Brisilda Taco
Internationalno

Brisilda Taco marel pe anda chachimata

Brisilda Taco anda Albania
4:54 min

Albania si jekh them ande Europa khaj zumavel te pashiol khaj EU. Trival zumadas e Albania te vazdel jekh Eu-aplikatcia thaj trival sas lengi apikatcia tele maladi. O them si za koruptovano thaj kodo kerel ke phares si e themeske te del andre ando EU.

Albania naj jekh barvalo them thaj ande Albania trajin vi rom.

Ande Albania trajin karring 100 000 rom raportulin e romane organizatci thaj jekh oficialno sifra khatar o bersh 2011 anda Albania phendas ke sas atunci 8304 rom ando them.

E rom naj mishto dikle ande Albania ke za but stereotypicne patretura si pa rom ke von si melale, chor thaj kriminalne.

Akanak kerel e Brisilda Taco buchi te avel o patreto pa rom maj feder numa kodo naj lokho ke si but garaduni diskriminatcia phenel e Brisilda Taco.

Brisilda Taco si jekh 25 bershengi romani chej anda e romani gruppa mechkar, voj si jekh romni khaj marel pe anda e romenge chachimata thaj phenel ke kodo naj lokho numa akanak djal kadi buchi maj feder sar maj anglal.

Ke kana san jekh djuvli si kadi buchi zurales phari.

Brisilda Taco phenel ke voj zumavel zurales te marel pe anda e romane chachimata thaj phenel ke akanak djal kadi buchi maj feder ke laki buchi diciol so maj but thaj si vi kaver terne romane aktivistura so keren kadi buchi.

Voj phenel ke si but politicne parti khaj mangen la te keren lenca politicno buchi numa voj phenel ke akanak chi kamel voj te kerel politicno buchi feri kamel te startulij maj but buchia mashkar e gadje thaj e rom.

Jekh problemo so si akanak baro si e situatcia pe buchiako marketi, phares si e romenge te len buchi thaj pasha kodo si kadi diskriminatcia garaduni thaj kodo kerel e problematika inke maj phari.

Vi te si phari e situatcia akanak ande Albania kerdjiol pe e vrama maj lashi phenel e Brisilda Taco, ke von keren but buchi te maladjion pe e rom thaj e gadje ka kadi buchi kerel jekh maj lashi integratcia thaj e gadje pindjaren maj bute romen thaj atunchi hasaren von but anda e stereotipicne patretura pa e rom.

Brisilda Taco phenel vi kodo ke voj dikhel jekh diferencia mashkar Albania thaj kaver Europake thema, e maj bari diferencia si kodo ke kaver thema zumaven te zhutin penge romen. Vi te na zhutin phenen but thema ke von zumaven te zhutin e romen.

Ande EU-thema si akanak diferentne strategi pe rom thaj vi kado trobuj te kerel pe akanak ande Albania.

Ande Albania si e situatcia kaver, kote phenel pe ke naj love, budzet thaj atunchi chi keren von kanchi te zhutin e romen.

Numa vi te si kade nashtik e rom te ashiaven pengi buchi te malavel pe tele e diskriminatcia thaj pharipe pe rom phenel e Brisilda Taco.

Thaj e maj bari zor khaj sa kadi buchi si edukatcia, edukatcia thaj edukatcia ke kodo kerla ke e integratcia avla maj lashi thaj feri kodo lashiarla e romani situatcia ande Europa.

Grunden i vår journalistik är trovärdighet och opartiskhet. Sveriges Radio är oberoende i förhållande till politiska, religiösa, ekonomiska, offentliga och privata särintressen.
Du hittar dina sparade avsnitt i menyn under "Min lista".