Ando Foto si o Fred thaj e Tunga. foto: Rikard Parno Jansson.
Ando Foto si o Fred thaj ljeski romni e Tunga. Foto: Rikard Parno Jansson.

Fred halas kino 20 shon te anel peska djuvla

8:00 min

Thaj akanak boldas ame kaj jek shukar kamimaski historia ando Radio Romano, kaj sikhavel ke o kamipe nakhel intregi problemura.

O Fred Taikon arakhlas o kamipe de pari bersh palpale kana vov maladzilas la Tuungasa anda kaj anda Mongolia avilas ando Shvedo pe vizita. Von phirde khetane thaj zangle jekh kavres, thaj vramasa kamle pe. E para o Fred thaj e Tuunga avile kaj decisija ke kamen te ansurin pe thaj te kezdin jek trajo kathe ando Shvedo, ferik ke atunchi line pe e problemura ke e Tuunga nas shvedisko citiznentka.

Shunen lengi historia, kana von avile pe jek vizita amende ando Radio Romano.

Jek brigako Fred kaj bishade la Tuunga avri anda Shvedo, das pe gindo ke akanak trobuj te tradel ande Mongolia te ansurij pe peske kamimasa la Tuungasa. Das pe gindo ke lel pesa peske lila anda Shvedo thaj tradas e gindosa te lasharel lengi situacia. Ferik ke so o Fred chi djanelas si ke akanak dopeiro kezdisajle le problemura, problemura kaj line but vrama, energia thaj vi love lestar.

Pala lungo kino peske shvediska lilensa las o Mongolisko departemento kaj si sar o Skatteverket kathe, thaj kontaktulisarde la Tuungaka familja te den von e confirmacia kon lake si o Fred. Ferik ke vi kana phende von ke o Fred si kodo manush sar kaj phenel ke si, nas chalo o mongolisko departmento, ke kamenas jek lil katar e Shvedisko policia kaj sikhavel chi o Fred sas strafovano. Ferik ke dine le slobodia te ansurin pe ande Mongolia, thaj kherdas e para kado, thaj o kaver paso akanak si o lil.

Numa kado lil katar e policia sikhadzilas ke chi avla kade letko ferik te den andre.

Jek loshako Fred tradas jekzeno khere ando Shvedo, ke la Tuunga inke nas shvediska lila. Les akanak sas o goalo te tradel o lil anda policia ande Mongolia te shaj avel leski Tuunga leste kaj akanak sas lestar ezera kilometri.

La akanak trobuj permisia anda Shvedisko ambassa te shaj avel ando Shvedo kaj o Fred. Ferik o problemo sas ke naj jek shvedisko ambasada ande Mongolia, ferik e maj pashe si ando Peking, jek drom kaj sa kade lungoj sar anda Shvedo ande Mongolia.

E Tuunga phenel ke kherde e shvedisko ambasada jek testo pe late te dikhen chi o Fred chaches si lako rom thaj ke chi zumavel ferik te lel permisia te ashel ando them. Pala zumajipe ande shvedisko ambasada las e Tuunga o atveto ke akanak lela cirka jek bersh te shaj den gata ande lengo fallo, jek bersh kaj chi dikhle pe voj thaj o Fred, jek vrama kaj zurales phari sas.

Te lel e Tuunga kadi permisia musaj sas lake inke jokvar te tradel ando Peking te shaj lel les anda shvedisko ambasada, thaj vi kothe phelas la problemo ke eksera za puzno das po than thaj phandi sas e ambasada. Rachardas voj kothe thaj po dujto djes las avri peski shvedisko permisia. Thaj kadalesa beshlas jek loshaki Tuunga po airplano po drom ando Shvedo te maladzol peske Fredosa.

Grunden i vår journalistik är trovärdighet och opartiskhet. Sveriges Radio är oberoende i förhållande till politiska, religiösa, ekonomiska, offentliga och privata särintressen.
Du hittar dina sparade ljud i menyn under Min lista