چۆن پێشی به‌ زه‌وجاندنی به‌زۆر بگیرێ؟

ماوه‌یه‌کی کورت له‌مه‌وبه‌ر پولیسی سه‌رانسه‌ریی سوێد، کونفرانسێکی له‌ سه‌ر پێشگیری له‌ کوشتن به‌ پاساوی شه‌ره‌ف، به‌ڕێوه‌ برد. له‌م کۆنفرانسه‌دا ئانه‌ت یۆرگنسێن له‌ لایه‌ن وه‌زاره‌تی ده‌ره‌وه‌ی سوێده‌وه‌  به‌شدار بوو. ئه‌و زیاتر باسی ئه‌وه‌ی کرد که‌ چون پێشگیری له‌ به‌ زه‌وجاندنی به‌ زۆری بکرێ، به‌ تایبه‌ت ئێستا که‌ وه‌رزی هاوینه‌و زۆر که‌س به‌ بنه‌ماڵه‌وه‌ سه‌ردانی وڵاته‌که‌ی خۆیان ده‌که‌ن.

ڕێنمایی ئانه‌ت یۆرگنسێن بۆ ئه‌و که‌سانه‌ی‌ مه‌ترسیی ئه‌وه‌یان له‌ سه‌ره‌ که‌ به‌ زۆری به‌ شوو بدرێن یان ژنیان بۆ بێهێنرێ، ئه‌مه‌یه‌:

ئانه‌ت یۆرگنسێن ئه‌ڵێ: به‌ بیر و ڕای من، مروۆڤ ئه‌بێت باش له‌ وه‌زعی خۆی بیر بکاته‌وه پێش ئه‌وه‌ی سه‌فه‌ر بکات‌ و ئه‌گه‌ر نیشانه‌یه‌ک له‌ مه‌ترسی به‌ زۆر زه‌وجاندن یان به‌ جێ ‌هێشتنی‌ له‌ وڵاته‌ پێشووه‌که‌یدا له‌ سه‌ر بێت، ئه‌وه‌ ئیتر به‌ ڕاستی ئه‌بێت خۆی له‌ سه‌فه‌ر کردن بۆ وڵاته‌که‌ی، لادات. چونکه‌ زۆر سه‌خته‌ بۆ ده‌سگا و ده‌سه‌ڵاتدارانی سوێد‌ یارمه‌تی که‌سێک بده‌ن که‌ له‌ ده‌روه‌ی وڵاته‌، به‌ تایبه‌ت بۆ ئه‌و که‌سانه‌ی که ته‌نیا‌ شارۆمه‌ندی، واته‌ مێدبۆریارسکاپی وڵاته‌ پێشووه‌که‌ی هه‌یه‌.

ئایا سوێد ئاسانتر ئه‌توانێ یارمه‌تی‌ ئه‌و که‌سانه‌ بدات که‌ هه‌م شارۆمه‌ندی سوێد و وڵاته‌که‌ی خۆیانیان هه‌یه‌؟

ئانه‌ت یۆرگنسێن ئه‌ڵێ: کاتێک مرۆڤ شارۆمه‌ندی وڵاتێکی هه‌یه‌ ئه‌بێ یاسای ئه‌و وڵاته‌ به‌ڕێوه‌ ببات، بۆیه‌ یارمه‌تی دانی ئێمه‌ به‌وه‌ که‌وتووه‌ یاسای ئه‌و وڵاته‌ چی ئه‌ڵێ. بۆ نموونه‌ له‌ هێندێک وڵاتدا ژن ناتوانێ بچێته‌ ده‌ره‌وه،‌ تاکوو پێاوێک له‌ که‌س و کاره‌که‌ی ئێزنی نه‌دات،حه‌تا ئه‌گه‌رژنه‌که‌ ته‌مه‌نی سه‌ره‌وه‌ی هه‌ژده‌ سالیش بێت. زۆر شتی جیاواز هه‌یه‌ که‌ کاره‌که‌ی ئێمه‌ سه‌خت ئه‌کات. له‌ ڕاستیدا سوێد ناتوانێ ده‌ست بخاته‌ ناو کاری وڵاتێکی تر وڕۆڵی له‌ سه‌ر شارۆمه‌ندی ئه‌و وڵاته هه‌بێت‌ سه‌ره‌ڕای ئه‌وه‌ش که‌ شارۆمه‌ندی سوێدیشی هه‌بێت، چۆنکه ئه‌و که‌سه‌ له‌و کاته‌دا له‌ وڵاته‌ پێشووه‌که‌یه‌تی که‌ واته‌ ئه‌بێت یاسای ئه‌و وڵاته‌ به‌ڕێوه‌ ببات.

