ناوه‌ندێکی چاودێری ته‌ندروستی بۆ په‌ناخوازان له‌ سیۆده‌رتێلیه‌ کرایه‌وه‌

ئه‌م ناوه‌نده‌ یه‌کێکه‌ له‌و زنجیره‌ ناوه‌ندانه‌ی که‌ که‌سێک به‌ ناوی(شوری زه‌ند) وه‌ک پرۆژه‌ی سه‌ربه‌خۆ دایمه‌زراندوون. بیرۆکه‌ی کردنه‌وه‌ی ئه‌و ناوه‌نده‌ له‌ سیۆده‌رتێلیه‌ پاش ئه‌وه‌ هات که‌ ژماره‌یه‌کی زۆر له‌ په‌ناخوازه‌ عێراقیه‌کانی سیۆده‌رتێلیه‌ بۆ چاره‌سه‌ر خۆیان ده‌گه‌یانده‌ ئه‌و ناوه‌نده‌ ته‌ندروستیانه‌ی که‌ له‌ده‌ره‌وه‌ی سیۆده‌رتیلیه‌ بوون. ئه‌م ناوه‌نده‌ وه‌ک هه‌موو ناوه‌نده‌کانی چاودێری ته‌ندروستی هه‌ندێک تایبه‌تمه‌ندی خۆی هه‌یه‌ که‌ شوری زه‌ند باسیان لێوه‌ ئه‌کات.

له‌م ناوه‌نده‌دا جگه‌ له‌ چاره‌سه‌ری نه‌خۆشیه‌ ئاساییه‌کانی په‌یوه‌ست به‌ له‌شی نه‌خۆشه‌وه‌، دکتۆری تایبه‌ت به‌ چاره‌سه‌ری کێشه‌ی ده‌روونیه‌کانیش (سیکۆلۆگ) کارده‌که‌ن و هه‌روه‌ها ڕاوێژکاری کۆمه‌ڵایه‌تیش  (کوراتور) به‌شێکی تری ئه‌و خزمه‌تگوزاریانه‌ن که‌ له‌م ناوه‌نده‌دا پێشکه‌ش ده‌کرێن. له‌به‌رده‌وامی قسه‌کانیدا شوری زه‌ند دامه‌زرێنه‌ری ناوه‌ندی چاودێری ته‌ندروستی له‌ سێۆده‌رتێلیه‌ ده‌ڵێ که‌ دوو کارمه‌ندمان هه‌یه‌ که‌ وه‌ک وه‌رگێڕی زمانی عه‌ره‌بی ڕۆژانه‌ کارده‌که‌ن، بۆ یارمه‌تی ئه‌و په‌ناخوازانه‌ی که‌ هێشتا زمانی سویدی فێر نه‌بوون، هه‌روه‌ها بۆ وه‌رگێڕی زمانه‌کانی تری وه‌ک فینله‌ندی‌وهه‌رزمانێکی تر پێویست بکات ئه‌وا ده‌توانین، (شوری زه‌ند) ده‌ڵێت وه‌رگێڕی ئه‌و زمانانه‌ش دابین بکه‌ین.

کێشه‌ی نه‌زانینی زمانی سویدی و پێوسیتی به‌ وه‌رگێڕ له‌کاتی سه‌ردانی بنکه‌ ته‌ندروستیه‌کاندا یه‌کێکن له‌و کێشه‌ سه‌ره‌کیانه‌ی که‌ ده‌بنه‌ به‌ربه‌ست و نیگه‌رانیه‌کی زۆر بۆ په‌ناخوازان. ئه‌مه‌ له‌ قسه‌کردنمان له‌گه‌ڵ چه‌ند په‌ناخوازێکی عێراقیدا له‌ سێۆده‌رتێلیه‌، جه‌ختی لێکرایه‌وه‌ که‌ باسیان له‌ هه‌ندێک له‌و کێشانه‌ کرد که‌ له‌ نه‌خۆشخانه‌کاندا دێته‌ ڕێیان، یه‌کێک له‌وانه‌ حه‌یده‌ره‌ که‌ جه‌خت له‌سه‌ر کێشه‌ی نه‌زانینی زمان ده‌کاته‌وه‌ وه‌ک به‌ربه‌ست له‌کاتی سه‌ردانی نه‌خۆشخانه‌کاندا.

سه‌باره‌ت به‌ گرنگی کردنه‌وه‌ی ئه‌م ناوه‌نده‌ وه‌زیری کاروباری کۆمه‌ڵایه‌تی (یۆران هێگلوند) که‌ له‌ ڕێوڕه‌سمی کردنه‌وه‌ی ناوه‌نده‌که‌دا پێرێ ڕۆژی سێ شه‌ممه‌ ئاماده‌بوو، ده‌ڵێ ئه‌مه‌ هه‌نگاوێکی گرنگه‌ له‌ پێشکه‌ش کردنی یارمه‌تی پێویست به‌و په‌ناخوازه‌ عێراقیانه‌ی که‌ له‌ سیۆده‌رتێلیه‌ ده‌ژین، ئه‌مه‌ش له‌به‌ر تایبه‌تمه‌ندی بارودۆخی په‌ناخوازانه‌ که‌ ڕه‌نگه‌ له‌ ناوه‌نده‌ ته‌ندروستیه‌ ئاساییه‌کاندا له‌و جۆره‌ یارمه‌تیانه‌ نه‌بن که‌ له‌م ناوه‌نده‌ تایبه‌تانه‌ به‌ په‌ناخوازان ده‌کرێت.

