OStefan thaj e Ann-Kristin Stefanov.
O Stefan thaj e Ann-Kristin Stefanov Foto: Bulgarian Aid Mission

Bulgarian Aid Mission zutij romane shavoren shkolasa

"Kam zutija o corperaciako kontrakto"
5:02 min

E shavorengi-, phurengi- thaj jekhimaski ministerka e Åsa Regnér tradela kusa shvedisko delegacia pe vizita kaj duj zutimaski projektura ando sherutno foro Sofia ande Bulgaria.

Sol duj projektura zutin shavoren anda chorora kotora le themeske edukacisasa thaj aktivitetonsa pala shkola.

Jek anda projekti Take med to school, si inkherdi kusa supporto katar jek shvedisko idealno organizacia o Bulgarian Aid Mission, kaj vi zutij romane shavoren te den ande shkola.

O Stefan Stefanov thaj leski romnji e Ann-Kristin kheren volentarno buchi peska organizaciasa Bulgarian Aid Mission de opral e 20-bersh ande Bulgaria, thaj kade phenel o Stefan pe lengi buchi ando them.

- Bulgarian Aid Mission si jek organizacia kaj me thaj muri romnji kezdisardam de but bersh kodoleske. Thaj o gindo pala kado sas te zutisaras chorore manushen ande Bulgaria kusa basalni bajura kaj trobuj le, sar gada thaj habe, phenel o Stefan Stefanov.

Kaj majdur phenel ke thela bersh kherdas e organizacia jek progresso ande peski buchaki strategia pe maj lungona vramake golura, sar bucha thaj edukacia.

O Stefan Stefanov phenel ke te birin te zutin le manushen kusa maj lungona vramake thaj effektivni soluciji, trobuj te kheren possibiliti pe bucha thaj edukacia specialnie e shavorenge.

- Kana avel kaj e romani populacia ando them dikhas ame unji bare problemura, hibazij possibiliti pe bucha thaj pe edukacia. Shavora butivar mukhen e shkoli vaj phiren normalnie ande shkola zi kaj e trito klassa. Thaj kana shuves khetanes kadal problemura kusa o choripe thaj diskriminacia, atunchi si jek problemo kusa integracia ando them, phenel o Stefan.

Le rom si jek bari thaj chorori gruppa manush ande Bulgaria, kaj hibazij le edukacia thaj bucha, thaj de duj bersh palpale kezdisarde e organizacia Bulgarian Aid Mission e projekta Take Me To School kaj zutij romane shavoren te kezdin e shkola.

Jiva chi sam jek bari organizacia, dikhas lashe resultatura kana zutisaras le romane shavoren shkolasa, phenel majdur o Stefan Stefanov.

- E resultatura si lashe, si romane shavora ande kadi gruppa kaj kheren jek zuralo progresso ande peski edukacia, unji anda lende akanak ghele majdur ande maj lashe shkoli, sikhaven djanglipe maj securni si ande shkola. Thaj amaro gindo pala kadi projekta si ke kadal romande shavora kana barona thaj agorina peski shkola, birina te avel sar exemplura mashkar peske manush po succeso, phenel o Stefan.

Jek kaver gindo kaj si pala projekta Take Me To School, si ke o Stefan thaj e Ann-Kristin Stefanov kamen te aven majbut kasave projekti krujal intrego Bulgaria, ande sako foro te birin te zutin romane shavoren.

Si manush kaj kamen te kheren buchi kadalesa, ferik ke naj dosta ekonomicno supporto, vareso so kam avla majfeder akanak pala kado ke o Shvedo thaj e shavorengi-, phurengi- thaj jekhimaski ministerka e Åsa Regnér skirina jek corperaciako kontrakto la Bulgariasa, phenel e Ann-Kristin Stefanov.

- Kado kamlamas zurales kadi si amari nadzea, ke trobuj kasave shkolake projektura. Thaj ame si manush kaj shaj kheren buchi kadalesa, ferik ke trobuj ame resursura te shaj kezdisaras intregi kadal projektura.

Grunden i vår journalistik är trovärdighet och opartiskhet. Sveriges Radio är oberoende i förhållande till politiska, religiösa, ekonomiska, offentliga och privata särintressen.
Du hittar dina sparade avsnitt i menyn under "Min lista".