تووماس بوودستروێم

تووماس بودستروێم: هه‌موو حوکوومه‌ت به‌رپرسیاره‌

ئه‌مه‌ ئانا لیند وه‌زیری کۆچکردووی کاروباری ده‌ره‌وه‌ی سوید نه‌بوو که‌ به‌رپرسی سه‌ره‌کیی له‌ سوید ده‌رکرانی دوو که‌سی به‌ڕه‌گه‌ز میسریی گومانلێکراوی تیرۆر بوون که‌ دیسامبری ساڵی ٢٠٠١ له‌ فڕۆکه‌خانه‌ی بروممای ستۆکهۆڵمه‌وه‌ له‌ لایه‌ن چه‌ند زه‌لامی نیقابپۆشی ئه‌مه‌ریکایی و به‌ فڕۆکه‌یه‌کی تایبه‌تی ڕێکخراوی هه‌واڵگریی ئه‌مه‌ریکا، سی ئای ئه‌ی، به‌ڕێکرانه‌وه‌ میسر. زۆر زوو ده‌رکه‌وت که‌ ڕه‌فتار له‌گه‌ڵ ئه‌و دوو که‌سه‌ گه‌لێ خراپ و تاوانکارانه‌ بووه‌. بۆ وێنه‌ و چاویان به‌ستن، ماده‌ی سستکه‌ریان درایێ و ڕووپۆشیان خرایه‌ سه‌ر.

خودی ڕووداوه‌که‌ ساڵی ٢٠٠۴ که‌وته‌ ناو میدیاوه‌ و ئه‌و کات، ئانا لیند سێ ساڵ بوو کوژرابوو. یۆران په‌رشۆن که‌وته‌ ناو میدیاوه‌ و ڕایگه‌یاند که‌ ئه‌م کاره‌ له‌ لایه‌ن ئانا لینده‌وه‌ کرابوو که‌ ئێستا نه‌ماوه‌.‌

له‌ کتێبێکدا که‌ له‌م ڕۆژانه‌ی دوایی له‌ لایه‌ن دۆستی هه‌ره‌ نزیک و سکرتێری ئانا لیند، خاتوو ئێڤا فرانکێله‌وه‌ نووسراوه‌، له‌قاو دراو که‌ ئه‌م بڕیاره‌ به‌ فه‌رمانی ڕاسته‌وخۆی یۆران په‌رشۆن سه‌رۆکی حوکوومه‌ته‌وه‌ کرا، نه‌ک لیند خۆی!

ئاننا گفتوگۆیه‌کی درێژی له‌گه‌ڵ یۆران هه‌بوو که‌ ده‌یه‌وێ میسرییه‌کان ده‌سبه‌جێ ده‌ربکرێن. یۆران هه‌ست به‌ گوشارێکی زۆر له‌ سه‌ر خۆی ده‌کا چونکه‌ ئه‌مریکاییه‌کان بێتوو سوید، ئه‌و دوو که‌سه‌ نه‌داته‌وه‌، ئه‌وا گه‌مارۆی ئابووری ده‌خه‌نه‌ سه‌ر یه‌کێتیی ئه‌ورووپا.

ئاننا  پێی وایه‌ هیچ بژاره‌یه‌کی نییه‌. یا ده‌بێ بڕیاره‌که‌ قه‌بووڵ بکا یا خود ده‌ست له‌ کار بکێشێته‌وه‌.

به‌ڵام ئانا لیند به‌رپرسی چۆنه‌تیی جێبه‌جێکرانی ئه‌و بڕیاره‌ نه‌بوو. ئه‌و به‌رپرسییه‌ ده‌که‌وته‌ سه‌ر شانی توماس بودستروێم وه‌زیری ئه‌و کاتی دادی سوید.

بوودستروێم هه‌میشه‌ نکۆڵی له‌وه‌ کردووه‌ که‌ هێزێکی ئه‌مریکایی ده‌ستی له‌م کاره‌دا هه‌بووبێ و ده‌ڵێ سێ هه‌فته‌ دوای رووداوه‌که‌ پێی زانیوه‌. که‌چی به‌ گوێره‌ی کتێبه‌که‌، ئه‌وه‌ بوودستروێم بوو که‌ قه‌بووڵی ئه‌وه‌ی کرد سوید، یارمه‌تی له‌ وڵاتێکی دیکه‌ وه‌رگرێت. ئێڤا فرانکێل ده‌ڵێ من داوای به‌ڵگه‌ی دیکه‌م کرد بۆ وێنه‌ ئه‌و نامه‌ گۆڕینه‌وانه‌م له‌ به‌ر ده‌سته‌ که‌ به‌ ئیمه‌یل کرابوون له‌ نێوان وه‌زاره‌تی داد و وه‌زاره‌تی ده‌ره‌وه‌ و تێیدا ده‌ڵێ تووماس بوودسستروێم ڕۆژی حه‌ڤده‌ی دیسه‌مبه‌ر زانیاریی درابوویێ. نازانم بوودستروێم چه‌نده‌ کابرایه‌کی فه‌رامۆشکاره‌ به‌ڵام به‌ڵگه‌ی به‌ نووسراوه‌ هه‌یه‌ که‌ گشت که‌س ده‌ستی پێڕاده‌گا.

