ناوه‌ندی دژه‌ هه‌ڵاواردن، زێده‌تر بناسین

له‌ فستیڤاڵی سامسوولدا که‌ چه‌ند مانگ له‌وه‌پێش له‌ دوو گه‌ڕه‌کی ڕینکه‌بی و شیستا هه‌ڵکه‌وتوو له‌ ده‌ره‌وه‌ی ستۆکهۆڵم، بۆ پێکناساندن و لێکگرێدانی ڕێکخراوه‌کانی که‌مئه‌ندام و سستئه‌ندامی بیانی پێکهات، ناوه‌ندی دژه‌ هه‌ڵاواردن (Antidiskrimineringsbyrån) یش میزێکی بۆ بڵاوکردنه‌وه‌ی زانیاری دانابوو که‌ کاترین برۆمس ئێسن، به‌رپرسی بوو.

ناوه‌ندی دژه‌ هه‌ڵاواردن (Antidiskrimineringsbyrån)، مه‌ڵبه‌ندێکی ڕاوێژکارییه‌ که‌ به‌ بێ پاداش، پشتیوانی له‌و تاکه‌ که‌سانه‌ ده‌کات که‌ له‌ کۆمه‌ڵگادا هه‌ست به‌ هه‌ڵاواردن ده‌که‌ن واتا پێیان وایه‌ که‌ فه‌رق و جودایه‌تییان ده‌رهه‌قی ده‌کرێ ئه‌ویش به‌ هۆی جیاوازه‌وه‌، ره‌گه‌زی جینسی واتا ژن یا پیاگبوون، که‌مئه‌ندامی، هه‌ڵکه‌وته‌ و مه‌یلی جینسی،  ره‌گه‌زی نه‌ته‌وه‌یی و بۆچوون و ڕوانگه‌ی ئایینی. ناوه‌نده‌که‌ تێده‌کۆشێ بۆ چاره‌سه‌ری و وه‌دواکه‌وتنی کێشه‌که‌، په‌یوه‌ندی به‌ چاوه‌دێرانی بواری هه‌ڵاواردن، خاوه‌نکار، به‌رپرسی سه‌ندیکا و کاربه‌ده‌ستانی حوکوومه‌تی بکات.

کاترین برۆمس ئێسن ده‌ڵێ ناوه‌ندی دژه‌ هه‌ڵاواردن ئاگاداری له‌ سه‌ر ئه‌وه‌ی‌ مرۆڤه‌کان چۆن ده‌توانن مافگه‌لی خۆیان بناسن و ته‌نانه‌ت له‌ کاتی نووسرانی یاسادا، پارێزگاریی لێبکه‌ن، بڵاو ده‌کاته‌وه‌. به‌ڕێوه‌بردنی سیمیناری جۆربه‌جۆر، کۆڕی ئاگاداریدان و به‌ڕێوه‌بردنی کارگه‌ و وۆرکشۆپ،‌ به‌شێک له‌و خزمه‌تانه‌ن که‌ ناوه‌نده‌که‌ ده‌یکات. دیاره‌ له‌م ناوه‌دا، خولی په‌روه‌رده‌ و خوێندن، له‌گه‌ڵ نیاز و داخوازییه‌کان، بۆ گرووپه‌ جیاوازه‌کان ڕێکده‌خرێن.

ناوه‌ندی دژه‌ هه‌ڵاواردن (Antidiskrimineringsbyrån)، له‌ چه‌ندین باژاری سویددا چالاکه‌ و خاوه‌نی نووسینگه‌یه‌. ئابووریی ئه‌م ناوه‌نده‌ له‌ ستۆکهۆڵم له‌ لایه‌ن ناوه‌ندی ده‌وڵه‌تیی لاوانه‌وه‌ بۆ کارتێکه‌ری و خۆشگوزه‌رانی (Ungdomsstyrelsen)، دابین ده‌کرێ و له‌ لایه‌ن سیووس، کۆنفیدراسیۆنی ڕێکخراوه‌ نه‌ته‌وه‌ییه‌کانی سویده‌وه‌ به‌ڕێوه‌ ده‌چێ. ئه‌م ناوه‌نده‌ وه‌ک پردی په‌یوه‌ندیی‌ نێوان چاوه‌دێرانی کێشه‌ی هه‌ڵاواردن، ده‌خه‌بتێ.

ئه‌و که‌مئه‌ندامانه‌ی هه‌ست پێده‌که‌ن له‌ کۆمه‌ڵگای سویددا فه‌رق و جوداییان لێکراوه‌، ده‌توانن شکایه‌تی خۆیان له‌ لای چاوه‌دێرێکی ده‌وڵه‌تی تایبه‌ت به‌ کێشه‌ی هه‌ڵاواردن ده‌رهه‌ق به‌ که‌مئه‌ندامان، تۆمار بکه‌ن که‌ پێیان ده‌ڵێن (Handikappombudsmannen, HO). ئامانج له‌ دانانی وه‌ها چاوه‌دێرێک ئه‌وه‌یه‌ که‌ که‌سانی که‌مئه‌ندام و سستئه‌ندامیش  بتوانن له‌ کاروباره‌کانی کۆمه‌ڵگادا، به‌شداریی ته‌واویان هه‌بێت. چاوه‌دێری ده‌وڵه‌ت بۆ کێشه‌ی هه‌ڵاواردن دژی که‌مئه‌ندامان، بۆ نه‌هێشتنی هه‌ڵاواردن و پێکهێنانی جڤاتێکی به‌ته‌واوی ڕێزگر له‌ مافه‌کانی مرۆڤ، خه‌بات ده‌کات.

خوداداد به‌هرامی، گه‌نجێکی نابینای کوردی ڕۆژهه‌ڵاته‌، چه‌ندین ساڵه‌ چالاکی کۆمه‌ڵه‌ی نابینایانی کورده‌ له‌ سوید و توانیویه‌تی پاش خوێندن له‌ ئاستی زانستگادا، له‌ ساڵی ١٩٩٩وه‌ بکه‌وێته‌ ناو بازاڕی کاره‌وه‌ و ئێستا له‌ شه‌ریکه‌ی گه‌وره‌ی سامهال بۆ خزمه‌تگوزاری کار ده‌کات. خوداد ده‌ڵێ هه‌رچه‌ند ئه‌و خۆی هه‌ستی به‌وه‌ نه‌کردووه‌ که‌ کۆمه‌ڵگا، له‌ به‌ر که‌مئه‌ندامییه‌که‌ی هه‌ڵیواردووه‌ به‌ڵام که‌مئه‌ندامی و بیانی بوون، دوو گرفتی گه‌وره‌ی کۆمه‌ڵگان و ئه‌وانه‌ی هه‌م بیانین و هه‌م که‌مئه‌ندام، دوو جار زوڵمیان لیده‌کرێ.

ناسری سینا
nasser.sina@sr.se

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".