سیاسه‌ت . سوید . کوردستان

ئۆرهان میرئۆغڵو بۆ شایه‌تیدان، هاتۆته‌ سوید

ئۆرهان میرئۆغڵو، نووسه‌ر و چالاکیی سیاسیی کورد، که‌ ساڵی 1992 و له‌ نزیکه‌وه‌ شاهیدی چۆنه‌تیی کوژرانی ڕۆژنامه‌وان و ڕووناکبیری کورد، مووسا عانته‌ر به‌ ده‌ست هێزه‌کانی نایاسایی پاراستنی سوپای تورکیه‌، ناودێر به‌ ژیته‌م له‌ کوردستان بووه‌ و خۆشی به‌ خه‌ستی بریندار بووه‌، هه‌ر ئێستا له‌ سویده‌. ئه‌و ڕۆژی ڕابردوو، له‌ جڤینێکی چاپه‌مه‌نیدا له‌ ستۆکهۆڵم به‌شدار بوو.

له‌و‌ جڤینه‌ ڕۆژنامه‌وانیدا که‌ له‌ بینای ناوه‌ندیی ڕێکخراوی په‌روه‌رده‌ی کرێکاران، ئابێ ئێف، ڕێکخرابوو، ئۆرهان میرئۆغڵو وێڕای گێرانه‌وه‌ی ڕووداوه‌که‌، داوای له‌ به‌رپرسانی سویدی کرد که‌ عه‌بدولقادر ئایگانی کورد، که‌ گه‌لێ ساڵ وه‌ک یه‌کێ له‌ پیاوه‌ نهێنییه‌کانی ڕێکخراوی نایاسایی ژیته‌م، دژی چالاکانی سیاسی، کۆمه‌ڵایه‌تی و کولتووری کورد له‌ تورکیه‌ کاری کردووه‌ و ئێستا له‌ سوید، خه‌ریکی له‌قاودانی هه‌موو ڕووداوه‌کانه‌، سه‌ره‌ڕای داخوازی تورکیه‌، نه‌درێته‌وه‌ به‌م وڵاته‌.

ئۆرهان میرئۆغڵو، له‌م جڤینه‌دا ویستی له‌ به‌ر هه‌ستیاربوونی بابه‌ته‌که‌، به‌ زمانی تورکی قسه‌ بکات و وه‌رگێڕه‌کان خۆیان بیکه‌نه‌ سه‌ر زمانی خۆیان به‌ڵام له‌ کۆتاییدا ڕازی بوو به‌ کوردیش وه‌ڵامی هه‌ندێ پرسیاری من بداته‌وه‌.

میرئۆغڵو هه‌روه‌ها ئاماده‌یی خۆی بۆ شاهیدی دان له‌ هه‌ر مه‌حکه‌مه‌یه‌کی گونجاودا له‌ ئه‌ورووپا دژی چالاکییه‌کانی ده‌زگای نهێنیی پاراستنی سوپای تورکیه‌ له‌ کوردستان، وه‌ به‌ تایبه‌ت ئه‌و ڕووداوه‌ی خۆی له‌ نزیکه‌وه‌ شاهیدی بووه‌، ده‌ربڕی.


عانته‌ر عانته‌ر کوڕه‌ گه‌وره‌ی ڕووناکبیری کوژراو مووسا عانته‌ر، ناسراو به‌ ئاپێ عانته‌ر، که‌ هاوڕێی خوشکه‌که‌ی ڕه‌خشان عانته‌ر، له‌م جڤینه‌دا به‌شدار ببوون، داوای له‌ به‌رپرسانی سوید کرد که‌ با عه‌بدولقادر ئایگان، له‌ سوید مه‌حکه‌مه‌ بکرێ و نه‌نێردرێته‌وه‌ تورکیه‌ چونکه‌ ئه‌وانه‌ی ده‌یانه‌وێ ئه‌م کێشه‌یه‌ دیزه‌ به‌ ده‌رخۆنه‌ بکه‌ن، بێگومان ئایگان ده‌کوژن.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade ljud i menyn under Min lista