ژنان

ڕه‌وشی ژنانی ئێران، سی ساڵ دوای شۆڕش

دوانیوه‌ڕۆی دوێنێ چوارشه‌ممه‌، سیمینارێک  بۆ لێدوان له‌ پرسی ژنانی ئێران، سی ساڵ پاش شۆڕشی ٧٩ و گرێدراویی سوید به‌م پرسه‌، له‌ لایه‌ن حیزبی چه‌پی سویده‌وه‌ له‌ هۆڵێکی سه‌ر به‌ په‌رله‌مان پێکهات که‌ تێیدا نزیکه‌ی هه‌شتا که‌س ئاماده‌ بوون. به‌شی یه‌که‌می سیمیناره‌که‌، تایبه‌ت به‌ میوانانی بیانی‌ بوو.

له‌ سه‌ره‌تای کۆڕه‌که‌دا ئامینه‌ی کاکه‌باوه‌، نوێنه‌ری په‌رله‌مان له‌ حیزبی چه‌پ ڕایگه‌یاند که‌ یه‌کێ له‌ میوانان واتا شه‌هین محه‌مه‌دی، چالاکی کێشه‌ی ژنانی کورد له‌ مه‌ریوان، له‌ به‌ر ڕووداوێکی ئوتومبیل، نه‌یتوانیوه‌ بێته‌ سوید. هه‌ر بۆیه‌ش کورته‌ی په‌یامه‌که‌ی له‌ لایه‌ن (Ulla Hoffman) سه‌ر به‌ حیزبی چه‌پ به‌ سویدی خوێندرایه‌وه‌:

شه‌هینی محه‌مه‌دی له‌ په‌یامه‌که‌یدا کۆمه‌ڵگای کوردیی له‌ ڕوانگه‌ی کۆمه‌ڵایه‌تی ئابووریی ده‌داته‌ به‌ر توێژینه‌وه‌ و بۆ نموونه‌ ده‌ڵێ له‌ زوربه‌ی بنه‌ماله‌کاندا، نه‌ک ته‌نیا ژنان، به‌ڵکوو پیاوانیش که‌ ده‌بێ به‌ پێی نه‌ریت، به‌رپرسی بژیوی ماڵه‌وه‌ بن بێکارن. ئاشکرایه‌ که‌ بێکاربوونی ئه‌م پیاوانه‌، ژیانی گشت بنه‌ماڵه‌ و به‌ تایبه‌ت ژنان، به‌ شێوه‌یه‌كی ڕاسته‌وخۆ ده‌خاته‌ ژێر کارتێکه‌رییه‌وه‌. ئه‌وه‌ی به‌ر له‌ هه‌ر که‌سێک، دابینکردنی پێداویستییه‌کانی بنه‌ماڵه‌، ئازاری ده‌دات و تووشی ئارێشه‌ی روحی و که‌سێتی ده‌کات.

میوانێکی دیکه‌ی سیمیناره‌که‌، مینوو جه‌لالی، پارێزه‌ر و چالاکی به‌ ڕه‌گه‌ز ئێرانیی کێشه‌ی ژنان، بیانیان و په‌ناخوازان له‌ به‌ریتانیا‌ بوو که‌ وتاره‌که‌ی خۆی به‌ ئینگلیزی پێشکه‌ش کرد. قورسایی قسه‌کانی مینوو جه‌لالیش له‌ سه‌ر گرنگیی پشتیوانی له‌ بزاڤی یه‌کسانیی ژنانی ئێرانی ناودێر به‌ کۆکردنه‌وه‌ی یه‌ک میلیۆن ئیمزا بۆ گۆڕینی یاساکانی دژه‌ ژن له‌ کۆماری ئیسلامیدا بوو. جه‌لالی هه‌روه‌ها باسی ئه‌وه‌ی کرد که‌ ئێران تاکه‌ وڵاتی ناوچه‌که‌یه‌ که‌ ڕێژه‌ی ژنانی خوێنده‌واری گه‌لێ له‌ پیاوانی زێده‌تره‌.