ساڵی 1992 بوو که‌  (شوری زه‌ند) که‌وه‌ک په‌نابه‌رێک له‌ ئێرانه‌وه‌ هاته‌ سوید، وه‌ک په‌رستار له‌ناوه‌ندێکی چاودێر‌ی ته‌ندروستی ده‌ستی به‌ کارکرد. هه‌ر له‌وکاته‌وه‌ شوری ده‌ڵێ هیوای ئه‌وه‌م ئه‌خواست که‌ ڕۆژێک بێت ناوه‌ندێکی تایبه‌ت به‌ چاره‌سه‌ری ته‌ندروستی بۆ په‌ناخوازان بکه‌مه‌وه‌ که‌ ئه‌و یارمه‌تیانه‌ی تێدا پێشکه‌ش بکرێت که‌ که‌سی په‌نابه‌ر پێویستی پێێه‌تی و که‌ڕه‌نگه‌ له‌ ناوه‌نده‌ ته‌ندروستیه‌ ئاساییه‌کاندا پێشکه‌ش نه‌کرێن.

من له‌ نزیکه‌وه‌ و له‌شوێنی کاره‌که‌مدا ڕۆژانه‌ ئاگام له‌ ئه‌ندێشه‌و ئازاره‌کانی په‌نابه‌ران بوو کاتێک ده‌هاتن بۆ چاره‌سه‌ری ته‌ندروستی، هه‌رزوو له‌وه‌ تێگه‌شتم که‌ ئێمه‌ی په‌نابه‌ر ئه‌وده‌رده‌سه‌ری و ناهه‌مواریانه‌ی که‌ دێنه‌ ڕێمان کاتێک ووڵاتی خۆمان جێ ده‌هێڵین ،حاڵێکی وامان به‌سه‌ردێ که‌ پێویستمان به‌ چاره‌سه‌ری تایبه‌ت هه‌یه‌ به‌تایبه‌ت چاره‌سه‌ری ده‌روونی وپێویستیمان به‌قسه‌کردن و هه‌ڵڕشتنی خه‌موو بێتاێقه‌تیه‌کانی دڵمان.

هه‌رله‌ڕێوڕه‌سمی کردنه‌وه‌ی ئه‌و ناوه‌نده‌دا به‌ڕێوبه‌ری سه‌رۆکایه‌تی ئه‌نجومه‌نی کۆمونی سیۆده‌رتێلیه‌ (ئه‌نده‌رش لاگۆ) ئاما‌ده‌بوو جگه‌ له‌ جه‌ختکردنه‌وه‌ی له‌ گرنگی کردنه‌وه‌ی ئه‌و ناوه‌نده‌ ته‌ندروستیه‌ بۆ په‌ناخوازان ورچه‌په‌ڕۆینه‌یه‌کی وه‌ک دیاری کۆمۆن و وه‌ک ئاماژه‌کردن به‌ گرنگیدان به‌منداڵان پێشکه‌ش کردو میوانانی ئاماده‌بووی هاندا بۆ پێشکه‌شکردنی یاری مناڵانه‌ به‌و ژووره‌ تایبه‌ته‌ی که‌ له‌و ناوه‌نده‌دا بۆ منداڵانی په‌ناخواز که‌ بۆ چاره‌سه‌ر دێنه‌ ناوه‌نده‌که ته‌رخانکراوه‌.

په‌ناخوازانی کۆمۆنه‌کانی تریش ده‌توانن چاره‌سه‌ر له‌م ناوه‌نده‌دا وه‌ربگرن، هه‌رکه‌س بیه‌وێ سه‌ردانی ئه‌و ناوه‌نده‌ ته‌ندروستیه‌ بکات، ده‌توانێ به‌ته‌له‌فۆن کاتی سه‌ردانه‌که‌ی دیاریبکات یان ڕاسته‌وخۆ میوانی ناوه‌نده‌که‌بکات. نرخی چاره‌سه‌رکردن بۆ منداڵان تا ته‌مه‌نی هه‌ژده‌ ساڵ به‌خۆڕاییه‌و په‌ناخوازی گه‌وره‌ساڵیش بۆ بینینی دکتۆر 50 کرۆن ده‌ده‌ن و 25 کرۆنیش گه‌ر بیانه‌وێ سه‌ردانی په‌رستاران بکه‌ن. ئه‌م زانیاریه‌نه‌ (شوری زه‌ند) دامه‌زرێنه‌ری ناوه‌ندی چاودێری ته‌ندروستی له‌ سیۆده‌رتیلیه‌ ئاماژه‌ی پێدان.

جێی سه‌رنجه‌ ئه‌م ناوه‌نده‌ ته‌ندروستیه‌ تایبه‌ته‌ به‌و په‌ناخوازنه‌ی که‌ مۆڵه‌تی مانه‌وه‌یان هێشتا وه‌رنه‌گرتوه‌و و هه‌روه‌ها یارمه‌تی ته‌ندروستی به‌و په‌ناخوازانه‌ش که‌ به‌نایاسایی له‌سوید ده‌ژین پێشکه‌ش ده‌کرێت.

nazanin.mahmod@sr.se

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".