لاله‌ی پوورکه‌ریم

ئاماده‌کردن و وه‌رگێڕانی: ناسری سینا

لاله‌ی پوورکه‌ریم، له‌ دایکبووی ساڵی ١٩٨٢ی ئێران، هونه‌رمه‌ندێکی سازلێده‌ر و گۆرانیبێژ و ئه‌کته‌رێکی شانۆییشه‌.

لاله‌ هه‌ر به‌ ساوایی ئه‌و کاته‌ی ساڵێک زیاتری ته‌مه‌ن نه‌بوو هاوڕێی بنه‌ماڵه‌که‌ی له‌ ئێران ڕایانکرد و له‌ سۆڤیه‌تی پێشوو، له‌ باکووی ئازه‌ربایجان و مینسکی ڕووسیای سپی په‌نابه‌ر بوون. دواتر به‌و جۆره‌ی باوه‌ ده‌ستی ڕۆژگار هه‌ڵیداشتنه‌ باژاری تیداهۆڵم له‌ ڕۆژئاوای سوید که‌ به‌ زیندانه‌ گه‌وره‌که‌ی به‌ناوبانگه‌. پاش ماوه‌یه‌کی که‌م له‌ گه‌ڕه‌کی بیانی نشینی هاممارکوللنی یۆتێبۆری گیرسانه‌وه‌ و هه‌ر له‌وێش ده‌رسی مۆسیقای له‌ فێرگه‌ی ناوه‌ندیی ڤیدفێلدسکا خوێند.

بۆ یه‌که‌م جار له‌ فیلمی یاڵلا یاڵڵادا که‌ ده‌رهێنه‌ری به‌ڕه‌گه‌ز ئاسوری یۆسف فارس دروستی کردبوو، کاری هونه‌ریی ده‌ست پێکرد و یه‌که‌م به‌رهه‌می مۆسیقای خۆی که‌ گۆرانیی (Invisible) یا مای سۆنگ بوو له‌ سه‌ره‌تای ساڵی ٢٠٠٥دا بڵاو کرده‌وه‌. دووهه‌مین گۆرانییه‌ک که‌ وه‌ک سینگل بڵاوی کرده‌وه‌ و ناوی (Live Tomorrow) بوو گه‌لێ که‌وته‌ به‌ر سه‌رنج و بۆ ماوه‌یه‌کی درێژ له‌ سه‌رووی هه‌موو لیسته‌کانی گۆرانییه‌ دڵخوازه‌کاندا جێی کرده‌وه‌.

چی وای پێنه‌چوو که‌ لاله‌ دوو خه‌ڵاتی مۆسیقایی برده‌وه‌ و هاوکاتیش بوو به‌ بره‌وه‌ی خه‌ڵاتی باشترین گۆرانیبێژی ژنی ساڵی سوید و باشترین به‌رهه‌مهێنه‌ری مۆسیقای وڵات. ئێستا ئه‌و له‌ چه‌ندین فستیڤال و پێشبڕکێی هونه‌ریدا، چه‌ندین کۆنسێرت و کاری شانۆییدا به‌شدار بووه‌ و دڵ و مێشک و نیگا‌کانی به‌ره‌و خۆی ڕاکێشاوه‌، یه‌کیشیان دیاره‌ هی من که‌ به‌ڕاستی حه‌زم له‌ گۆرانییه‌کانێتی به‌ میلودی و تێکسته‌ سه‌رنجڕاکێسه‌کانییه‌وه‌ که‌ هه‌ر خۆشی ده‌یاننووسێ.

لاله‌ تا ئێستا دوو سیدیی بڵاو کردۆته‌وه‌: ساڵی ٢٠٠٥ سیدیی لاله‌ هه‌ر به‌ ناوی خۆی و ساڵی ٢٠٠٦، سیدیی (prinsessor) واتا شازاده‌کان. ئه‌مه‌ جگه‌ له‌ چوار سیدیی سینگل.