سێهه‌م میوان، پرۆفیسۆر هایده‌ ده‌رئاگاهی پێی وابوو که‌ پێکهاتنی ئاڵوگۆڕ له‌ ڕه‌وشی ژنانی ئێرانی، یارمه‌تی به‌ باشتربوونی ڕه‌وشی ژنان و ئالۆگۆڕی سیاسی له‌ گشت ناوچه‌که‌دا ده‌گه‌یێنێ. ده‌رگاهی هه‌روه‌ها له‌‌م ڕوانگه‌یه‌وه‌ سه‌یری کێشه‌ی ژنانی ده‌کرد که‌ به‌کارهێنانی ژنان له‌ به‌ڕێوه‌به‌رایه‌تیی ساختومانی حوکومه‌تدا، ناوی یه‌کسانی نییه‌، به‌ڵکوو بیولۆژیسمه‌. فیمینیسم ده‌بێ ساختومانی کۆمه‌ڵگا به‌ سوودی ژنان بگۆڕێ ده‌نا فه‌رقی خانمی کوندولیزا رایسی ڕه‌ش له‌ گه‌‌ڵ پیاوێک بۆ سیاسه‌تی ئه‌مریکا له‌ چی دایه‌؟

به‌شی دووهه‌می به‌رنامه‌که‌ بۆ وه‌ڵامدانه‌وه‌ی کورت به‌ چه‌ند پرسێکی به‌رپرسان وبه‌شداران ته‌رخان کرابوو: مێهرداد ده‌رویش پوور توێژه‌ر و مامۆستای کۆمه‌ڵناسی، بودیل سێبالیووس نوێنه‌ری په‌رله‌مان له‌ حیزبی ژینگه‌، کارینا هێگ نوێنه‌ری په‌رله‌مان له‌ حیزبی سوسیال دیمۆکرات، ئامینه‌ی کاکه‌ باوه‌ نوێنه‌ری په‌رله‌مان له‌ حیزبی چه‌پ، سه‌دیقه‌ی محه‌مه‌دی ئه‌ندامی کومیته‌ی ناوه‌ندیی حیزبی کۆمۆنیستی ئێران، پارێزه‌ر مینوو جه‌لالی، پرۆفیسۆر هایده‌ ده‌رئاگاهی، هه‌روه‌ها گو‌ڵاڵه‌ی شه‌ره‌فکه‌ندی چالاکی یه‌کێتیی ژنانی حیزبی دیمۆکراتی کوردستان.

ڕه‌زا خه‌لیلی نوێنه‌ریی به‌ڕه‌گه‌ز ئێرانی په‌رله‌مانی سوید له‌ حیزبی مۆدێرات یه‌کێ له‌ به‌شدارانی ئه‌و سیمیناره‌ بوو که‌ ڕه‌خنه‌ی توندی ئاراسته‌ی به‌ڕێوه‌به‌رانی ئه‌و کۆڕه‌ کرد که‌ بۆچی بۆ تاووتوێی کێشه‌یه‌کی وه‌ها گرنگ، ته‌نیا چه‌په‌کانیان کۆکردۆته‌وه‌ و نه‌یانویستووه‌ که‌سایه‌تی جودابیر و ڕێکخستنی دیکه‌ی سیاسی بانگهێشت بکه‌ن. هه‌رچه‌ند ئه‌و بۆچوونه‌ی خه‌لیلی‌، به‌رپرچ درایه‌وه‌، به‌ڵام هه‌ڵاوهه‌نگه‌مه‌یه‌کی درێژی لێ که‌وته‌وه‌‌.

سه‌دیقه‌ی موحه‌مه‌دی ئه‌ندامی کومیته‌ی ناوه‌ندیی حیزبی کۆمۆنیستی ئێران و یه‌کێ له‌ به‌ڕێوه‌به‌رانی ڕادیۆی ده‌نگی ژنان له‌ ستۆکهۆڵمیش یه‌کێکی دیکه‌ له‌ به‌شدارانی وتارده‌ری ئه‌م سیمیناره‌ بوو.

بنەمای ڕۆژنامەگەریی ئێمە لەسەر متمانە و بێلایەنییە. ڕادیۆی سوید لە ڕووی سیاسییەوە بێلایەنە. چ لە سیاسەت، ئایین، ئابووری، سوودی گشتی و چ بەرژەوەندیی تایبەتدا
Du hittar dina sparade avsnitt i menyn under "Min lista".