سوێد چۆن له‌ ئێران ده‌ڕوانێت

ئه‌نجوومه‌نی چاودێران، شورای نیگاهبانی ئێران ئه‌مڕۆ ددانی به‌وه‌دا نا که‌ له‌ هه‌ڵبژاردنه‌کانی ئه‌م دواییه‌ی سه‌رۆکی ئێراندا هه‌ڵه‌ که‌وتووه‌ته‌وه‌. خه‌ڵکانی تارانیش پلانی ناڕه‌زاییده‌ربڕێنی نوێیان ناوه‌ته‌وه‌. بارودۆخی ئێران کرژتر بووه‌ سپای پاسداران هه‌ڕه‌شه‌ی به‌ خۆپیشانده‌رانی دژ به‌ ئاکامی هه‌ڵبژاردنه‌کانی 12 ـه‌ی جولییان کرد و ڕایگه‌یاند که‌ وه‌ڵامێکی بڕنده‌یان ده‌ده‌نه‌وه‌.

وه‌زاره‌تی ده‌ره‌وه‌ی ئێرانیش به‌ڵگه‌ی ئه‌وه‌ی به‌ ئه‌نجوومه‌نی بالای ئاساییشی نه‌ته‌وه‌یی ئێران داوه‌ که‌ گوایه‌ ده‌ستی ده‌ره‌کی له‌م خۆپیشاندانانه‌دا هه‌یه‌.  ئه‌مه‌ له‌ کاتێکدا وه‌زاره‌تی ده‌ره‌وه‌ و ئه‌نجوومه‌نی شورای ئیسلامی ـ په‌رله‌مانی ئێران ـ کۆڕێکی هاوبه‌ش به‌و مه‌به‌سته‌وه‌ ده‌به‌ستن، که‌ چۆن ئێران وه‌ڵامی ئه‌و چه‌ند ده‌وڵه‌ته‌ ڕۆژئاواییه‌ بداته‌وه‌ که گۆیا ده‌ستیان له‌م ڕووداوانه‌ی دواییه‌دا هه‌بووه‌. وه‌زاره‌تی ده‌ره‌وه‌ی ئێران ڕایگه‌یاندووه‌ که‌ ده‌ستگه‌کانی ڕاگه‌یاندنی ولاتانی ڕۆژئاوا ڕاوبۆچوونی‌ ئه‌و حوکوومه‌تانه‌ی خۆیان ده‌رده‌بڕن که‌ دژی ئێرانن و به‌و نیازه‌وه‌ن شیرازه‌ی ئێران بشێوێنن.

شیاوی باسه‌ وڵاتانی ڕۆژئاوا تاکوو ئێستا هه‌ڵوه‌سته‌یه‌کی وایان له‌ ڕووی ئێراندا نه‌نواندووه‌ که‌ شیاوی ئه‌و توندوتیژییه‌ بێت که‌ ده‌سته‌ڵاته‌کانی ئێران له‌ ڕوی خۆپیشانده‌راندا ده‌یاننوێنن. هه‌رچی هه‌ڵوه‌سته‌ی سویدی له‌مه‌ڕ ئه‌م ڕووداوانه‌ی دوایی ئێرانه‌وه‌یه‌ نوێنه‌رانی پارتیی گه‌ل و پارتیی چه‌پی سوێد، له‌ هه‌فته‌ی ڕابردوو داوایان وا بوو که‌ سوێد یان باڵیۆزی خۆی له‌ تاران بانگی سوێد بکاته‌وه‌، یان ده‌روازه‌ی باڵیۆزخانه‌که‌ی له‌ ڕووی خۆپیشانده‌راندا بکاته‌وه‌ که‌ ئه‌گه‌ر له‌ ترسی گیانیان ناچار بوون په‌نای بۆ ببه‌ن. به‌ڵام وه‌زیری ده‌ره‌وه‌ی سوێد لای وا بوو که‌ مانه‌وه‌ی باڵیۆزی سوێد له‌ تاران که‌ڵکی وه‌ک چاودیری بۆ سوید ده‌بێت به‌ تایبه‌تی که‌ ئێران ڕۆژنامه‌نووسانی له‌ ڕاگه‌یاندنی هه‌واڵی خۆپیشاندنانه‌کان  قه‌ده‌خه‌ کردووه‌.

له‌ ماڵپه‌ڕه‌ی وه‌زاره‌تی ده‌ره‌وه‌ی سوێدا 18 ئه‌م مانگه‌ ڕاگه‌یه‌نراوه‌ که‌ ئه‌و هه‌واڵانه‌ی له‌ ئیرانه‌وه‌ پێمان ده‌گه‌ن مه‌ترسیدارن و باس له‌ ده‌یان کوژرا ده‌که‌ن کاتێک به‌شه‌ گورزوه‌شێنه‌کانی ڕێژیم هه‌وڵ ده‌دات شکست به‌ ناڕه‌زاییه‌ ئاشتیخوازانه‌که‌ بهێنیت. دیاره‌ که‌ ئه‌م کاره‌ ناپه‌سه‌نده‌ و ده‌بێت ڕیز له‌ مافه‌ بنه‌ڕه‌تییه‌کانی خه‌ڵکانی ئێرانیش بنرێت. ئێستایش گرنگییه‌کی زۆر به‌ خۆیه‌وه‌ ده‌گرێت که‌ ده‌سته‌ڵاته‌کانی ئێران ڕیز له‌ گازنده‌ی دژ به‌ هه‌ڵبژاردن و ژماردنی ده‌نگه‌کان بگرن که‌ خراونه‌ته‌ ڕوو. ده‌سته‌ڵاته‌کانی ئێران ده‌بێت به‌ شیوه‌یه‌کی بێخه‌وش و شیوازی کراوه‌ و شه‌فاف ئه‌م کاره‌ ئه‌نجام بدات.