe ande e buchi so SIN kerel.

Ke von pa SIN dikhen akanak perdal e individualne mangimata thaj pasha kodo keren von maj dur buchi te dikhen sar e policia ando Skåne lashiarel e dosha so SIN araklas ande lengi registra pe rom.

Grunden i vår journalistik är trovärdighet och opartiskhet. Sveriges Radio är oberoende i förhållande till politiska, religiösa, ekonomiska, offentliga och privata särintressen.
Du hittar dina sparade avsnitt i menyn under "Min lista".