یارمه‌تییه‌ ئابوورییه‌که‌ی ڤۆلڤۆ، له‌ سوید ده‌رناچێ

گه‌ره‌نتیی ئه‌وه‌ دراوه‌ته‌ حوکوومه‌تی سوید که‌ ئه‌و میلیۆنان کرۆن بودجه‌یه‌ی بۆ ڕزگارکردنی پیشه‌سازیی ئوتومبیلی وڵات ته‌رخان کراوه‌، نانێردرێته‌ ئه‌مه‌ریکا. به‌ڕێوه‌به‌رانی شه‌ریکه‌کانی ئوتومبیلسازیی فۆرد و جێنرال مۆتورز که‌ به‌ ڕیز خاوه‌نی کارخانه‌کانی به‌رهه‌مهێنانی ئوتومبیلی سواریی ڤۆلڤۆ و سابن، ڕۆژی ڕابردوو له‌ ئه‌مه‌ریکا، له‌ چاوپێکه‌وتنێکدا له‌گه‌ڵ یۆران هێگلوند، نوێنه‌ری وه‌زاره‌تی ئابووریی سوید، ئه‌و دڵنیاییه‌یان دا که‌ بودجه‌ ته‌رخان کراوه‌که‌ی حوکوومه‌تی ئه‌مه‌ریکا، هه‌ر له‌ سوید ده‌مێنێته‌وه‌ و نادرێنه‌ ئه‌و شیرکه‌تانه‌ له‌ ئه‌مه‌ریکا.

هه‌ڵبه‌ت ئه‌م ده‌سته‌به‌رییه‌ دیسان جێی دڕدۆنگیی به‌ڕێوه‌به‌ری سه‌ندیکای کارمه‌ندانی ڤۆلڤۆ له‌ یۆتێبۆری، ئوللێ لودڤیکسۆنه‌. ئه‌و پێی وایه‌ که‌ فۆرد و جێنرال مووتورز، شه‌ریکه‌ی زۆر گه‌وره‌ن و ته‌نانه‌ت بیرکردنه‌وهش له‌ خۆوه‌ردان له‌ کاروباره‌کانیان دژواره‌. به‌محاڵه‌وه‌ ئه‌و هیوای ئه‌وه‌ ده‌خوازێ که‌ ئێستا که‌ حوکوومه‌ت وه‌ها ده‌سته‌به‌رییه‌کی دراوه‌تێ، ئه‌وا گه‌ڵاڵه‌ و به‌رنامه‌یه‌کیشی بۆی هه‌بێت.

له‌م پێیه‌دا یۆران هێگلوند پاش دیدار له‌گه‌ڵ به‌ڕێوه‌به‌رانی فۆرد و جینرال موتورز، جه‌ختی له‌سه‌ر ئه‌وه‌ کرده‌وه‌ که‌ جگه‌ له‌ ده‌سته‌به‌رکرانی نه‌گوازرانه‌وه‌ی بودجه‌ ته‌رخانکراوه‌که‌ له‌ سویده‌وه‌، حوکوومه‌تیش چاوه‌دێرییه‌کی ته‌واوی به‌ سه‌ر هه‌ڵسوکه‌وتی ئه‌م شه‌ریکانه‌ی له‌ سویددا ده‌بێت.

به‌ڵام مارتین خوێلد شیکار و مامۆستای فێرگه‌ی به‌رزی بازرگانی، دڵی به‌مه‌ خۆش نییه‌ و به‌ڕێوه‌چوونی وه‌ها ده‌سته‌به‌رییه‌ک به‌ دژوار داده‌نێ. ئه‌و ده‌ڵی ئه‌م شه‌ریکه‌یه‌ له‌ به‌شی تۆره‌ پیشه‌ییه‌کاندا، خه‌ریکی به‌رهه‌مهێنانه‌ و جیاکردنه‌وه‌ و ته‌رخاندانی به‌شێک له‌ ڕه‌وتی ئه‌م به‌رهه‌مهێنانه‌ به‌ ناوچه‌یه‌کی تایبه‌ت، بۆیان زۆر زه‌حمه‌ت ده‌بێت.


وه‌بیر دێنمه‌وه‌ که‌ پاش سه‌رهه‌ڵدانی گه‌مارۆی جیهانیی دارایی و ڕاگه‌یاندنی دوو شه‌ریکه‌ی فۆرد و جێنرال مۆتورز بۆ ئه‌گه‌ری فرۆشی کارخانه‌گه‌لی ڤۆلڤۆ و ساب، حوکوومه‌تی سوید له‌ مانگی دیسه‌مبه‌ری ڕابردوودا، به‌سته‌یه‌کی یارمه‌تیی به‌ بایخی ٢٨ میلیۆن کرۆن بۆ ڕزگارکردنی ئه‌م دوو کارخانه‌ته‌ ته‌رخان دا.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".