سیاسه‌تی کۆمه‌کی سویدی په‌سه‌ند ده‌کرێت

له‌ ڕاپۆرتی ڕێکخراوی جیهانی بۆ هاوکاری ئابووری ئو ئێ سێ دێ، که‌ دوێنێ ڕۆژی پینجشه‌ممه‌ پێشکه‌شیان کرد، په‌سه‌ندی سیاسه‌تی کۆمه‌کی سویدی ده‌که‌ن له‌هه‌مان کاتدا داوای کاری زیاتریان بۆ به‌رگرتن له‌ دیارده‌ی هه‌ژاری کردووه‌.

شایه‌نی باسه‌ سوید به‌نیازه‌ له‌ ماوه‌ی سێ ساڵی داهاتوودا ژماره‌ی ئه‌و وڵاتانه‌ی کۆمه‌کی سویدی وه‌رده‌گرن له‌ لیستی کۆمه‌کدا که‌م بکاته‌وه‌، به‌ شێوه‌یه‌ک له‌ کۆی 67 وڵات که‌ کۆمه‌کی سویدییان وه‌رده‌گرت ته‌نها 33 وڵات ده‌مێنێته‌وه‌. له‌هه‌مانکاتدا سوید به‌رنامه‌کانی کۆمه‌ک و ئه‌و بوارانه‌ی که‌ پاره‌ی کۆمه‌کی بۆ ته‌رخان ده‌کرێت بژاره‌ ده‌کات، ڕیفۆرمێک که‌ ڕێکخراوی جیهانی بۆ هاوکاری ئابووری پێشوازی لێ ده‌کات. 

به‌ڵام سوید هه‌ر له‌لایه‌ن هه‌مان ڕێکخراوه‌وه‌ به‌ره‌وڕووی ڕه‌خنه‌ بۆته‌وه‌، به‌ڕای ئه‌و ڕێکخراوه‌، سوید ده‌بێت ئه‌و ڕۆتین و کارانه‌ی که‌ په‌یوه‌ستن به‌کاری دابه‌شکردنی کۆمه‌که‌وه‌ ئاسانتر بکرێته‌وه‌. هه‌روه‌ها داواکراوه‌ که‌ ده‌ستگه‌یه‌کی بێلایه‌ن چاودێری پرۆژه‌کانی کۆمه‌کی سویدی بکات تا دڵنیابن که‌ ئه‌و پڕۆژانه‌ به‌ پێی پرنسییپ و بنه‌ماکانی تایبه‌ت به‌ کۆمه‌کی سویدی به‌ڕێوه‌ ده‌برێن.