که‌ واته‌ دوببل مێدبۆریارسکاپ لێره‌دا هیچ یارمه‌تی ئه‌و‌ که‌سانه‌ نادات که‌ له‌ وڵاته‌ پێشووه‌که‌ی خۆیاندا گرفتییان بۆ دروست بووه‌ و داوای یارمه‌تی له‌ وه‌زاره‌تی ده‌ره‌وه‌ی سوێد ده‌که‌ن.

ئانه‌ت یۆرگنسێن به‌رده‌وام ئه‌بێت وئه‌ڵێ:

وڵاتی واش هه‌یه‌ که‌ شارۆمه‌نییه‌تی واته‌ مێدبۆریارسکاپی  دوو وڵاتی،  په‌سه‌ند و قه‌بووڵ ناکات. بۆیه‌ کاتێک له‌و وڵاته‌ن ته‌نیا حسابی شارۆمه‌ندی ئه‌و وڵاته‌یان بۆ ئه‌که‌ن

. گرفتێکی تر ئه‌وه‌یه‌ که‌ زۆربه‌ی ئه‌و کیژانه‌ی په‌یوه‌ندییبه‌ وه‌زاره‌تی ده‌ره‌وه‌ی سوێده‌وه‌ ده‌که‌ن، له‌وه‌ ئاگادار نین که‌ شارۆمه‌ندی وڵاته‌که‌ی خۆشیان هه‌یه‌ چونکه‌ له‌ سوێد له دایک بوون.‌

سه‌ره‌ڕای هه‌موو ئه‌و گرفتانه،‌ وه‌زاره‌تی ده‌ره‌وه‌ی سوێد هه‌میشه‌ هه‌وڵی خۆی ئه‌دات بۆ نه‌جات دانی ئه‌و که‌سانه‌ی شارۆمه‌ندی ئه‌م وڵاته‌یان هه‌یه‌.

‌له‌ کۆتاییدا ئامۆژگاری ئانه‌ت یۆرگنسێن بۆ ئه‌و که‌سانه‌ی که‌ مه‌ترسی به‌ زۆر زه‌وجاندنیان له‌ سه‌ره و هێشتاش به‌ ته‌مان بچن بۆ وڵاته‌که‌ی پێشووی خۆیان ئه‌مه‌یه‌‌:

‌ ئه‌گه‌ر پێت وایه‌ سه‌فه‌ره‌که‌ت گرفتێت بۆ دروست ئه‌کات، ئادره‌س و ته‌له‌فونی باڵوێزخانه‌ی سوێد له‌ گه‌ڵ خۆت ببه‌. ئه‌نیا زانییاری له‌ سه‌ر هه‌مو باڵوێزخانه‌کان‌ له‌ ماڵپه‌ری وه‌زاره‌تی ده‌ره‌وه‌ ud.se‌ دا هه‌یه‌.

هه‌موو زانییاریه‌ک له‌ سه‌ر خۆت  له‌ سوێد به‌ جی بێڵه‌ بۆ ئه‌وه‌ی که‌سێک لێره‌وه‌ بتوانێت په‌یوه‌ندی به‌ ئێمه‌وه‌ بکات ئه‌گه‌ر یارمه‌تیت پێویست بوو.

semire.zarei@sr.se

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".