به‌ڕاستی من زۆر له‌ شێوازیی هونه‌ریی گۆرانییه‌کانی لاله‌ نازانم بۆیه‌ ناوێرم خۆی لێبده‌م به‌ڵام تا ڕاده‌یه‌ک ده‌توانم له‌ شیعری گۆرانییه‌کانی بدوێم که‌ له‌ جۆری خۆیاندا که‌موێنه‌ن به‌ تایبه‌ت له‌ واری ساکاریی ده‌ربڕیندا که‌ له‌ دڵ ده‌نیشن و فه‌زایه‌کی ئاشنا و پاکژ ده‌خوڵقێنن. دیاره‌ له‌ سه‌ر ماڵپه‌ڕی لاله‌دا ده‌کرێ تێکستی گۆرانییه‌کانی وه‌ک (storebror) براگه‌وره‌ و (invisible) واتا نادیار، (bostadsansökan) واتا داوانامه‌ی خانووبه‌ره بخوێنیته‌وه‌ و هاوفکرم بیت. منیش لێره‌دا سه‌رنجتان بۆ وه‌رگێڕانی شیعری گۆرانیی (han tuggar kex) راده‌کێشم.


ئه‌و بیسکویت ده‌جوێ بۆ هه‌موو کۆتره‌کان

دوایه‌ ده‌یتفێنێته‌‌ پێشیانه‌وه‌

ئه‌و ده‌بێ خواردنیان بداتێ

ده‌ڵێ: ده‌نا هه‌موویان ده‌مرن!

ئه‌و قسه‌کانم به‌ هیند ناگرێ

وا ده‌نوێنێ که‌ هه‌ر ناشیانبیسێ

من ئێستا هیچ مانایه‌کم بۆی نییه‌

مه‌گه‌ر بمرم و نه‌مێنم

که‌چی،

ئێمه‌ نابێ له‌ یه‌ک تووڕه‌ بین

من ده‌توانم له‌ په‌ناته‌وه‌ بیسکویت بجووم

من به‌س ده‌مه‌وێ له‌ لای تۆ بم

ده‌توانین پێکه‌وه‌ نان بده‌ینه‌ کۆتره‌کان، ئه‌گه‌ر حه‌ز بکه‌ی

منیش حه‌ز ده‌که‌م ئا لێره‌ بم

ده‌ لایه‌کیش له‌ من بکه‌ره‌‌وه‌

منیش ده‌مه‌وێ له‌ لات بم

ده‌توانین پێکه‌وه‌ نان بده‌ینه‌ کۆتره‌کان، ئه‌گه‌ر حه‌ز بکه‌ی

ئێمه‌ ده‌توانین،

نان بده‌ینه‌ کۆتره‌کان، مراوییه‌کان، فیله‌کان و زه‌رافه‌کان

ئێمه‌ ده‌توانین بچینه‌وه‌ ماڵێ و هه‌موو ده‌رگاکان داخه‌ین.

ئێمه‌ ده‌توانین بڕۆین و دوڕگه‌ی خۆمان چێکه‌ین

ئێمه‌ ده‌توانین بچینه‌وه‌ ماڵێ و خه‌ونی هه‌موو خه‌ونه‌کان ببینین.

ئێمه‌ ده‌توانین بچینه‌وه‌ ماڵێ و ده‌رگه‌ی حه‌وشه‌ واڵا بهێڵینه‌وه‌

تا بتوانین له‌ خه‌ودا ڕاکه‌ینه‌ ده‌رێ

له‌ ناو عه‌تری بێپه‌رواییدا بخه‌وین

یا خوێن بڕژێنینه‌ ناو شۆڕشه‌وه‌ و

له‌ خه‌و ڕابین و دیوه‌زمه‌‌کانی ڕاستی ببینین

یا سه‌ریان بخه‌ینه‌ ناو ئاوی مه‌زهه‌بێکه‌وه‌ و بیانخنکێنین.

ئێمه‌ ده‌توانین هه‌ر شتێکی تۆ بته‌وێ بکه‌ین

من به‌س ده‌مه‌وێ له‌ لای تۆ بم

من به‌س ده‌مه‌وێ له‌ ته‌نیشت تۆ بم

ده‌توانین پێکه‌وه‌ نان بده‌ینه‌ کۆتره‌کان، ئه‌گه‌ر حه‌ز بکه‌ی

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade ljud i menyn under Min lista