Sawirle: Claudio Brescinai/Scanpix.

Degmooyinka oo ka walaacsan Soomaalida

Warwarka degmooyinka qaabili doona Soomaalida eheladooda loo keenayo, waa qaylo dhaan ka timid qaar kamida degmooyinkaas oo walaac xoogan ka muujiyey in aanay haysan dhaqaale ku filan.

Degmooyinka la dejin lahaa Soomaalida qaraabadoodu degen yihiin dalkan Sweden ayaa walaac xoogan ka baxshay dhaqaale xumo ay ka cabsi qabaan marka soomaalidaas la keeno dalka.

Dawlada ayaan gaadhin go'aan ah dhaqaalihii lagu taakuleyn lahaa degmooyinkaas la dejin doono Soomaalida iman doonta, taaso ay dhawaan degmooyinka qaar walaac ka muujiyeen iyo baahida ay u qabaan in lagu taakuleeyo dhaqaale.

Wasiirka is dhexgalka, Erik Ullenhag ayaa sheegay in ay mudo qaadan doonto intii ay dawladu go'aan ka gaadhi lahaayeen dhaqaalaha lagu bixin doono degmooyinkaas, kadib markii qaylo ka soo yeedhay degmooyinka qaar.

- Miisaaniyada deyrta ayaan ku soo bandhigi doona qaybta dhaqaale ee ku aadan arrinkan, sidaan hore uga wada hadalnay degmooyinka waa in la helo xal iyo in dhaqaale la siiyo degmooyinka sidii ay u dejin lahaayeen Soomaalidaas ehelkoodu degen yahay degmooyinka, wasiirka ayaa sidaas sheegay raaciyeyna in aanu indhaha ka qarsanayn dhibaatada arrinkan ah in degmooyinku u baahanyihiin dhaqaale dheeraada.

Degmooyiin badan ayaa ka walaacsan sida ay dawladu arrinkan u nidaamisay kadib markii maxkamada laanta socdaalku soo saartay go'aanka ah in Soomaalidu ku midoobaan dalkan Sweden.

Tobankii degmaba sagaal kamida ayaa u arka in aanay haysan dhaqaale ku filan oo dadyoowgaas la keenayo ee qaraabadooda la midoobaya, sidaasi waxay ku caday tira koob aanu ku samaynay 30 degmo oo ay degenyiin Soomaalidu, kuwaaso u arka in aany helin macluumaad ku filan oo la xidhiidha imaatinka Soomaalida.

Go'aanka maxkamada ayaa la filayaa in ay yimaadaan tiro gaadhaysa 20.000 oo Soomaali ah, sida ay qorshaynayaan laanta socdaalku labada sanno ee soo socda.

Degmada la filayo in ay Soomaalida badankoodu yimaadaan ayaa ah degmada Växjö oo u gudoomiye ka yahay, Bo Frank.

-Dhibka ugu weyni waa masuuliyada dhaqaalaha oo dawladu degmooyinka korka uga tuurtay, shilin may bixin, taasaana ah dhibaatada ugu weyn. Degmadayada Växjö iyo degmooyinka kale ee soo dhaweeya qaxootiga kamay helin dawlada wax taageero ah, taasini waxay nagu kalifaysaa in aan cashuurta kordhino ama lacagta iskuulaadka iyo ta xanaanada aan ka taageerno Soomaalida cusub ee imanaysa dalka, ayuu sheegay gudoomiyaha degmadaasi Bo Frank.

Degmooyiinkan badan ee ka walaacsan in aan go'aan laga siin taakulaynta dhaqaale jawaab waafiya ayaanu wasiirka isdhexgalku u arkin mid dhibaato ah.

- Waynu arki doona wixii ay noqoto, waxaynu iman doona wakhti jawaab la siiyo degmooyinka, si imaatinka dadka Soomaalida ahi u helaan soo dhawayn wacan ayuu sheegay wasiir Ullenhag

Kasim.abdulkadir@sr.se

Tiirka saxaafaddeenna waa aaminaad iyo dhexdhexaad-nimo. Idaacadda Sweden waa mid ka madax-bannaan siyaasadda, diinta, dhaqaalaha, danaha howlaha guud iyo kuwa gaarka.
Du hittar dina sparade avsnitt i menyn under "Min lista".