یۆران په‌رشۆن له‌مباره‌وه‌ هیچ لێدوانیکی نه‌داوه‌ته‌ رادیۆ و تله‌فزیۆن به‌ڵام به‌ پێی کۆمێنتارێکی به‌ نووسراو که‌ بۆ وێنه‌ دراوه‌ته‌ هه‌واڵده‌ریی سویدی تێ‌تێ، هه‌موو که‌سانی ناو حوکوومه‌تی ئه‌و کاتی سوید، به‌رپرسی ئه‌و بڕیاردانه‌ن، ئه‌و که‌سه‌ش که‌ به‌رپرسی جێبه‌جێکردنی بوو، ئانا لیند بوو.

په‌رشۆن هه‌روه‌ها ده‌نووسێ که‌ وێنه‌یه‌کی دیکه‌ی ئه‌م رووداوه‌ی له‌ زه‌یندا هه‌یه‌ که له‌وه‌ی ئێستا له‌ کتێبه‌که و میدیاکاندا باسی ده‌که‌ن، جیاوازه‌.

‌ئێڤا فرانکێل نووسه‌ری کتێبه‌که‌ ده‌ڵێ به‌ پێی قسه‌کانی یۆران په‌رشۆن بێ ئه‌وا ئاننا لیند به‌رپرسی ده‌رکرانی دوو گومانلێکراوی کرده‌ی تێرۆریستییه‌ ، به‌ پێچه‌وانه‌ی یاساکانی مافی مرۆڤ، بۆ وڵاتێک که‌ تێدا بۆ وێنه‌ ئه‌شکه‌نجه‌ باوه‌. بۆ ئه‌مه‌ش یارمه‌تیی له‌ ده‌زگای هه‌واڵگریی ئه‌مه‌ریکا سی ئای ئه‌ی وه‌رگرتووه‌، ئه‌ویش له‌ سه‌ر خاکی سوید و به‌ بێ ئه‌وه‌ی یۆران په‌رشۆن له‌م شته‌ ئاگادار بکات. ئه‌مه‌ سیناریۆیه‌کی ته‌واو ناڕاسته‌ و ئه‌وه‌ش که‌ ئه‌و ده‌ڵێ هیچ شتێکی دیکه‌ی نایه‌ته‌وه‌ بیر و ئانا هه‌موو شتێکی هه‌ر بۆخۆی کردوه‌ و ئه‌وی لێ ئاگادار نه‌کردۆته‌وه‌، بێشه‌رمییه‌‌کی ته‌واوه‌.

تووماس بوودستروێم که‌ تازه‌ له‌ سه‌فه‌رێکی ده‌ره‌وه‌ی وڵات گه‌ڕاوه‌ته‌وه‌ دیسانه‌وه‌ جه‌ختی له‌ سه‌ر ئه‌وه‌ کرده‌وه‌ که‌ هه‌تا ڕۆژی حه‌ڤده‌ی جه‌نیڤه‌ریی ٢٠٠٢ ئاگاداری ورده‌کارییه‌کانی ده‌رکرانی ئه‌و دوو گومانلێکراو‌ به‌ تیرۆره‌ بۆ میسر نه‌بووه‌. هه‌روه‌ها ده‌ڵێ ئه‌مه‌ هه‌ڵه‌ بوو که‌ به‌رپرسییه‌که‌ به‌ ته‌واوی بکه‌وێته‌ سه‌ر ئاننا لیند. بوودستروێم ده‌ڵێ حوکوومه‌ت، شتێکی هاوبه‌شه‌ بۆیه‌ هه‌ڵه‌ بوو که‌ خه‌تاکه‌ که‌وته‌ سه‌ر تاکه‌ که‌سێک.

ئه‌و ده‌ڵێ ئه‌و بڕیاردانه‌ له‌ سه‌ر ده‌رکرانی دوو گومانلێکراوه‌که‌ ڕاست بوو چونکه‌ مافی خۆیان به‌ خراپ به‌کار هێنابوو. به‌ڵام هه‌ڵه‌ بوو که‌ جێبه‌جێ بکرێت. نه‌ده‌بوو قه‌ت جيبه‌جێ کرابایه‌.  ئێمه‌ هه‌موو به‌رپرسین له‌وه‌دا. ده‌بوو گوترابایه‌ که‌ بۆ کوێ؟ بێت و گوترابایه‌ بۆ وڵاتێکی ناهێمن، ئه‌وا نه‌ده‌بوو ناردراباوه‌.

هاوکاری له‌گه‌ڵ وڵاتێکی تر ڕاست بوو و ده‌بێ ئه‌مه‌ هه‌ر بکه‌ین. به‌ڵام ئه‌وه‌ی له‌ فڕۆکه‌خانه‌ی برومما کرا، باش نه‌کرا. ئه‌مه‌ش سێپۆ، ڕێکخراوی ئاسایشی وڵات کردی و هه‌ر خۆشی لێی به‌رپرسه‌، نه‌ک حوکوومه‌ت.

شیاوی باسه‌ که‌ دوێنێ داوا له‌ کۆمیسیۆنی ده‌ستووری پارله‌مان کرا تا له‌ سه‌ر راستیی ئه‌م رووداوه‌، لێپرسینه‌وه‌ له‌ گه‌ڵ یۆران په‌رشۆن و تووماس بوودستروێم بکات.

ناسری سینا
nasser.sina@sr.se

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".